Հ.Յ.Դ. Յունաստանի Երիտասարդական եւՊատանեկան միութեանց քարոզարշաւը
«Վայրկեան մը ունի՞ս։
Խօսինք Ատրպէյճանի մասին…»
Պաքուի մէջ ընթացք առած է Մ.Ա.Կ.-ի կենսոլորտի փոփոխութեան COP29 խորհրդաժողովը, ուր կը մասնակցին մեծ թիւով երկիրներու ներկայացուցիչներ։ Շուրջ ամիս մըն է, որ Հ.Յ.Դ. Հայ դատի յանձնախումբերը, գլխաւորութեամբ Եւրոպայի եւ Ա.Մ.Ն.-ի Հ.Յ.Դ. Հայ դատի գրասենեակներուն, աշխատանքի լծուած են՝ աշխարհն ու պետութիւնները իրազեկելու համար, թէ ի՛նչ կը նշանակէ այս կազմակերպումը Ատրպէյճանի համար, որ հայութեան դէմ իր ոճիրները իրագործելէ ետք, կը փորձէ ճերմկցուած երես մը ցոյց տալ աշխարհին։
Անշուշտ, քիչ չեն Պաքուի խայտառակութիւնները որ լոյս աշխարհ կուգան հետզհետէ, բացայայտելով այս երկրի կաշառակեր ու ծախուած մեթոտները։
Քարոզչական այս գործընթացին իրենց քայլերը միացուցին Հ.Յ.Դ. Յունաստանի Երիտասարդական եւ Պատանեկան միութիւնները, որոնք վիտէօ երիզներ պատրաստելով, յոյն հանրութեան կը բացայայտեն Ատրպէյճանի հակահայ քաղաքականութիւնը, արցախահայութեան էթնիկ զտման առաջնորդած հետեւողական գործընթացը, արցախահայ գերիներու ապօրինի բանտարկութիւնները, ինչպէս եւ նոյնինքն Ատրպէյճանի ժողովուրդին եւ լրագրական կամ ակտիվիստական շրջանակներուն դէմ շղթայազերծուած բռնարարքները։
Երկու յունալեզու երիզները հանրութեան հրամցուած են ընկերային ցանցերուն միջոցաւ, «Վայրկեան մը ունի՞ս։ Խօսինք Ատրպէյճանի մասին…» նշանաբանով, եւ մեծ ուշադրութիւն հրաւիրելով յոյն քաղաքացիներուն կողմէ, որոնք իրենց նշումներով եւս տեսակէտներ կը յայտնեն Ատրպէյճանի դէմ։
Հանդիսատեսներու մեծ թիւը՝ յոյն ժողովուրդի հետաքրքրութիւնը ցոյց կուտայ այս թեմային նկատմամբ։ Աւելցնենք, թէ շաբթուան բոլոր ընթացքին, Հ.Յ.Դ. Երիտասարդական եւ Պատանեկան միութիւնները ընկերային ցանցերուն միջոցաւ յառաջ կը քշեն նաեւ հետեւեալ նշանախօսքերը.
#COP29,
#StopGreenwashingGenocide,
#COP29Exposed,
#FreeArmenianHostages
