Շաբաթ՝ 13 Յունուար 2018ի կէսօրուան ժամը 12ին, Թեսաղոնիկէի «Հայաստան» սրահէն ներս, տեղի ունեցաւ Հ.Գ.Խ.ի Մակեդոնիոյ եւ Թրակիոյ Շրջանային Վարչութեան հովանաւորութեան տակ գտնուող Թեսաղոնիկէի «Մալաքեան-Գասպարեան Ծաղկոց» շաբաթօրեայ դպրոցի 2018 տարուան գաթայի կտրումը, ներկայութեամբ՝ դպրոցի տնօրէնութեան, ուսուցչական կազմին, ծնողական միութեան, Հ.Գ.Խ.ի Մակեդոնիոյ եւ Թրակիոյ Շրջանային Վարչութեան եւ Հ.Գ.Խ.ի Թեսաղոնիկէի «Անի» մասնաճիւղի վարչութեան անդամուհիներուն։
Դպրոցի տնօրէնուհի տիկ. Զապէլ Գալֆայեան կտրեց գաթան՝ մաղթելով առողջութիւն եւ յաջողութիւն։ Գաթայի կտրման ժամանակ, մետաղադրամը յայտնուեցաւ դպրոցի ծնողական միութեան գանձապահուհի տիկ. Տիաննա Պայազէթեանի մօտ. Շրջանային Վարչութեան ատենապետուհիին կողմէ նուէրը յանձնուեցաւ օրուան բախտաւորին։
Դպրոցի մեծ ընտանիքը սրտանց շնորհաւորեց տիկ. Պայազէթեանը՝ անոր մաղթելով առողջութեամբ եւ յաջողութիւններով լեցուն տարի մը եւ փափաքներու իրականացում, ինչպէս նաեւ՝ ծնողական միութեան ճամբով բարի առաքելութիւն եւ արդիւնաւէտ աշխատանք։
Տեղի ունեցաւ պատշաճ հիւրասիրութիւն։
Թեսաղոնիկէի դպրոցի գաթայի կտրումը
Թեսաղոնիկէի «Մալաքեան-Գասպարեան Ծաղկոց» շաբաթօրեայ դպրոցը իր 2018 տարուան գաթայի կտրումը կատարեց