Հինգշաբթի՝ 27 Ապրիլ 2017ի կէսօրուան ժամը 1ին, Քսանթիի 2րդ «Ենիքօ Լիքիօ»ի աշակերտները, թիւով 24 հոգի, իրենց դասապահերէն մէկը կատարեցին Քսանթիի Ս. Աստուածածին եկեղեցւոյ մէջ։ Անոնց կ’ընկերանային ուսուցչուհիներ՝ տիկք. Իորղիա Քարակէօզիտու եւ Ֆոթինի Սքուբուրա։ Տնօրէնութիւնը իր կրթական ծրագրին մէջ նախաձեռնած էր սոյն դասապահը հայ եկեղեցւոյ մէջ իրագործել, որպէսզի աշակերտները մօտէն ծանօթանան եկեղեցւոյ ու ժողովուրդի պատմութեան։ Շրջանի հոգեւոր հովիւ Պարէտ Քհնյ. Խաչերեան, Թաղային Խորհուրդի ատենապետ պրն. Թագւոր Քարաօղլանեան եւ նախկին անդամ ու դպիր պրն. Արիս Պետրոսեան դիմաւորեցին ուսուցչուհիներն ու աշակերտները։
Պարէտ Քահանայ բարի գալստեան խօսքէն ետք հիմնական կէտերու մէջ ներկայացուց հայ եկեղեցւոյ պատմութիւնը։ Իսկ պրն. Քարաօղլանեան ներկայացուց հայ ժողովուրդի պատմութիւնը։ Ան յատուկ կերպով անդրադարձաւ նաեւ Քսանթիի հայկական գաղութի մասին։ Աւարտին, աշակերտութեան կողմէ կատարուեցան հարցումներ, որոնց համար տրուեցան անհրաժեշտ բացատրութիւնները։
Մէկ ժամէ աւելի տեւողութեամբ հանդիպման աւարտին, տիկ. Քարակէօզիտու յանուն դպրոցի տնօրէնութեան շնորհակալութիւն յայտնեց Տէր Հօր ու պրն. ատենապետին, իրենց գործակցութեան եւ ջերմ ընդունելութեան համար։
ԹՂԹԱԿԻՑ