Ուրբաթ, 5 Յունուար 2024-ին, երեկոյեան ժամը 7-ին, կատարուեցան Ճաշու եւ Երեկոյեան ժամերգութիւններ, ինչպէս նաեւ ընթերցուածներու ներկայացում։ ժամը 8։30-ին մատուցուեցաւ Ճրագալոյցի Ս. եւ Անմահ Պատարագ, որուն աւարտին, տեղի ունեցաւ նախատօնակի աւանդական արարողութիւնը, ուր հաւատացեալներու մասնակցութեամբ եւ եկեղեցւոյս ծառայողներուն ու հոգշ. Հայր սուրբի գլխաւորութեամբ երգուեցան «Խորհուրդ մեծ…» եւ «Այսօր տօն է…» շարականները։
Յաջորդեց Թաղական խորհուրդի գաթայի կտրումն ու Հ.Յ.Դ. Երիտասարդական միութեան Թեսաղոնիկէի «Ս. Թեհլիրեան» խումբին կողմէ Աւետիսի շրջագայութիւնը։
Շաբաթ, 6 Յունուար 2024-ին, առաւօտեան ժամը 10։30-ին, Ս. Ծննդեան եւ Աստուածայայտնութեան տօնին առիթով, Թեսաղոնիկէի «Ս. Աստուածածին» եկեղեցւոյ մէջ մատուցուեցաւ հանդիսաւոր Ս. եւ Անմահ Պատարագ, որ մատուցեց, յաւուր պատշաճի քարոզեց եւ ջրօրհնէքը կատարեց՝ շրջանի հոգեւոր հովիւ՝ հոգշ. Տ. Եղիա աբղ. Մալխասեան, ներկայութեամբ Թաղական խորհուրդի, Տիկնանց միութեան եւ շրջանին մէջ գործող բոլոր ազգ. կառոյցներու, հաստատութիւններու եւ միութիւններու անդամ-անդամուհիներուն, ինչպէս նաեւ հաւատացեալներու։ Ս. Սեղանին սպասարկեցին եւ երգեցողութիւնը կատարեցին Թեսաղոնիկէի «Ս. Աստուածածին» եկեղեցւոյ բոլոր սպասաւորներն ու ծառայողները։
Ս. Պատարագի աւարտին, եկեղեցւոյ աջակողմը գտնուող Ս. Մկրտարանէն՝ եկեղեցւոյս սպասաւորներուն մասնակցութեամբ եւ «Լոյս ի Լուսոյ..» գեղեցիկ շարականով, Միւռոնաթափ սրբալոյս Միւռոնը բերուեցաւ ու բարձրացուեցաւ Ս. Խորան՝ եւ շարականներու, աղօթքներու, քարոզներու, մաղթանքներու, Աւետարանի ընթերցանութեամբ, Ս. Միւռոնի հեղումով, ինչպէս նաեւ խաչ հանելու աւանդական դրութեամբ տեղի ունեցաւ Ջրօրհնէքի եկեղեցական արարողութիւնը, որ խորհրդանիշ է Քրիստոսի Մկրտութեան։ Խաչի կնքահայրն էր Թեսաղոնիկէի «Ս. Աստուածածին» եկեղեցւոյ դպրաց դասի անդամ Թագւոր Աւետիսեանը։ Ս. Պատարագի վերջաւորութեան, եկեղեցւոյ սպասաւորներուն կողմէ բոլոր ժողովուրդի զաւակներուն բաժնուեցաւ օրհնուած ջուր։
Ուրբաթ, 7 Յունուար 2022-ին, Մեռելոցի առիթով մատուցուեցաւ Ս. եւ Անմահ Պատարագ։ Իսկ յաջորդ օրը՝ Երկուշաբթի, հոգշ. Հայր սուրբը առաւօտեան ժամը 10։00-14։00 եւ երեկոյեան ժամը 16։00-18։00 ներկայ գտնուեցաւ Թեսաղոնիկէի ազգ. գերեզմանատուն եւ կատարեց գերեզմանօրհնէք։
Շաբաթ, 8 Յունուարէն սկսեալ, Հայր սուրբը, Ս. Ծննդեան տօնին առիթով, սկսաւ Թեսաղոնիկէի ծխայիններուն տուները այցելել եւ տնօրհնէք կատարել։
«ՔՐԻՍՏՈՍ ԾՆԱՒ ԵՒ ՅԱՅՏՆԵՑԱՒ
ՁԵԶԻ ՄԵԶԻ ՄԵԾ ԱՒԵՏԻՍ»
ԹՂԹԱԿԻՑ
