Հինգշաբթի, 23 Ապրիլ 2026-ին, տեղի ունեցաւ «Արմենոփուլիա» վկայագրական հատորի երկրորդ ներկայացումը Թեսաղոնիկէի մէջ։ Յիշեցնենք, որ սոյն գիրքին առաջին շնորհանդէսը կատարուած էր 2022-ի Մայիսին, Թեսաղոնիկէի «Տէր Զաքարեան» սրահէն ներս։
Գիրքը պոնտացի յոյն Եֆսթաթիոս Խրիստոֆորիտիս-Սարփողլիսի վկայութիւնն է, երբ ինքը ականատես եղաւ 600 հայ պատանիներու զանգուածային սպանութեան։ Սոյն վկայութիւնը գրուած է պոնտական բառբարով, բայց թարգմանուած է ժամանակակից յունարէնի Սթաթիս Թաքսիտիսի կողմէ, որու ջանքերով եւ կամաւորական աշխատանքով թարգմանուեցաւ 7 լեզուներու։
Հատորի հրատարակութեան իրագործման համար նիւթական կարեւոր աջակցութեամբ օգտակար դարձաւ Գերմանիոյ Նիւրեմպերկ քաղաքի «Յոյներու միութիւնը»։
Ներկայացման ընթացքին, ողջոյնի խօսքեր լսուեցան Համապոնտական միութեան պատուոյ նախագահ Սթեֆանոս Թանիմանիտիսի, Նիւրեմպերկի «Յոյներու միութեան» նախագահ Տիմիթրիս Լամպրոփուլոսի եւ Հ.Հ. պատուոյ հիւպատոս Սարգիս Տանկազեանի կողմէ։
Գիրքին մասին խօսեցաւ Թեսաղոնիկէի քաղաքապետ Սթելիոս Ակելուտիս, որ գովաբանեց հայութեան ներկայութիւնը քաղաքէն ներս, միաժամանակ շեշտելով, որ հայ ժողովուրդը պէտք է պահպանէ իր ազգային նկարագիրն ու մշակոյթը, զոհը չդառնայ ձուլման ու ազգային ինքնութեան կորուստին։
Թեսաղոնիկէի Թաղային խորհուրդի ատենապետ ընկ. Քրիս Ղալիլէաս շեշտեց վկայութեան իւրայատուկ արժէքը որպէս պատմական փաստ Հայոց ցեղասպանութեան վկայագրութիւններու շարքէն ներս։
Հեղինակ Սթաթիս Թաքսիտիս անդրադարձաւ հատորին մէջ տեղ գտած վկայութեան արժէքին շուրջ, որպէս հեղինակման աղբիւր մը, որուն միջոցաւ ան յանձն առաւ իրագործել գիրքի վերծանման աշխատանքը՝ իբրեւ կտակ նախորդ սերունդներու հաւաքական յիշողութեան յարատեւ պահպանման։
ԹՂԹԱԿԻՑ
