ԺԱԳ ՏԱՄԱՏԵԱՆ
Համազգայինի թղթակից
«Անիծուած նուռ II» ելոյթի աննախադէպ յաջողութենէն ետք, Համազգայինի պարախումբը
անվարան շարունակեց իր գործունէութիւնը, փորձերով եւ նոր ներկայացումներով։ Ամռան մէջ` առաջին անգամ ըլլալով ճամբորդեց արտասահման, հանդէս եկաւ բարձր մակարդակի ու նշանակութեան փառատօններու եւ միջոցառումներու, հպարտութեամբ ներկայացնելով հայ մշակոյյթի արժէքները եւ ծածանել տալով Եռագոյնը։
20 Յունիսին «Նայիրի» պարային խումբը ժամանեց «Այ. Սարանտա» քաղաքը, որ կը հանդիսանայ Ալպանիոյ յունական համայնքի ամենակարեւոր կեդրոններէն մէկը, մասնակցելու համար փառատօնին, 40 պարախումբերու հետ` համայնքային, կիպրական, պոնտական եւ Յունաստանի տարբեր շրջաններէ։
Ծովափնեայ քաղաքը ստացած է իր անունակոչումը Փոքր Հայքի «Սեբաստիոյ քառասուն վկաներ»ու բիւզանդական վանքէն, որ կառուցուած էր շրջանի բլուրի մը վրայ։
Նոյն օրը, փառատօնի ծիրէն ներս, տեղի ունեցաւ պարուսոյցներու մասնակցոութեամբ սեմինար-համաժողով` «Կիպրական, հայկական, պոնտական եւ Իփիրոս շրջանի պարեր. մշակութային ժառանգութիւն, յուշ եւ ինքնուրոյնութիւն» նիւթով։ Ժողովի ընթացքին պարի միաւորի ատենապետ ընկ. Անդրանիկ Շահպազեան առիթը ունեցաւ ներկայացնելու հայկական պարարուեստը, մշակոյթը եւ յունահայ գաղութի հարուստ պատմութիւնը։
Յաջորդեց խնճոյք ճաշարանի մէջ, որով տարբեր խումբերը մտերմացան պարի միջոցով։
«Նայիրի» խումբը հանդէս եկաւ «Շիրակի», «Շալախօ» եւ «Եարխուշտա» պարերով, հիացնելով ներկաները։
Պարախումբի անդամներուն համար գեղեցիկ պահերով լի եռօրեայ մըն էր, ձեռք բերելով իւրայատուկ փորձառութիւն, անմոռանալի յուշեր եւ դրսեւորելով պատրաստակամութիւն` մասնակցելու յաջորդ ելոյթին։
Ան ալ չուշացաւ…
Վերադարձի ճամբորդութենէն հազիւ մէկ շաբաթ ետք, 29 Յունիսին, «Նայիրի»ն պարզեց հայկական դրօշը «Տորա Սթրաթու» բացօդեայ թատերասրահին մէջ, «Bollywood» միջազգային փառատօնին, յունական, հնդկական եւ այլազգի պարախումբերու կողքին։ Համազգայինի համոյթը արժանացաւ բարձր գնահատանքի օտար հասարակութեան կողմէ, «Եարխուշտա», «Քոչարի», «Հովիւներ», «Թամզարա» եւ «Հայկական աւանդական հարսանիք» պարերով։
5 Յուլիսին, հերթը հասաւ ներկայանալու «Մէկ ազգ մէկ մշակոյթ, Աթէնք 2025» հայկական պարի փառատօնին, ընդառաջելով «Աւետիս» պարախումբի պարուսոյց Շուշանիկ Սեմերճեանի հրաւէրին։
Ձեռնարկը տեղի ունեցաւ Նէա Զմիռնիի «Լէոտիոս» վարժարանի դահլիճին մէջ։ Մասնակցեցան նաեւ հետեւեալ պարային համոյթները. «Վանուշ Խանամիրեան»` Լոս Անճելըս, «Աղթամար»` Լոնտոն, «Renaissance»` Ստրասպուրկ, «Նայիրի» եւ «Ballet Dance Grigoryan»` Լիոն։ Համազգայինի «Նայիրի»ն ներկայացաւ` «Եարխուշտա», «Շալախօ», «Ուզունտարա» եւ «Լուսաւոր գիշեր» պարերով, գրաւելով հանդիսատեսին ուշադրութիւնը։
Ընդհանուր գետնի վրայ, ամփոփելով վերոնշեալ ելոյթները, կարելի է հաստատել Համազգայինի պարողներու բարձր որակը եւ գլխաւոր պարուսոյց Էտկար Էկեանի ստեղծագործական մտքերու ծաւալումն ու նուիրուածութիւնը։
Տարեշրջանի փակումը կը պատկանի «Նանոր»ի տաղանդաւոր պատանիներուն, 12 Յուլիսին, Լաւրիօ պատմական քաղաքի «ԱԳԵԼ» բացօդեայ թատերասրահին մէջ։
Արդէն վերջին տարիներուն` համոյթին համար աւանդութիւն դարձած է ամառնային պտոյտը, ելոյթով հանդերձ։
Համազգայինի պարախումբը գլխաւոր դերակատարութիւն ունէր` «Երբ որ արտասուքը կը դառնայ պայքար» խորագիրով բեմականացուած պարերու ներկայացման, կազմակերպուած Լաւրիոյի պոնտոսցիներու «Միհրդատ» միութեան կողմէ։
Շարահիւսուած պոնտական եւ հայկական պարերը խանդավառեցին հանդիսատեսին։ Մաս կազմելով յայտագիրին, ընկ. Արշալոյս Սափրիչեանի տպաւորիչ ձայնով հնչեց` «Ես իմ անուշ Հայաստանի» երկլեզու արտասանութիւնը եւ «Պինկէօլ» երգը։ Մինչդեռ երգչախումբը կը մեկնաբանէր երգի յունական տարբերակը, Պոնտոսցին անցնելով կրակէն վարդ մը նուիրեց Հայուհիին։
«Նանոր» համոյթը ներկայացուց` «Կարնոյ Քոչարի», «Շատախի», «Ուզունտարա», «Ցնծութիւն», «Փափուռի» եւ Ազգային պարերու շարան։ Ակնյայտ բարձր մակարդակ, որ կ՚արտացոլէ պարուսոյց ընկ. Աննա Պօղոսեանի հետեւողական ու հոյակերտ գործը։
Յաջող տարեշրջան մը եւս աւարտեցաւ Համազգայինի պարախումբի համար։
Արժանավայել ելոյթներ յառաջացուցին յոյզեր, հիացնելով հայ եւ օտար հասարակութիւնը։ Ամռան ընդմիջումէն ետք, նոր թափով, կը սպասուին նոր գրաւիչ ներկայացումներ։
