Արցախեան գոյամարտի այս օրերուն, համայն հայութիւը մէկ մարդու նման ոտքի կանգնած կը պայքարի իր անժխտելի մարդկային եւ ազգային իրաւունքներու պաշտպանութեան ի խնդիր: Այս առումով, մեր վարժարանի աշակերտները եւ յատկապէս բարձր դասարանները, 28 Սեպտեմբերէն ի վեր հայերէնի եւ հայոց պատմութեան դասապահերուն ընթացքին կը տեղեկանան եւ կը հետեւին Հայրենիքի օրհասական դէպքերուն եւ իրականութեան: Այդ իսկ պատճառով, աշակերտները Արցախի եւ Հայաստանի զինուորներուն նուիրուած իրենց պատի գծագրութիւններէն եւ գրութիւններէն անկախ՝ մասնակցեցան նաեւ Հայաստան համահայկական հիմնադրամի «Բոլորս Արցախի համար. Մենք ենք մեր սահմանները» ֆոնտին, մեծ մասամբ՝ իրենց գանձանակներուն մէջ պահուած գումարներով: Այդ նպատակով, ուսուցչական կազմի վերջին ժողովին ստուգուած՝ աշակերտներուն կողմէ հանքանակուեցաւ 470 եւրոյի գումարը, որ անմիջապէս պիտի փոխանցուի դրամատան պատկան դրամահաշիւին՝ դպրոցի աշակերտութեան անունով:
Տնօրէնութիւն