Հինգշաբթի, 26 Սեպտեմբեր 2024-ի կէսօրուան ժամը 12։30-ին, Յունաստանի Հայոց թեմի Առաջնորդ գերպ. Տ. Սահակ Ծ. Վրդ. Եմիշեան, ընկերակցութեամբ Ազգային վարչութեան ատենապետ պրն. Թագւոր Յովակիմեանին եւ Կրօնական ժողովի ատենապետ Տ. Պարէտ քհնյ. Խաչերեանին, պաշտօնական այցելութիւն տուաւ Յունաստանի մօտ Հ.Հ. դեսպանութիւն։
Առաջնորդ Հայր սուրբին ու պատուիրակութեան դիմաւորեց Հ.Հ. դեսպան պրն. Տիգրան Մկրտչեան։ Ապա հանդիպման ընթացքին, պրն. Մկրտչեան ջերմօրէն շնորհաւորեց գերպ. Հայր սուրբին առաջնորդական պաշտօնի ընտրութիւնը։ Ան քաջառողջութիւն ու բեղուն ծառայութիւն մաղթեց Հայր սուրբին եւ յայտնեց, որ Հ.Հ. դեսպանութիւնը պիտի շարունակէ իր յարգալիր գործակցութիւնը Յունաստանի Հայոց թեմի Ազգային առաջնորդարանին հետ, ի սպաս յունահայ գաղութին ու հայրենիքին։
Թեմիս Առաջնորդ գերպ. Տ. Սահակ Ծ. Վրդ. Եմիշեան, իր կարգին շնորհակալութիւն յայտնեց պրն. դեսպանին, ջերմ ընդունելութեան ու բարեմաղթութիւններուն համար։ Ան յայտնեց, որ առաջնորդական իր նոր պաշտօնի սեմին, սրտի պարտք կը նկատէ Հայաստանի հանրապետութեան անկախութեան 33-րդ ամեակին առթիւ, այցելել Յունաստանի հողերուն վրայ գտնուող մեր հայրենիքի ներկայացուցիչին՝ պրն. դեսպանին։ Ան եւս շեշտեց, որ մեր գաղութը եւ Հ.Հ. դեսպանութիւնը պիտի շարունակեն իրենց կարեւոր առաքելութիւնը ի սպաս մեր ժողովուրդին։
Ապա ներկաները անդրադարձան Հայաստանի շուրջ ներկայ քաղաքական իրավիճակին եւ դիմագրաւած տագնապներուն։ Յատուկ ակնարկութիւն եղաւ նաեւ յունահայ գաղութի իրավիճակին ու մարտահրաւէրներուն շուրջ։
Դիւան Ազգ. Առաջնորդարանի
