Հ. Կ. Խաչի ազգային վարժարաններու վերամուտ
Կրթութեան փոխ նախարարը ներկայ եղաւ բացման արարողութեան
Ինչպէս հաղորդած էինք, Երկուշաբթի՝ 13 Սեպտեմբեր 2021-ին, Յունաստանի ամբողջ տարածքին վարժարաններու վերամուտի զանգը հնչեց:
Այսպէս, Հ.Կ.Խաչի «Ա. եւ Ժ. Ճէնազեան» միջնակարգին, Գոքինիոյ «Զաւարեան», Ֆիքսի «Լ. եւ Ս. Յակոբեան» նախակրթարաններուն, ինչպէս նաեւ «Ա. Գալուստեան», «Հ. Ուշագլեան» մանկապարտէզներուն մէջ եւս կատարուեցան վերամուտի արարողութիւններ, հանդիսապետութեամբ Յունահայոց թեմակալ Առաջնորդ Գեղամ արք. Խաչերեանի:
Վարժարաններու բացումը կատարուեցաւ յարգելով նախարարութեան կողմէ ճշդուած համավարակի դէմ նախազգուշական կանոնները:
Գոքինիոյ վարժարանի բացման արարողութեան ներկայ եղաւ Յունաստանի Կրթութեան եւ կրօնից նախարարութեան փոխ նախարար պրն. Անկելոս Սիրիղոս: Սրբազան հօր կողքին, ներկայ էին շրջաններու հոգեւոր հովիւները, Ազգային վարչութեան, Հ.Յ.Դ. Կեդրոնական կոմիտէի ու տեղական կոմիտէներու, Ուսումնական խորհուրդի եւ Հ.Կ.Խաչի ներկայացուցիչները:
Աւանդական ջրօրհնէքի արարողութենէն ետք, նոր տարեշրջանի մեկնարկին առիթով, բարեմաղթութիւններ փոխանցուեցան աշակերտութեան Սրբազան հօր, փոխ նախարար պրն. Սիրիղոսի, Ազգային վարչութեան ատենապետ պրն. Պօղոս Չոլաքեանի եւ վարժարաններու տնօրէնութեանց կողմէ:
Աշակերտութեան փոխանցուեցան ուղղութիւններ նոր տարեշրջանի ուսումնական ընթացքին մասին: Նշենք նաեւ, որ այս տարի եւս «Ազատ Օր» օրաթերթի պատրաստութեամբ, մեր բոլոր աշակերտներուն կը տրամադրուին տարբեր տեսակի գեղատեսիլ տետրակներ հայկական այբուբէնի եւ գոյներու ճոխութեամբ:
Հետաքրքրուողները կրնան դիմել վարժարաններու տնօրէնութեանց, ակումբներուն, ինչպէս նաեւ «Ազատ Օր»ի գրասենեակը: