Մ.Ա.Կ.ի Ընդհանուր ժողովի 74րդ նիստի ծիրէն ներս, տեղի ունեցաւ Յունաստանի վարչապետ Քիրիաքոս Միցոթաքիսի եւ Թուրքիոյ նախագահ Ռեճեփ Թայիփ Էրտողանի միջեւ հանդիպում։
Յունական կառավարական աղբիւրներու համաձայն, հանդիպման ընթացքին արծարծուեցան գլխաւոր հարցերը, ինչպէս՝ գաղթականներու խնդիրը, Կիպրոսի հիմնահարցը, այլեւ երկկողմանի տնտեսական եւ առեւտրական գործակցութեան հնարաւորութիւնը։
Նոյն աղբիւրներուն համաձայն, որոշուեցաւ կեանքի կոչել «Յունաստանի եւ Թուրքիոյ միջեւ Գործակցութեան Բարձրագոյն խորհուրդ»ը, որուն պատասխանատուութիւնը կ՚իյնայ երկու երկիրներու արտաքին գործոց նախարարներուն վրայ։
Կիպրական հարցին առնչութեամբ, Յունաստան անգամ մը եւս իր զօրակզութիւնը յայտնեց Կիպրոսին եւ աջակցութիւն ցոյց տուաւ կիպրացի նախագահ Անասփասիատիսի առաջարկին՝ Կիպրոսի երկու համայնքներուն համար ուժանիւթի օգտագործման հասոյթներէն արդար բաժիններու ապահովումով։
Գաղթանական հարցով, որոշուեցաւ գործադրել ամէն տեսակի միջոցներ, կասեցնելու համար գաղթականներու հոսքը մինչեւ թրքական ափերը, ապա նաեւ՝ Յունաստան հասնելու համար ծովային ճամբաններուն վրայ։
Յոյն վարչապետը սեղանին վրայ դրաւ Խալքիի հոգեւոր ճեմարանի վերաբացման խնդիրը, որ արդէն ինչպէս ծանօթ դարձաւ, թրքական կողմը դրական աչքով կը դիտէ։
Նախագահ Էրտողան ներկայացուց Թուրքիոյ կողմէ անցեալին ալ դրուած ծանօթ հարցերը, որոնք առնչուած են Արեւելեան Թրակիոյ յոյն մուսուլմանական համայնքին հետ, ինչպէս նաեւ անդրադարձ ըրաւ Աթէնքի եւ Թեսաղոնիկէի մէջ օսմանեան շրջանէն մնացած մշակութային երկու կոթողներու պահմպանման։
Հանդիպումի աւարտին, երկու ղեկավարները համաձայնեցան զարգացնել Յունաստանի եւ Թուրքիոյ միջեւ գործակցութեան մթնոլորտը՝ ի նպաստ երկու ժողովուրդներուն եւ տարածաշրջանի կայունացման ապահովութեան։
Հանդիպումէն վերջ, յունական կողմը իր զսպուած լաւատեսութինը յայտնեց հանդիպման արդիւնքներուն մասին, նշելով թէ մթնոլորտը դրական էր։ Յունաստան կ՚ակնկալէ որ Թուրքիա աւելի տրամաբանական կեցուածք պիտի ցուցաբերէ, յատկապէս՝ Կիպրոսի եւ գաղթականական կնճռոտ խնդիրներուն համար։
ԳԼԽԱՒՈՐ ԷՋ ԼՈՒՐԵՐ Միջազգային Յունաստանի վարչապետին եւ Թուրքիոյ նախագահին միջեւ հանդիպում Մ.Ա.Կ.ի մէջ
Յունաստանի վարչապետին եւ Թուրքիոյ նախագահին միջեւ հանդիպում Մ.Ա.Կ.ի մէջ
Յունաստանի վարչապետին եւ Թուրքիոյ նախագահին միջեւ հանդիպում Մ.Ա.Կ.ի մէջ