«Թէքէեան Կենտրոն»ին մէջ բացուեցաւ բացառիկ մոսկուաբնակ հայ նէյրովիրաբոյժ, ջրասուզակ եւ լուսանկարիչ Սերգէյ Գասպարեանի հեղինակած «Ստորջրեայ աշխարհի գաղտնիքները» խորագիրը կրող լուսանկարչական ցուցահանդէսը՝ «Թէքէեան Կենտրոն» հիմնադրամի եւ Photo.Podium.com ինթերնեթային (համացանցային) աղբիւրի համագործակցութեամբ: Ցուցահանդէսին ներկայացուած վաթսունվեց աշխատանքները իրենց պատկերներով եւ գեղարուեստական անուանումներով կը վկայեն հեղինակի բազմակողմանի զարգացման մասին:
Ցուցահանդէսի բացման ներկայ էին Հ.Հ. մշակոյթի նախարարի տեղակալ Ներսէս Տէր-Վարդանեան, Երեւանի մէջ Ռուսաստանի գիտութեան եւ մշակոյթի կեդրոնի՝ մշակոյթի բաժնի վարիչ Իրինա Կասացկայան, արուեստագէտներ, արուեստասէրներ:
Ողջունելով ներկաները՝ «Թէքէեան Կենտրոն» հիմնադրամի տնօրէն Արմէն Ծուլիկեան մասնաւորապէս նշեց.- «Սերգէյ Գասպարեան այն հեղինակներից է, ում աշխատանքները պատիւ կը բերեն աշխարհի ցանկացած ցուցասրահի: Հպարտ եմ, որ այս լուսանկարների հեղինակը մեր հայրենակիցն է եւ նաեւ հաւատացած եմ, որ շուտով նա Հայաստանում մասնակից կը դառնայ այլ հետաքրքիր ծրագրերի»:
Փոխ-նախարար Ներսէս Տէր-Վարդանեանի խօսքով՝ նմանօրինակ ձեռնարկի կազմակերպումը ուշագրաւ է նաեւ այն առումով, որ Հ.Հ. մշակոյթի նախարարութիւնը մտադիր է Հայաստանի մէջ զարգացնելու ջուրին առնչուող մշակոյթի ներկայացման մեթոդները եւ յառաջիկային կը նախատեսէ Սեւանայ լիճին մէջ ստորջրեայ թանգարան բանալ, որը պիտի նպաստէ ներքին զբօսաշրջութեան զարգացման:
«Յոյսով եմ, որ առիթ կ’ունենանք այդ կապակցութեամբ Սերգէյ Գասպարեանին Հայաստանում տեսնելու, եւ յաջորդ ցուցահանդէսներն արդէն հարստացած կը լինեն հայաստանեան պատկերներով»: Իրինա Կասացկայան՝ շնորհաւորելով հեղինակին եւ ցուցահանդէսի կազմակերպիչներուն, ցանկութիւն յայտնեց, որ այս իւրօրինակ ու տպաւորիչ ցուցադրութիւնը ըլլայ շարունակական եւ ներկայացուի այլ քաղաքներու մէջ եւս, որու հնարաւորինս կ’օժանդակէ Երեւանի մէջ Ռուսաստանի գիտութեան եւ մշակոյթի կեդրոնը: Ցուցահանդէսի համադրող, Photo.Podium.com ինթերնեթային աղբիւրի հայաստանեան ներկայացուցիչ, լուսանկարիչ Արմէն Ենգոյեան, ներկայացնելով հեղինակին, աւելցուց.- «Նա սկսեց լուսանկարել իր կեանքի դժուար պահին եւ այլեւս չդադարեց. շատ է ճամբորդում, նկարում է ու ամէն նկարին լիրիկական (քնարական) մօտեցում է ցոյց տալիս: Յատկանշական են լուսանկարների անուանումները, որոնք խօսում են նրա երեւակայութեան, կատակասիրութեան, աշխարհի մարդ լինելու մասին»:
Յ.Գ.- Սերգէյ Գասպարեան ծնած է 1953թ. Մոսկուա, բժիշկներու ընտանիքի մէջ: Կրթութեամբ եւ մասնագիտութեամբ նէյրովիրաբոյժ է, բժշկական գիտութիւնների տոքթոր: 35 տարի է կ’աշխատի Ռուսաստանի առաջատար եւ համաշխարհային ճանաչում ունեցող «ՌԲԳԱի Ն.Ն. Բուրդենկոյի անուան նէյրովիրաբուժութեան գիտահետազօտական ինստիտուտ»ին մէջ՝ որպէս վիրահատութեան պլոքի (բաժնի) բաժնի պետ: Ամբողջ ազատ ժամանակը կը նուիրէ լուսանկարչութեան. ըլլալով նաեւ փորձառու ջրասուզակ, կը կարողանայ պատկերել ծովերու եւ ովկիանոսներու ստորջրեայ հրաշալիքները: Ռուսաստանի արհեստավարժ նկարիչներու ստեղծագործական միութեան (լուսանկարչութեան բաժին) անդամ է, մոսկովեան ժամանակակից լուսանկարչական ոլորտի աշխոյժ մասնակից: Մասնակցած է շարք մը միջազգային ցուցահանդէսներու Երեւանի, Գիւմրիի, Թիֆլիսի, Մոսկուայի, Ս.Փեթերսպուրկի, Մինսքի մէջ. արժանացած է մրցանակային տեղերու:
