Յունաստանի Հայ Մարմնակրթական Ընդհանուր Միութեան (Հ.Մ.Ը.Մ.) համար Յունիս ամիսը հանդիսացաւ գործունէութեամբ լեցուն շրջան մը:
Ամիսը սկսաւ մեր վարչութեան պաշտօնական հանդիպումով՝ Յունաստանի Սկաուտական Մարմինին (Σ.Ε.Π.) հետ։ Հանդիպման ընթացքին, վերահաստատուեցան գործակցութեան սերտ կապերը եւ քննարկուեցան համատեղ նախաձեռնութիւններ, Հայաստանի մէջ կայանալիք 13-րդ Համա-Հ.Մ.Ը.Մ.-ական բանակումի նախապատրաստութիւնները, ինչպէս նաեւ անդամներու դաստիարակութեան եւ անվտանգութեան վերաբերող հարցեր:
Հայաստանի Հանրապետութեան Առաջին Անկախութեան հռչակման 108-ամեակին առիթով, Շրջանային վարչութիւնը մեծ յաջողութեամբ կազմակերպեց «Սարտարապատ» ճատրակի մրցաշարքը։ Մրցումին մասնակցեցան չորս դպրոցներէ 35 աշակերտներ՝ յառաջ մղելով ազնիւ մրցակցութեան եւ մարզական ոգիի արժէքները:
Աթէնքի Հ.Մ.Ը.Մ.-ի մասնաճիւղ
Մեր մարզական ակադեմիաները նոյնպէս յաջողութեամբ աւարտեցին իրենց տարեշրջանը: Թենիսի մանկական բաժանմունքը, իր հրաժեշտի հանդիսութեամբ, փակեց մարզական փորձերով, ջանքերով, ժպիտներով ու գեղեցիկ յուշերով լեցուն ստեղծագործական շրջան մը։
Պասքեթպոլի (կողովագնդակի) ակադեմիաները պտոյտ մը կատարեցին դէպի Օրոփոս, ուր բարեկամական մրցում մը ունեցան տեղական խմբակին հետ՝ երեխաներուն ջամբելով մարզական, խմբային եւ ժամանցի եզակի փորձառութիւն մը:
Միաժամանակ, մեծ թիւով երեխաներու մասնակցութեամբ կազմակերպուեցաւ «Արմենիքի»-ի լողի մրցաշարքը, որ առանձնայատուկ մարզական փորձառութիւն եղաւ փոքրիկ մարզիկներուն համար՝ քաջալերելով խմբային ոգին, ճիգն ու սէրը դէպի մարզանքը։ Տարեշրջանը փակուեցաւ լաւատեսութեամբ եւ հպարտութեամբ՝ մարզիկներու նոր սերունդին հանդէպ, որ կը կազմէ «Արմենիքի»-ի ապագան:
Վերջապէս, ճատրակի բաժանմունքի տարեշրջանը աւարտեցաւ ներքին մրցաշարքով՝ պսակելով յառաջդիմութեամբ լեցուն արդիւնաւէտ տարի մը:
Ամսուան ընթացքին յաջողութեամբ սկսաւ նաեւ «Արմենիքի»-ի ամառնային ճամբարը (camp)։ Ստեղծագործական զբաղմունքներով, մարզական գործունէութիւններով, խաղերով եւ դաստիարակչական յայտագիրներով՝ ճամբարը երեխաներուն կու տայ ինքնավստահութեան, գործակցութեան ու ստեղծագործութեան ապահով եւ ուրախ միջավայր մը:
Գոքինիոյ Հ.Մ.Ը.Մ.-ի մասնաճիւղ
Բացառիկ ուրախութիւն եւ հպարտութիւն պարգեւեցին «Արմենիքի»-ի մարզիկներ Փոլ Աւագեան եւ Ֆիլիփ Քալենտերիս-Ամիրալեան։ Անոնք արծաթէ մետալ նուաճեցին Ε.Σ.ΠΕ.Δ.Α.-ի «Juniors Regional Beach Volley 2026 մրցաշարքի Թեթեւ Ոլորտի (Beach Volley)» տղոց Մ17 (Կ17) դասակարգին մէջ՝ հաստատելով մեր միութեան ուժեղ ներկայութիւնը նաեւ վոլէյպոլի մէջ:
Սկաուտներ
Ամիսը բոլորուեցաւ 4 սկաուտական մասնաճիւղերու տարեփակի հանդէսներով եւ գայլիկներու մրցումներով (Λυκοπουλικούς Αγώνες)։ Երեխաները, խմբապետներն ու ծնողները միասնաբար բաժնուեցան խաղեր գեղեցիկ եւ յուզումնալից պահեր՝ նոր ժամադրութիւն տալով ամառնային բանակումներուն համար:
Ծառայութեան, գործակցութեան եւ եղբայրութեան արժէքներով առաջնորդուած՝ առաւել թափով կը շարունակենք մեր ընթացքը դէպի գայլիկներու եւ սկաուտներու ամառնային բանակումները, ինչպէս նաեւ 2026-ի մեծ Համա-Հ.Մ.Ը.Մ.-ական բանակումը, որ պիտի կատարուի Հայաստանի մէջ, 24 Յուլիսէն մինչեւ 2 Օգոստոս, որուն Յունաստանի սկաուտական կառոյցը պիտի մասնակցի 15 անդամներէ բաղկացած պատուիրակութեամբ մը։
