Թեսաղոնիկէի Համազգայինի «Ղազարոս Սարեան» մասնաճիւղը վերջին մէկ ամսուան մէջ ունեցած է երեք յաջող ձեռնարկներու հրապարակային գործունէութիւն՝ խանդավառութիւն յառաջացնելով նախ իր անդամներուն, ապա նաեւ իր անմիջական շրջանակին շուրջ գտնուող ու իր շարժումներուն հետեւող գաղութի հայութեան։
Առաջինը տեղի ունեցաւ Կիրակի՝ 12 Փետրուարին Թեսաղոնիկէի «Տէր Զաքարեան» սրահէն ներս, ուր ներկայացուեցաւ Յովհաննէս-Սարգիս Աղապատեանի՝ «Հայկական ազգանունները ունին իրենց պատմութիւնը» խորագրով գիրքը։ Գիրքի ներկայացման՝ հոն կը գտնուէր նաեւ Արիստոտէլեան համալսարանի պատուակալ դասախօս փրոֆ. Եաննիս Խասիոթիս։
Գիրքը կ՚անդրադառնայ հայկական ազգանուններու պատմութեան եւ անոնց ծագումին։
Երկրորդ ձեռնարկը տեղի ունեցաւ Կիրակի՝ 19 Մարտին, շրջանի «Տէր Զաքարեան» սրահէն ներս մշակութային հաւաքով մը, որու ընթացքին Հայաստանի մէջ պատրաստուած գեղեցիկ տարազներով՝ ժողովուրդին խանդավառեց միութեան «Մասիս» երկսեռ պարախումբը հայկական աւանդական պարերով։
Երրորդ նախաձեռնութիւնը՝ մասնաճիւղի վարչութեան կողմէ նիւթական ու բարոյական ապահովող վիճակահանութիւն մըն էր, ուր իբրեւ նուէր դրուած էր դէպի հայրենիք ճամբորդութեան երկու տոմսակներ եւ Երեւանի մէջ եօթնօրեայ կեցութեան իրաւունքով երկու ճամբորդներու ծախսի ստանձնումը։ Վիճակահանութիւնը քաշուեցաւ ժողովուրդի ներկայութեան եւ նուէրին տիրացաւ Աթէնքէն բախտաւոր մը։
Սրահին մէջ համախմբուած ներկաներուն յայտարարուեցան նաեւ յառաջիկայ միութենական երկամեայ նստաշրջան՝ 2016-2018ի նոր վարչական կազմը, որ կը բաղկանայ 11 ընկեր-ընկերուհիներէ, որոնք հետեւեալներն են. — Տիրուհի Ղալիլէա-Գալֆայեան, Մարտիկ Մարտիկեան, Սմբատ Վրդ. Սապունճեան, Տիգրան Սարգիսեան, Ռուզաննա Սեմէրճեան, Ռոզա Թէրզեան, Մարի Քիւրքճեան, Արաքսիա Կանապետեան, Ալինա Մաթոսեան, Լիլիթ Շահզատէեան, Մելինէ Քարաօղլանեան։
Վարչութիւնը իր դիւանը կազմած է հետեւեալ ձեւով՝ ընկ. Գալֆայեան (ատենապետ), ընկ. Մարտիկեան (փոխ-ատենապետ), Հայր Սուրբը (ատենադպիր), ընկ. Սարգիսեանը (գանձապահ) եւ մնացեալ եօթը ընկերները վարչական խորհրդական։
Վստահ ենք, որ վարչութիւնն ու մասնաճիւղը անցեալի նման պիտի շարունակեն իրենց բազմաճիւղ հարուստ գործունէութիւնը՝ ընդհանրապէս Յունաստանի տարածքին, բայց մասնաւորաբար Մակեդոնիոյ ու Թեսաղոնիկէի մէջ, հայ մշակոյթի անգնահատելի արժէքները միութեանս ճամբով փոխանցելով ու տարածելով ե՛ւ մեր հասարակութեան, ե՛ւ եղբայրակից հելլէն ժողովուրդին։
Բարի յաջողութիւն բոլոր աշխատանքներուն։
ՀԱՄԱԶԳԱՅԻՆԻ ԹՂԹԱԿԻՑ
