Շաբաթ՝ 29 Ապրիլ 2017ի երեկոյեան ժամը 5։30ին, Գոմոթինիի ազգային սրահին մէջ կազմակերպուեցաւ արեւելեան Մակեդոնիոյ ու Թրակիոյ միօրեայ հայկական վարժարաններու միացեալ քննութիւն, նախաձեռնութեամբ հայեցի դաստիարակչական յանձնախումբին։
Արեւելեան Մակեդոնիոյ ու Թրակիոյ հինգ մեծ քաղաքներու մէջ՝ Գավալա, Քսանթի, Գոմոթինի, Ալեքսանտրուպոլիս եւ Օրէսթիատա, քսան տարիներէ ի վեր կանոնաւոր կերպով կը գործեն միօրեայ հայկական կրթօճախներ։ Անոնց առաքելութիւնն է՝ հայ պատանիներն ու երիտասարդները ազգային սրահներու մէջ հաւաքել, հայերէն լեզու, հայոց պատմութիւն ու կրօն դասաւանդել եւ ազգային ոգի ներշնչել։ Այս տարի աշակերտութեան ընդհանուր թիւն է մօտ 125 հոգի։
Շաբաթ օր, բարձր դասարաններու աշակերտները մօտ 30 հոգի, ներկայութեամբ իրենց ուսուցիչներուն՝ մասնակից դարձան յանձնախումբին կողմէ պատրաստուած քննութեան։ Գաղափարը գնահատելի էր ու քաջալերելի։ Հինգ քաղաքներու բարձր դասարաններու աշակերտները, միատեղ հաւաքուած, առիթը ունեցան իրար ծանօթանալու, մտերմանալու, ինչպէս նաեւ ի սէր հայոց լեզուին, պատմութեան ու կրօնքին գրաւոր ձեւով մրցակցելու։ Հարցումները 20 հատ էին՝ քերականութեան, պատմութեան եւ կրօնքի մասին։ Աշակերտները ունեցան բաւարար ժամանակ գրելու պատասխանները յանձնախումբի անդամներու հսկողութեամբ։ Լաւագոյն նիշ բերող աշակերտը պիտի ստանայ մեծ պարգեւը։ Ան՝ Հայեցի դաստիարակչական յանձնախումբի նիւթաբարոյական հոգածութեամբ պիտի մասնակցի Երեւանի մէջ կազմակերպուելիք այս տարուան «Արի Տուն» ծրագիրին։
Քննութեան աւարտին, աշակերտները հոգեւոր հովիւ Պարէտ Քհնյ. Խաչերեանի ու յանձնախումբին կողմէ ստացան մասնակցութեան յատուկ վկայագիրներ։ Ետքը տեղի ունեցաւ հիւրասիրութիւն։
ԹՂԹԱԿԻՑ