Կիրակի, 20 Սեպտեմբեր 2026-ին, յաջողութեամբ գումարուեցաւ Յունաստանի Հ.Մ.Ը.Մ.-ի 2026-2027 տարեշրջանի Համախմբապետական առաջին ժողովը, Գոքինիոյ «Զաւարեան» կեդրոնին մէջ: Սոյն կարեւոր ժողովին իրենց մասնակցութիւնը բերին Շրջանային վարչութիւնը, Շրջանային խորհուրդը, չորս մասնաճիւղերու խորհուրդները, Շրջանային խմբապետը, Աթէնքի, Գոքինիոյ եւ Գարէայի խմբապետական կազմերը, ինչպէս նաեւ Յունական Սկաուտական խնամակալութենէն (Σ.Ε.Π.) յատուկ հրաւիրեալ եղբայր Սփիրոս Փոլիզոյիս: Յատկանշական էր նաեւ Թեսաղոնիկէի խմբապետներուն առցանց աշխոյժ մասնակցութիւնը:
Ժողովը վարեց Շրջանային խմբապետ եղբ. Վիգէն Մինասեան: Ան բարի գալուստ մաղթեց բոլոր ներկաներուն, ապա իր խորին շնորհակալութիւնը յայտնեց Շրջանային վարչութեան՝ իր անձը Շրջանային խմբապետի պատասխանատու պաշտօնին վրայ նշանակելուն համար:
Այնուհետեւ, խօսք առաւ Շրջանային վարչութեան ատենապետուհի քոյր Արշա Մանուկեան: Ան իր ուղերձին մէջ սրտանց շնորհակալութիւն յայտնեց խմբապետական կազմերուն՝ անոնց նուիրումին եւ անխոնջ աշխատանքին համար, ինչպէս նաեւ երախտագիտութիւն յայտնեց նախորդ Շրջանային խմբապետուհիին՝ քոյր Սիլվա Եզեկիէլեանին, իր կատարած նուիրեալ ծառայութեան համար: Քոյր Արշան յաջողութիւն մաղթեց նորանշանակ Շրջանային խմբապետին եւ շեշտեց յառաջիկայ տարեշրջանի առաջնահերթութիւնները, որոնք են՝ ղեկավարներու շարունակական զարգացումը, որակաւոր գործունէութիւններու կազմակերպումը եւ հաւատարմութիւնը Հ.Մ.Ը.Մ.-ի սկաուտութեան վսեմ առաքելութեան:
Ապա, ժողովը անցաւ իր օրակարգին, եւ եղբայր Վիգէն հանգամանօրէն ներկայացուց 2026-2027 սկաուտական տարեշրջանի ռազմավարական ծրագիրը, որը հիմնուած է երեք գլխաւոր հիմնասիւներու վրայ.
Ա) Անդամահաւաքի ծրագիր. սկաուտական ընտանիքի ընդլայնման ուղղուած աշխատանքներ, որոնք կ՚ընդգրկեն արտաքին կապերու սերտացում եւ գործակցութիւն հայկական այլ կառոյցներու ու վարժարաններուն հետ, արդի թուային ու ընկերային հարթակներու մէջ աշխոյժ ներկայութիւն, ինչպէս նաեւ նորեկ անդամներու ջերմ ընդունելութիւն եւ անմիջական ներգրաւում:
Բ) Ծնողներու վստահութեան հզօրացում. Այս ուղղութեամբ շեշտուեցաւ փոքրիկներու ֆիզիքական ու հոգեկան ապահովութեան բացարձակ առաջնահերթութիւնը, ծնողներուն հետ թափանցիկ ու անկեղծ հաղորդակցութեան պահպանումը, խմբապետական կազմի տիպար նկարագիրն ու օրինակելի վարքագիծը, ինչպէս նաեւ ծնողներուն աշխոյժ ներգրաւումը սկաուտական միջավայրէն ներս:
Գ) Դաստիարակչական դասախօսութիւններ. խմբապետական կազմի պատրաստութեան, կրթութեան եւ զարգացման ուղղուած յատուկ դասախօսութիւններու շարքի կազմակերպում:
Ռազմավարական ծրագիրի ներկայացումէն ետք, տեղի ունեցաւ շահեկան հարցում-պատասխանի բաժին, ուր արծարծուեցան յառաջիկայ տարեշրջանի ընելիքները:
Ժողովի երկրորդ բաժնով, ելոյթ ունեցաւ Յունական Սկաուտական Խնամակալութենէն եղբ. Սփիրոս Փոլիզոյիս, որ ներկաներուն հանգամանօրէն ներկայացուց յունական սկաուտութեան նորագոյն յայտագիրն ու անոր ընձեռած արդիական միջոցները:
Ժողովի փակման խօսքով հանդէս եկաւ Շրջանային խմբապետ եղբայր Վիգէն Մինասեանը: Ան իր վերջաբանին մէջ յատուկ շեշտադրում կատարեց սկաուտական միջավայրէն ներս հայախօսութեան բացարձակ կարեւորութեան վրայ՝ նշելով, որ մայրենի լեզուի պահպանումն ու կիրարկումը կը հանդիսանան Հ.Մ.Ը.Մ.-ի ազգային դաստիարակութեան եւ սկաուտական առաքելութեան հիմնաքարերը:
