14 Ապրիլի առաւօտեան, Աթէնքի մէջ 79 տարեկանին մահացաւ Ռազմիկ Մուրատեան: Ծագումով Արեւմտեան Հայաստանի Շատախ շրջանէն՝ Ռազմիկը Արցախեան ազատամարտի ամէնէն դժուար տարիներուն, 1988ի եւ 1993ի միջեւ երկարող ժամանակաշրջանին նուիրուեցաւ ազատագրական նորակազմ ջոկատներուն ու այնուհետեւ Հայաստանի բանակի թիկունքը ապահովելու գործին: Անոր երկրորդ ապահով տունը Աշտարակի մէջ ռազմական կեդրոնի վերածուեցաւ, ձեռնաշէն զէնքեր նախագծելու վայր մը, ուր Վազգէն Սարգսեան եւ այլ կազմակերպիչներ հանդիպումներ կ՚ունենային:
1990էն ետք զբաղեցաւ գեղանկարչութեամբ՝ իր նուրբ ներաշխարհը եւ հայրենիքի հանդէպ սէրը վերածելով գոյնի եւ պատկերի։ Ան յաճախ Յունաստան կ՚այցելէր իր ընտանիքին մօտ գտնուելու համար։ Այս անգամ, «Քորոնա» ժահրի արգիլումներուն պատճառով ստիպուեցաւ մնալ Աթէնք, սակայն իր սիրտը միշտ հայրենիքին համար կը տրոփէր։
Մեր ցաւակցութիւնները կը յայտնենք հանգուցեալի այրիին՝ ընկ. Մաննիկին, իր զաւակներուն՝ ընկ. Արամին եւ Արմէնին, ինչպէս նաեւ ընտանեկան պարագաներուն։