Հ.Կ.Խաչի «Լ. եւ Ս. Յակոբեան» ազգային վարժարանի շրջանաւարտներու հրաժեշտի հանդիսութեան՝ տնօրէնուհի Վիքթորիա Մաղաքեանի ներկայացուցած տեղեկագիրը
Այսօր առանձնայատուկ օր մըն է մեր դպրոցի կեանքին մէջ։
Կը շնորհաւորենք մեր վարժարանի բոլոր աշակերտները իրենց գեղեցիկ մասնակցութեան համար այս հանդէսին:
Այսօր մենք ոչ միայն կ’աւարտենք եւս մէկ յաջող ուսումնական տարի, այլ նաեւ կը նշենք մեր սիրելի շրջանաւարտներուն կարեւոր հանգրուանը։
Ամէն ուսումնական տարուան աւարտ մեզի համար առիթ մըն է կանգ առնելու, ետ նայելու անցած ճամբուն եւ գնահատելու այն բոլոր ջանքերը, որոնք գործադրուեցան մեր աշակերտներուն կրթութեան եւ դաստիարակութեան համար։ Այս տարին եւս մեր երեխաները սորվեցան, աճեցան, ստեղծագործեցին, յաղթահարեցին դժուարութիւններ եւ արձանագրեցին նոր յաջողութիւններ։
Սակայն, սփիւռքի հայկական դպրոցի առաքելութիւնը շատ աւելի լայն է, քան գիտելիքի փոխանցումը։ Մենք կը դաստիարակենք հայ զաւակներ, որոնք կը ճանչնան իրենց արմատները, կը սիրեն իրենց լեզուն, կը պահպանեն իրենց մշակոյթը եւ հպարտութեամբ կը կրեն իրենց ազգային ինքնութիւնը։
Այցելութիւններ-տօներ-հանդէսներ
«Լ. եւ Ս. Յակոբեան» վարժարանի աշակերտութիւնը մասնակցեցաւ զանազան դաստիարակչական ծրագիրներու, դաստիարակչական այցելութիւններ կատարեց եւ իր աշխոյժ մասնակցութիւնը բերաւ բոլոր դպրոցական տօնակատարութիւններուն, նշելով բոլոր հայկական եւ յունական տօները:
Հոկտեմբեր ամսուն, Թարգմանչաց տօնին առիթով, կատարեցինք մեր ծնողական միւութիւններուն կողմէ վերանորոգուած Փոխառական «Բաբգէն Գասապեան» գրադարանի պաշտօնական անուանակոչութեան արարողութիւնը:
Նոյն օրը, տեղի ունեցաւ գեղանկարչութեան աշխատանոցի ընթացքին պատրաստուած ստեղծագործութիւններու ցուցահանդէսը:
Նաեւ, Հոկտեմբեր ամսուն մեծ պատիւը ունեցանք մեր վարժարանին մէջ հիւրընկալելու երկու հռչակաւոր եւ միջազգային ճանաչում ունեցող գեղանկարիչներ՝ պարոն Էտուարտ Սագայեանն ու տիկին Աննա Մարիա Ցագալին։
Այցելութիւնը տեղի ունեցաւ գեղանկարչական աշխատանոցին ծիրէն ներս եւ աշակերտները ունեցան բացառիկ հնարաւորութիւն ներկայացնելու իրենց ստեղծագործութիւնները, արտայայտելու իրենց ներշնչման աղբիւրները, քննարկելու արուեստի հետ կապուած հարցեր եւ ստեղծագործ երկխօսութեան մտնելու այս երկու հանրածանօթ արուեստագէտներուն հետ։
Կաղանդի շրջանին այցելեցինք Հայաստանի Հանրապետութեան դեսպանատունը,ուր մեր աշակերները երգեցին ու պարեցին հայերէնով: Նաեւ, այցելեցինք շրջանիս 94-րդ նախակրթարանը, ուր մեր աշակերտները երգեցին ու պարեցին Կաղանդի աւանդական երգեր ու պարեր:
Մեր աշակերտները մասնակցեցան Ս. Կարապետ եւ Ս.Գրիգոր Լուսաւորիչ եկեղեցիներու արարողութեանց: Ս.Ծնունդի եւ Ս.Յարութեան առիթով, ընթերցուածներ կարդացին տիկին Ալինա Պարտաքճեանի ուղեկցութեամբ: Նաեւ, մեր աշակերտները մասնակցեցան Տեառնըդառաջի, Տասը Կուսանաց եւ Ոտնլուայի արարողութիւններուն:
Դ., Ե. եւ Զ. դասարաններու աշակերտները մասնակցեցան Վարդանանցի առիթով կրօնական ժողովին կողմէ կազմակերպուած դասախօսական երեկոյին, ուր օրուան բանախօս էր Թեմիս առաջնորդ Սրբազան Հայրը, իսկ մեր աշակերտները ներկայացուցին մեր ուսուցչուհիներուն կողմէ պատրաստուած գեղարուեստական յայտագիր:
Բացառիկ էր մեր աշակերտներուն մասնակցութիւնը 24 Ապրիլի կեդրոնական ոգեկոչական ելոյթին, ուր երաժշտութեան աշխատանոցի աշակերտները երգեցին երաժիշտ պրն.Միհրան Չալըքեանի ղեկավարութեամբ:
Զ.դասարանի աշակետներուն հետ այցելեցինք «Ազատ Օր»-ի խմբագրատունը, ուր աշակերտները մեծ հետաքրքրութիւն ցուցաբերեցին օրաթերթի մասին իրենց ստացած տեղեկութիւններով:
Դաստիարակչական ծրագիրներ
Նշեցինք մարմնամարզութեան օրը եւ մասնակցեցանք Special Olympics-ի «Կը խաղանք միասին, կը սորվինք միասին» դաստիարակչական ծրագիրին, հաշմանդամութեան համաշխարհային օրուան առիթով: Նաեւ, մեր դպրոցին մէջ կազմակերպեցինք ոտնագնդակի մրցոյթներ՝ նշելով մարզասէրի օրը:
Այս տարի, առաջին եռամսեակին, յաջողեցանք իրականացնել լողի դասերու ծրագիրը, որ նախատեսուած է Գ. եւ Դ. դասարաններու աշակերտներուն համար, Աթէնքի «Սարաֆիօ» լողաւազանին մէջ։
Յաջողեցանք Դպրոցական գրադարաններու ցանցին մէջ ընդգրկուելու եւ մուտք գործելու «myLib» դպրոցական գրադարաններու ցանցին, որպէսզի իրականացնենք մեր գրադարանին գիրքերու ելեկտրոնային գրանցումը ու կազմակերպումը, զոր ստանցնած են պատասխանատու ուսուցչուհիներ տիկին Սթելլա Մոյիսի եւ տիկին Նազիկ Ճամուզեան։
Նաեւ, մեր մշակած ընթերցասիրութեան ծրագիրին ծիրէն ներս, բոլոր դասարաններու աշակերտները ամէն տասնհինգ օր, մէկ գիրք փոխ կ’առնէին, իսկ իրենց ընթերցողական գործունէութիւնը կանոնաւոր կերպով կը գրանցուէր։ Բոլոր աշակերտները ցուցաբերեցին յատուկ հետաքրքրութիւն եւ նախանձախնդրութիւն։ Սակայն, Գ. դասարանի աշակերտները առանձնացան՝ կատարելով փոխառութիւններու ամէնէն մեծ թիւը։ Իբրեւ գնահատանք անոնց ջանքերուն եւ սէրին համար գիրքերուն հանդէպ՝ պիտի շնորհուի յուշանուէր մրցանակ եւ գիրք մը՝ մաղթանքով շարունակեն գտնել գիրքերուն էջերուն մէջ պահուըտած գանձերը։
Ուսումնական խորհուրդի նախաձեռնութեամբ պատմաբան տիկին Գոհար Գանտահարեան այցելեց մեր երեք վարժարանները եւ հետեւեցաւ հայերէնի դասապահերուն:
Այս տարի եւս մեր վարժարանը գործակցեցաւ միջազգային համբաւի արժանացած երաժիշտ պարոն Միհրան Չալըքեանին հետ: Մեր վարժարանի աշակերտները հետեւեցան երաժշտութեան դասընթացքներու, մասնակցելով երաժշտութեան աշխատանոցին:
Գործակցեցանք հոգեբան տիկին Մարի Ճանիկեանին հետ եւ կազմակերպեցինք ծրագիր մը բռնութեան դէմ մեր վարժարանի բարձր կարգի եւ միջնակարգի աշակերտներուն միջեւ: Նաեւ, Լ. եւ Ս. Յակոբեան ու Ճէնազեան միջնակարգի աշակերտները մասնակցեցան բռնութեան դէմ ուրիշ ծրագրի մը «Μπαίνω στη θέση του άλλου, λέω όχι στη βία και τον εκφοβισμό»:
Մրցոյթներու յաջողութիւններ
Մեր աշակերտները իրենց ուսուցիչներուն առաջնորդութեամբ եւ քաջալերանքով մասնակցեցան զանազան մրցոյթներու եւ գնահատանքի արժանացան:
Ե. եւ Զ. դասարաններու աշակերտները մասնակցեցան թուաբանութեան «Միքրոս էֆքլիտիս» եւ բնագիտութեան «Արիստոտելիս» մրցոյթներուն: «Արիստոտելիս» մրցոյթին չորս աշակերտ՝ Ե. դասարանէն Քրիստափոր Խաչատուրեան եւ Ալեքսանտրոս Սիվասլիօղլու, իսկ Զ. դասարանէն Տիմիթրիս Քարաֆիլաքիս եւ Սարգիս Զաֆիրուլիս գերազանց արդիւնք բերին:
«Միքրոս էֆքլիտիս» մրցոյթին արդիւնքները պիտի յայտարարուին Սեպտեմբերին:
Բացառիկ եւ պատուաբեր արդիւնք բերաւ մեր վարժարանի Դ. դասարանի մասնակցութիւնը, տիկին Լինա Մինիի առաջնորդութեամբ, Առաջին Միջազգային աշակերտական գեղանկարչութեան մրցոյթին «Η Κόρη της Αρχαίας Θήρας – στο Χθες, στο Σήμερα, στο Αύριο»։ Այս մրցոյթին, Դ. դասարանի աշակերտուհիները՝ Զարա Գարավանի եւ Մարիա Խաչերեան պարգեւատրուեցան, իսկ բոլոր աշակերտները գնահատանքի արժանացան:
Նաեւ, Դ. դասարանի աշակերտուհի Սիլիա Կէքա Եղիշէյեան, տիկին Լինա Մինիի քաջալերանքով, մասնակցեցաւ աշակերտական Հռետորական փառատօնին, ուր հմայիչ ներկայութիւն ունեցաւ եւ գովեստի արժանացաւ:
«Լ. եւ Ս. Յակոբեան» վարժարանի Գ.,Դ. եւ Զ. դասարաններու աշակերտները մասնակցեցան իրենց ուսուցչուհիներուն առաջնորդութեամբ, աշակերտական ձեռնարկի մը, որ կազմակերպուեցաւ նախակրթարանի խորհրդատուին կողմէ «Նախակրթանի մէջ գեղագիտական դաստիարակութեան զարգացումը» խորագրով «Մելինա» մշակութային կեդրոնին մէջ եւ գովեստի արժանացան իրենց տպաւորիչ ներկայացման համար:
Մենք կը շնորհաւորենք մեր վարժարանի բոլոր աշակերտները իրենց բոլոր ջանքերուն ու ձեռք բերած յաջողութիւններուն համար:
«Լ. եւ Ս. Յակոբեան» վարժարանի գօրծունէութեան մասին կրնաք մանրամասնօրէն տեղեկանալ մեր կայքէջին միջոցաւ:
Նաեւ, հանդէսի աւարտին կրնաք վայելել մեր աշակերտներուն գծագրութիւնները ներշնչուած մեծագոյն գեղանկարիչներու գործերէն:
Շնորհակալական խօսք
2025 — 2026 ուսումնական տարեշրջանը բոլորելով մեր ջերմագին շնորհակալութիւնները կը յայտնենք Թեմիս Առաջնորդ Սրբազան հօր՝ Տ.Սահակ եպս. Եմիշեանին եւ շրջանիս հոգեւոր հովիւ Տ. Նարեկ քահանային:
Վարժարանիս բարօրութեան հոգատարներուն՝ Յունահայոց Ազգային վարչութեան, ուսումնական, տնտեսական ու կալուածային խորհուրդներուն, Հ.Կ.Խաչի Շրջանային եւ մասնաճիւղերու վարչութեանց:
Շնորհակալութիւն «Ազատ Օր»-ին եւ «Արմենիքա» պարբերաթերթին, որ իրենց էջերը լայն բացին մեր վարժարաններուն առջեւ:
Շնորհակալութիւն Համազգայինի եւ Հ.Մ.Ը.Մ-ի վարչութեանց:
Շնորհակալութիւն մեր վարժարանի Ծնողական միութեան, որ ամբողջ տարուան ընթացքին մեր կողքին էր ու ամէն ջանք թափեց մեր կարիքները հոգալու: Նաեւ, շնորհակալութիւն մեր մանկապարտէզի ու նախակրթարանի շրջանաւարտներուն յանձնուած նուէրներուն համար:
Շնորհակալութիւն այն բոլոր ծնողներուն ու կրթասէր ազգայիններուն, որոնք նուիրատուութիւններու կամ այլ տեսակի օժանդակութիններու ճամբով թիկունք կանգնեցան մեր դպրոցին, յատկապէս պարոններ Յովհաննէս Թերզեանին ,Կարօ Պարտաքճեանին, Կարօ Ներսէսեանին, Արամ Պէքէրէճեանին եւ Վիգէն Մինասեանին, իրենց մնայուն աջակցութեան համար:
Շնորհակալութիւն պրն. Յարութիւն Հաճեանին եւ Քրիստափոր Խաչերեանին, որոնք մեր գրադարանը օժտեցին սիրուն նստարաններով:
Շնորհակալութիւն պրն Յովհաննէս Գալայճեանին, որ մեր ուսուցչարանը օժտեց սիրուն կարասիներով:
Շնորհակալութիւն պրն. Աւետիս Թովմասեանին, որ ստանցնեց բեմին յարդարումը:
Շնորհակալութիւն Ճէլալեան ընտանիքին, որ նուիրեց մեր դպրոցին Յակոբ Ճէլալեանի գիրքերը, որպէսզի օգտագործուին մեր գրադարանին համար եւ մեր դպրոցի աշակերտներէն:
Շնորհակալութիւն Համազգայինի Պարի միաւորին, որ մեզի տրամադրեց Զ. դասարանի թատերականի տարազները:
Յատուկ շնորհակալութիւններ ձեզի՝ սիրելի ծնողներ, ձեր գործակցութեան համար, ինչպէս նաեւ ձեր ցուցաբերած վստահութեան հայկական մեր այս վարժարանի կատարած առաքելութեան՝ լաւագոյն հայեցի դաստիարակութիւն ջամբելու նորահաս հայ սերունդներուն: Ձեր զաւակներուն յաջողութիւնը նաեւ ձեր նուիրումին վկայութիւնն է։
Շնորհակալութիւն պաշտօնակից տնօրէնուհիներուն: Վարձքը կատար ուսուցչական կազմին՝ մեր մանկապարտէզի եւ նախակրթարանի ուսուցչուհիներուն, տիկիններ Մարիա Տիմաքի եւ Սոնա Գալստեան , նախակրթարանի տիկիններ Ալինա Պարտաքճեան, Մանիա Ճանապեան, Աննա Սաֆարեան, Նազիկ Ճամուզեան, Նանա Լուլուքօղլու, Լինա Մինի, Սթելլա Մոյիսի, Քրիստինա Տելի, Բաւլինա Քելայիտի, Զոի Փափաեոաննիտու, Նաֆսիքա Փափաիլիա, Էքաթերինի Եալերնիու եւ պարոն Եաննի Ցիկունի, որ ճիգ թափեցին ու պատրաստ էին յօժարօրէն բոլոր ստեղծուած մարտահրաւէրները դիմագրաւելու:
Այս ճանապարհին, մեր ուսուցիչներուն նուիրումը, համբերութիւնը եւ մասնագիտական աշխատանքը ամէն օր կեանք կու տան մեր դպրոցին։ Անոնց կը յայտնենք մեր խորին շնորհակալութիւնը։
Շնորհակալութիւն վարժարանի անձնակազմին՝ մեր սիրելի տիկին Անիին, վարորդներուն, պարոններ Յովիկ, Եորղօ, ուղեկցող տիկիններուն` Վերժին, Լուսի, Եաննա, Մերի եւ բոլոր անոնց, որոնք իրենց նիւթական եւ բարոյական աջակցութիւնը ընծայեցին մեր ճիգերու արդիւնաւորման համար:
Մրցանակներ
Զ. դասարանի հայերէնի դասերուն մէջ յատուկ ճիգ թափած աշակերտը Հայ Կապոյտ Խաչի Շրջանային Վարչութեան կողմէ կը պարգեւատրուի Պատանեկան Միութեան ամառնային բանակումին մասնակցութեան մրցանակով: Այս մրցանակին կ’արժանանայ Էվինա Տուքան:
Այս տարի երկրորդ անգամ ըլլալով պարոն Արսէն Գալֆայեան 200 եւրոյով կը պարգեւատրէ մեր վարժարանի աւարտական դասարանէն հայոց լեզուի գերազանց աշակերտը: Այս մրցանակին կ’արժանանայ Մարիա Էկիքեան:
Նաեւ, պարոն Ռուբէն Գալֆայեան 200 եւրոյով կը պարգեւատրէ մեր վարժարանի աւարտական դասարանէն հայոց մշակոյթի գերազանց աշակերտը:
Շատ դժուար որոշում էր, որովհետեւ մեր երեք աշակերտները՝ Էվա Յակոբեան, Տիմիթրիս Քարաֆիլլաքիս եւ Սարգիս Զաֆիրուլիս գերազանց, աշխատասէր եւ փայլուն յառաջդիմութիւն ցուցաբերած են մշակոյթի վերաբերող աշխատանքներուն մէջ: Ուստի բոլորին հանդէպ արդար ըլլալու նպատակով դիմած ենք վիճակահանութեան: Վիճակահանութիւնը կատարուեցաւ ուսուցչական կազմի ներկայութեամբ եւ մրցանակին արժանացաւ Տիմիթրի Քարաֆիլլաքին:
Շնորհակալութիւն մեր նուիրատուներուն եւ շնորհաւորութիւն մեր բոլոր շրջանաւարտներուն իրենց ջանքերուն, յառաջդիմութեան ու յաջողութիւններուն համար:
Հրաժեշտի խօսք
Ամէն տարեվերջ մեզ կը լեցնէ հպարտութեամբ, որովհետեւ կը տեսնենք մեր աշակերտներուն աճը, յառաջդիմութիւնն ու ձեռքբերումները։ Սակայն, շրջանաւարտներու օրը միշտ ունի իր առանձնայատուկ խորհուրդը. ան հրաժեշտի եւ նոր սկիզբի, յիշողութիւններու եւ նոր երազներու խաչմերուկ մըն է։
Սիրելի՛ աշակերտներ,
Երբ առաջին անգամ մուտք գործեցիք այս դպրոց, մեծ երազներով եւ հետաքրքրութեամբ լեցուն մանուկներ էիք։ Այսօր, մեր առջեւ կը տեսնենք հասուն պատանիներ, որոնք պատրաստ են դիմագրաւելու նոր մարտահրաւէրներ եւ կառուցելու իրենց ապագան։
Այս դպրոցը ձեզի փոխանցեց գիտելիք, բայց նաեւ աւելի կարեւոր ժառանգութիւն մը՝ հայ ըլլալու հպարտութիւնը, մայրենի լեզուի սէրը, մեր պատմութեան եւ մշակոյթի գիտակցութիւնը։ Այս արժէքները թող միշտ լուսաւորեն ձեր ճամբան։
Սիրելի շրջանաւարտներ, այս օրը կը նշէ նոր սկիզբ մը։ Դիմեցէ՛ք ապագային հաւատքով, վստահութեամբ եւ նուիրումով։ Հաւատացէ՛ք ձեր ուժերուն, բայց նաեւ երբեք մի՛ մոռնաք այն հիմքը՝ որ այստեղ ստացաք։
Շնորհաւորութիւն կը յայտնեմ, մաղթելով լուսաւոր ուղի, շարունակական զարգացում եւ յաջողութիւն։
Թող ձեր թռիչքը ըլլայ բարձր, բայց երբեք մի՛ մոռնաք ձեր բոյնը։ Թող ձեր գիտելիքը ծառայէ մարդկութեան, իսկ ձեր սիրտը միշտ բաբախէ հայութեան սիրով։
Նախակրթարանի շրջանաւարտները, ձախէն աջ՝
Տղաներ՝ Ստեֆան Թոմպուլեան,Տիմիդրիս Գարաֆիլլաքիս, Խարիլաօս Կարամեցիս, Ժիրայր Շամմէս, Սարգիս Զաֆիրուլիս
Աղջիկներ՝ Էվա Յակոբեան, Էվինա Տուքա, Մարիա Էկիքեան
Մանկապարտէզի շրջանաւարտները, ձախէն աջ՝
Տղաներ՝ Մաքսիմոս Չալիքեան, Ստեֆանոս Պապիքեան
Աղջիկներ՝ Սոֆիա Յակոբեան, Էլենա Սամարա, Իլիա Մարիա Սամարա, Իրինի Թովմասեան, Մարինա Թերեզա Խաչերեան
