Կազմակերպութեամբ Հ.Յ.Դ. Երիտասարդական Միութեան Թեսաղոնիկէի «Ս. Թեհլիրեան» խումբին, Շաբաթ՝ 23 Մարտ 2019ի երեկոյեան ժամը 6։30էն սկսեալ, «Holiday Inn» պանդոկին մէջ նշուեցաւ Յունաստանի Երիտասարդական Միութեան 72րդ տարեդարձը, մասնակցութեամբ շրջանի ազգային կառոյցներու, հաստատութիւններու, միութիւններու, երիտասարդ-երիտասարդուհիներու, ատենապետներու, անդամներու, ներկայացուցիչներու, ինչպէս նաեւ՝ Թեսաղոնիկէի հայոց հոծ բազմութիւն։ Ներկայ էին նաեւ Աթէնքէն Հ.Յ.Դ. Յունաստանի Կեդրոնական Կոմիտէի 2 անդամներ՝ ընկ. Յարութ Սերոբեան (Երիտասարդական Միութեան մօտ ներկայացուցիչ) եւ ընկ. Ռաֆֆի Գազէրեան, ինչպէս նաեւ Թեսաղոնիկէի հոգեւոր հովիւ Ստեփանոս Վրդ. Փաշայեան։
Օրուան բացման խօսքը արտասանեց Յունաստանի Երիտասարդական Միութեան Կեդրոնական Վարչութեան Թեսաղոնիկէի խումբի ներկայացուցիչ ընկ. Գրիգոր Մարուքեան՝ բարի գալուստ մաղթելով եւ իր շնորհակալութիւնը յայտնեց օրուան ձեռնարկին բոլոր մասնակցողներուն։ Ապա՝ յաջորդաբար խօսք առին Հ.Յ.Դ. Երիտասարդական Միութեան Թեսաղոնիկէի «Ս. Թեհլիրեան» խումբի նախկին ատենապետներ ընկերներ Սահակ Մարուքեան, Տիգրան Պլէճեան, Պետրոս Հալաճեան, Գոռ Վիրապեան, Յովիկ Գասապեան եւ ներկայ ատենապետուհի ընկ. Սաթենիկ Սիմոնեան՝ իւրաքանչիւրը ներկայացնելով իր տարիներուն կատարուած տարբեր գործունէութեանց մասին։ Աւելի՛ն. ներկաներուն առաւել եւս շօշափելի դարձնելու նպատակով՝ հին նկարներ եւ պատկերներ ցուցադրեցին, ինչ որ ներկաներուն մօտ խանդավառութիւն ստեղծեց՝ յիշելու անցեալի օրերն ու կատարուած բոլոր գործունէութիւնները։
Ապա՝ Հ.Յ.Դ. Յունաստանի Կեդրոնական Կոմիտէի անունով ողջոյնի խօսք փոխանցեց ընկ. Կարապետ Նատեան՝ շնորհաւորելով Հ.Յ.Դ. Յունաստանի Երիտասարդական Միութեան 72րդ տարեդարձը եւ շեշտելով այսօրուան երիտասարդութեան կատարելիք գործունէութեան առաւել աշխուժութիւն տալու եւ նոյն պայքարի տեսլականով՝ յանուն Հայ Դատի հետապնդման ու մանաւանդ նոր սերունդի յանձնառութեան՝ հիներուն գործը շարունակելու անհրաժեշտութիւնը։
Ապա՝ տեղի ունեցաւ պաշտօնական ընթրիքը, որու ընթացքին հանդէս եկան Թեսաղոնիկէի «Մալաքեան-Գասպարեան» շաբաթօրեայ դպրոցի պարախումբն ու «Համազգային» Հայ Կրթական եւ Մշակութային Միութեան Թեսաղոնիկէի «Ղ. Սարեան» մասնաճիւղի «Մասիս» պարախումբը՝ ներկաներուն մօտ աւելիով խանդավառութիւն ստեղծելով։ Ընթացքին՝ տեղի ունեցաւ վիճակահանութիւն, ուր շատ-շատեր բախտաւորուեցան գեղեցիկ նուէրներով։ Ուրախ առիթէն օգտուելով եւ բարձր գնահատելով երիտասարդներուն կատարած աշխատանքը՝ եղան նիւթական նուիրատուութիւններ։
Աւարտին, երիտասարդ-երիտասարդուհիները «Արիւնոտ Դրօշ» յեղափոխական երգով փակեցին օրուան ձեռնարկը։
Նուիրատուութիւններ՝
Հ.Յ.Դ. Յունաստանի Կեդրոնական Կոմիտէն՝ 250 եւրօ, Հ.Յ.Դ. Յունաստանի Երիտասարդական Միութեան Կեդրոնական Վարչութեան:
Հետեւեալ նուիրատուութիւնները եղան Հ.Յ.Դ. Յունաստանի Երիտասարդական Միութեան Թեսաղոնիկիէ «Ս. Թեհլիրեան» խումբին.-
Թեսաղոնիկէի «Ս. Աստուածածին» եկեղեցւոյ թաղականութիւն՝ 250 եւրօ:
Թուրշուճեան ընտանիք՝ 150 եւրօ:
Պետրոս Հալաճեան ընտանիք՝ 100 եւրօ:
Յովհաննէս Գասապեան՝ 50 եւրօ:
Ալեքսան Ուզունեան՝ 40 եւրօ:
Հ. Գթ. Խաչի Թեսաղոնիկիէ «Անի» մասնաճիւղը՝ 150 եւրօ:
Պլեճեան ընտանիք՝ 150 եւրօ:
Ոմն՝ 20 եւրօ:
Ոմն՝ 20 եւրօ:
Ստորեւ կը հրատարակենք Յունաստանի Երիտասարդական Միութեան Կեդրոնական Վարչութեան Թեսաղոնիկէի խումբի ներկայացուցիչ Գրիգոր Մարուքեանի բացման խօսքը.
Հ.Յ.Դ. Յունաստանի Երիտասարդական Միութիւնը իր 72 տարուան կեանքի ընթացքին միշտ ունեցած է մէկ նպատակ՝ Յունաստանի մէջ ապրող հայ երիտասարդներուն համախմբել, որպէսզի բոլորը միասին ծառայեն հայ ժողովուրդի իրաւունքներուն ու արդարութեան գաղափարներուն՝ յանուն Հայ Դատի պայքարին:
Հ.Յ.Դ. Յունաստանի Երիտասարդական Միութիւնը հիմնուեցաւ 1947 թուականին, ու ներկայիս կը գործէ 3 խումբերով՝ Աթէնքի մէջ «Դրօ», Գոքինիոյ «Փոթորիկ» եւ Թեսաղոնիկէի «Սողոմոն Թեհլիրեան» խումբերը: Իւրաքանչիւր խումբ հերթական ժողովներ կը գումարէ իր սեփական գործունէութիւնը կազմակերպելու համար, բայց նաեւ կը մասնակցի մեր միութեան ընդհանուր՝ միասնական գործունէութեան:
Այսպիսով կը ճշդուի մեր կառոյցին գործադրութիւնը, որուն հիմնական թիրախներէն մէկն է՝ հայ երիտասարդութիւնը ստանայ ազգային, բարոյական, քաղաքական, քաղաքացիական, գաղափարական դաստիարակութիւն:
Մեր միութեան ամենակարեւոր գործունէութիւնն է՝ 1915ին Թուրքիոյ կատարած Հայոց Ցեղասպանութեան ճանաչման պայքարը, ինչպէս նաեւ Արցախի դատի քարոզչութիւնը: Հետեւաբար, մեր միութիւնը միշտ առաջնորդած է Հայ Դատի ամէն մէկ քարոզչական գործունէութեան, որ տեղի ունեցած է մեր գաղութէն ներս ու դուրս, ըլլալով այդ միութիւնը, որ կազմակերպեց առաջին բողոքի ցոյցը Յունաստանի մէջ դէպի թրքական դեսպանատուն ու հիւպատոսարան՝ Հայոց Ցեղասպանութեան ճանաչման պահանջքով:
Մենք, սփիւրքահայերս դժբախտութիւնը ունինք մեր հայրենիքէն հեռու ապրելու: Մեր կեանքի ընթացքին կ՚ապրինք մեր ազգային ինքնութեան կորուստին վտանգին տակ: Բայց մենք մեր արմատները չենք մոռնար: Կը ճանչնանք մեր հայրենիքը՝ մեր դպրոցական գիրքերուն, ժողովրդային ու ազգային երգերուն ու պարերուն, հեիեաթներուն եւ հայոց պատմութեան մէջէն:
Այսօր, Հ.Յ.Դ. Յունատանի Երիտասարդական Միութեան 72րդ տարեդարձն է: Մենք՝ միութեանս անդամները կը խոստանանք մեր սուրբ պայքարը միշտ շարունակել, առանց կանգ առնելու մեր հանդիպած դժուարութիւններուն առջեւ, միշտ աշխատելով մեր միութեան գոյատեւման ու զօրացման նպատակով: Միշտ մեր հայացքը ուղղած դէպի հայրենիք:
Բարի եկաք մեր երեկոյին, կը մաղթենք բարի ժամանց:
Ստորեւ կը հրատարակենք Հ.Յ.Դ. Յունաստանի Կեդրոնական Կոմիտէի անունով՝ ընկ. Կարապետ Նատեանի արտասանած խօսքը.
Հայ Յեղափոխական Դաշնակցութեան Երիտասարդականի եօթանասուներկամեայ (72) պայծառ պատմութիւնը յայտնի եւ աչքառու ներկայութիւն ունեցաւ հայկական գաղութէն ներս՝ առաջնահերթութիւն տալով Հայ Դատի հետապնդման աշխատանքներուն։
Երիտասարդականի շարքերէն անցան բազմաթիւ անդամներ, իրենց անթառամ դրոշմը ձգեցին գաղութի պատմութեան մէջ եւ օրինակ դարձան յաջորդ սերունդներուն։ Մենք կարի՛քը ունինք գիտակից եւ ազգային ոգիով տոգորուած երիտասարդներու, որոնք պիտի աշխատին ի խնդիր մեր հետապնդած նպատակներու իրականացման։ Մենք կարի՛քը ունինք պատասխանատու երիտասարդներու, որոնք մօտ ապագային պիտի ստանձնեն մեր գաղութի ղեկը եւ պիտի առաջնորդեն դէպի նոր նուաճումներու։ Մենք կը հաւատանք, թէ Երիտասարդական եւ Պատանեկան Միութեան անդամները կը գիտակցին, թէ այսօր տարբեր տեսակի մարտահրաւէրներու առջեւ կը գտնուի ամբողջ հայութիւնը՝ թէ՛ Հայաստանի եւ թէ Սփիւռքի մէջ եւ մենք՝ բոլորս, մեծով ու պզտիկով, գո՛րծ ունիք ընելիք։ Հաւատք, նուիրում եւ վճռակամութիւն՝ հասնելու համար մեր ամբողջական նպատակներու իրականացման։ Վերջապէս, մենք ակնկալութիւննե՛ր ունինք մեր երիտասարդներէն։
Հայ Յեղափոխական Դաշնակցութեան Յունաստանի Կեդրոնական Կոմիտէի անունով՝ կ’ողջունեմ այսօրուան ձեռնարկը եւ կը մաղթեմ նորանոր յաջողութիւններ ու բեղուն գործունէութիւն՝ ի շահ մեր ժողովուրդին։
Շնորհաւո՛ր ըլլայ տօնդ, Հայ Յեղափոխական Դաշնակցութեան Երիտասարդական Միութիւն։