Համացանցային որսորդութիւններ
Հոգեկան պայքար…
ՄԻՆՍԱՐ
Տաքուկ վրանին մէջ, շուրջը բարի-բարի ծալապատիկ նստած, «Չէրոքի» ցեղի փոքրիկ կարմրամորթները հետաքրքրութեամբ մտիկ կ’ընէին տարիքոտ մեծ հայրիկին խօսքերը…
— Զաւակներս, գիտցէք, որ մնայուն պայքար մը տեղի կ’ունենայ շարունակ, մեր բոլորի հոգիներուն մէջ գտնուող, երկու գայլերու միջեւ… մէկ գայլը չարիքն է… այսինքն՝ զայրոյթը, նախանձը, տառապանքը, հիասթափութիւնը, ագահութիւնը, մեղադրանքը, ամբարտաւանութիւնը, ստորադասութիւնը, ստախօսութիւնը, նախատինքը, ունայնութիւնը, հպարտութիւնը, անձնական եսը, եւ այլն, եւ այլն…
— Իսկ միւս գայլը ո՞րն է պապիկ, հարցուց փոքրիկ կարմրամորթ մը…
— Միւս գայլը, զաւակներս՝ բարիքն է… այսինքն՝ ուրախութիւնը, խաղաղութիւնը, սէրը, յոյսը, հեզութիւնը, խոնարհութիւնը, ազնուութիւնը, բարեգործութիւնը, կարեկցութիւնը, գթութիւնը, առատաձեռնութիւնը, ճշմարտութիւնը, ողորմածութիւնը, եւ այլն, եւ այլն…
Փոքրիկ կարմրամորթները պահ մը մտածեցին, ապա հարցուցին պապիկին…
— Պապի՞կ, այս երկու գայլերէն ո՞ր մէկը կը շահի…
Տարիքոտ հայրիկը պատասխանեց…
— Ան գայլը… որուն մենք կը կերակրենք զաւակներս…
minsar55@gmail.com
