Վարդանանց Հերոսամարտի, ինչպէս նաեւ՝ Տեառնընդառաջի տօները հանդիսաւոր կերպով նշուեցան Գոքինիոյ «Ս. Յակոբ» եկեղեցւոյ մէջ, նախագահութեամբ՝ Յունաստանի հայոց թեմի առաջնորդ Գեղամ Արք. Խաչերեանի։
Յատկանշական էր մասնակցութիւնը Հ. Կ. Խաչի ազգային «Զաւարեան» վարժարանի աշակերտութեան, ինչպէս նաեւ՝ ուսուցիչներու, ծնողներու եւ մեծ թիւով հայրենակիցներու ներկայութիւնը։
Վարդանանց տօնակատարութիւն
Ուրբաթ՝ 9 Փետրուար 2018ին, «Զաւարեան» վարժարանի աշակերտութիւնը ներկայ գտնուեցաւ «Ս. Յակոբ» եկեղեցւոյ մէջ՝ Վարդանանց դիւցազնամարտի առթիւ Ս. Պատարագին, զոր մատուցեց Նարեկ Քհնյ. Շահինեան։ Վարժարանի բարձր կարգերու աշակերտները, ղեկավարութեամբ՝ Հրայր Ա. Քհնյ. Նիկոլեանի, ներդաշնակ կերպով կատարեցին պատարագի երգեցողութիւնը, իսկ խորանին վրայ պատարագիչին սպասարկեցին սարկաւագներ եւ փոքրիկ դպիրներ։ Պատարագին նախագահեց Առաջնորդ Սրբազան Հայրը, որ իր քարոզին ընդմէջէն հայրական պատգամ ուղղեց փոքրիկներուն՝ Վարդանանց խորհուրդով բարձր պահելու մայրենի լեզուն եւ մեր ազգային դիմագիծը։ Ներկայ էր նաեւ Ազգային Վարչութեան ատենապետ պրն. Պօղոս Չոլաքեան։
Ապա՝ «Զաւարեան» Կեդրոնի «Զաքարեան-Սարաճեան» զոյգ սրահներուն մէջ տեղի ունեցաւ Վարդանանցի նուիրուած հանդիսութիւն, ներկայութեամբ՝ Սրբազան Հօր եւ կրօնական դասուն։ Յատկաշնական էր մեծ թիւով ծնողներու ներկայութիւնը եւ քաջալերանքը աշակերտութեան։ Դպրոցի բոլոր կարգերու աշակերտները համարձակ ոճով ներկայացուցին տօնին նուիրուած երգեր եւ արտասանութիւններ, կենդանի պատկերներ եւ խօսքեր։
Առաջնորդ Սրբազան Հայրը, անգամ մը եւս իր խօսքը ուղղելով ներկաներուն, շնորհաւորեց աշակերտները եւ ուսուցչական կազմը, որոնք գեղեցիկ պատրաստութեամբ ներկայացուցին յայտագիրը։
Ան նշեց, թէ Վարդանանց Ճակատամարտը այն միակ մարտերէն է, որ մինչեւ այսօր կը նշուի մեր ժողովուրդին կողմէ, որովհետեւ կենաց-մահու՝ այլեւ «իմացեալ մահը անմահութիւն է» բարոյական յաղթանակը սրբագործող պայքար մըն էր հայ ժողովուրդին համար։
Տեառնընդառաջի տօնը
Հանդիսապետութեամբ՝ յունահայոց առաջնորդ Գեղամ Արք. Խաչերեանի, եւ մասնակցութեամբ՝ շրջաններու Հոգեւոր Հովիւներուն, Չորեքշաբթի՝ 14 Փետրուար 2018ին, Գոքինիոյ «Ս. Յակոբ» եկեղեցին ընդունեց հոծ թիւ մը զանազան շրջաններէ եկած հաւատացեալներու, որոնք միասնաբար նշեցին Տեառնընդառաջի տօնը՝ հանդիսաւոր արարողութամբ։ Ներկայ եղաւ նաեւ Ազգային Վարչութեան ատենադպիր պրն. Թագւոր Յովակիմեան։ Հոգեպարար արարողութեան աւարտին, Առաջնորդ Սրբազան Հայրը կուռ քարոզով մը բացատրեց օրուան խորհուրդը եւ մասնաւորաբար շեշտը դրաւ հայկական աւանդութիւնները եւ, անոնց կողքին, ազգային արժէքները պահելու հրամայականին վրայ։ Կոչ ուղղեց բոլորին՝ ամուր պահելու իրենց կապուածութիւնը եկեղեցւոյ եւ մեր աւանդութիւններուն, երիտասարդ սերունդը մղելու դէպի հոգեւոր արժէքները՝ հայ եկեղեցւոյ առաքելութեան զօրավիգ կանգնելու։
Ապա՝ մեծ թիւով ծնողեր իրենց մանուկ զաւակները յանձնեցին Հոգեւոր Հովիւներուն, որոնք խորանին վրայ կատարեցին փոքրիկներու ընծայումը՝ շարականներու երգասացութեամբ։
Արարողութեան աւարտին, ժողովուրդը մոմերով ուղղուեցաւ դէպի եկեղեցւոյ բակը, ուր Սրբազան Հօր կողմէ վառուեցաւ աւանդական խարոյկը։ «Զաւարեան» վարժարանի աշակերտները, ուսուցմամբ Հայր Վահրիճին, երգեցին հայկական աւանդական երգեր, ապա՝ շուրջ-պարերով եւ երգերով ցատկեցին խարոյկին վրայէն։ Եկեղեցասէր Տիկնանց Մարմնոյ կողմէ յաջորդեց հիւրասիրութիւն, ուր տեղի ունեցան սրտաբուխ նուիրատուութիւններ։ Ներկաներուն բաժնուեցաւ «Լուսատու» կրօնադաստիարակչական թերթիկը՝ Տեառնընդառաջի մասին վերլուծական յօդուածներով։
Առաջնորդ Սրբազան հօր խօսքով եւ բարեմաղթութիւններով վերջ գտաւ խանդավառ երեկոն։
ԹՂԹԱԿԻՑ