
Տնօրէնուհի Հայկան Մինասեանի խօսքը
2023-24 տարեշրջանի փակման հանդիսութեան ընթացքին (14-6-2024)
Արդիւնաշատ, պտղաբեր տարեշրջան մը բոլորեցինք եւ թէ ինչպէս վերջացաւ, դեռ չենք հասկցած. երբ կ՛աշխատիս, ժամանակը շուտ կ՛անցնի..։
Տարեշրջան մը, որուն ընթացքին մեր դպրոցին մէջ ընդունեցինք հիւրեր, կազմակերպեցինք ելոյթներ, հետաքրքրաշարժ այցելութիւններ կատարեցինք, մասնակցեցանք դպրոցէն դուրս կատարուած տարբեր եղելութիւններու։ Ինչպէս նաեւ, հաւատարիմ մեր ընտրած ուղղիին՝ իրականացուցինք հետաքրքրական, աշակերտակեդրոն նորարար եւ գործնական ծրագիրներ. եւ հոս կ՛ուզեմ շնորհակալութիւնս յայտնել բոլոր ուսուցչական կազմին, որ այս ուղղութեամբ եզակի աշխատանք տարաւ։
Այս տարի ալ, ինչպէս վերջին տարիներուն, գործակցեցանք Գալուստ Կիւլպէնկեան հիմնարկի արեւմտահայերէնի զարգացման բաժանմունքին հետ եւ ընդառաջելով անոր հրաւէրին, մանկապարտէզին ու նախակրթարանին հայ ուսուցիչներս մասնակցեցանք հայկական դպրոցներու համար ստեղծարար ծրագիր-աշխատանոցի մը, որ տեղի ունեցաւ Լիոն 14-20 Ապրիլ։ Ու այս ուղղութեամբ, ուսուցչուհիներ Անի Աբիկեան, Անուշ Ֆենդեան եւ Հայկանուշ Մինասեան, յանձն առած ենք յաջորդող ամիսներուն մնացեալ մասնակցողներուն հետ գործակցաբար, մշակել ստեղծարար, նորարար եւ գործնական ծրագիրներ։
Նշենք թէ սոյն աշխատանոցը շարունակութիւնն էր նախորդ տարեշրջաններուն ընթացքին՝ 2022, Մայիս 22-29, մեր դպրոցին մէջ կայացած, ինչպէս նաեւ Փարիզի Մեսրոպեան-Արապեան դպրոցին մէջ՝ 10-15 Փետրուար 2023, Եւրոպայի հայ ուսուցիչներու հաւաք-աշխատանոցներուն։
Շնորհակալ ենք Գալուստ Կիւլպէնկեան հիմնարկին արեւմտահայերէնի զարգացման բաժանմունքին մեր հանդէպ ցուցաբերած վստահութեան համար։
Դպրոցական կեանք
Արեւմտահայերէնը ապրումի՝ խաղի, ընտելանալու, մտածումի, ստեղծագործութեան, լեզու.
Կարեւոր է երեխային մանկապարտէզէն նախակրթարան փոխանցումը դիւրահոս ըլլայ։ Այս ուղղութեամբ առաջին դասարանին մէջ «արեւ, լուսին, ժապաւէն» գործադրուած ծրագիրը, հեզ ու յաջող շարունակութիւնն է Մանկապարտէզին մէջ կիրարկուած «Բարեւ արեւ» ծրագրին (այդ փաստած է վերջին տարիներու փորձառութիւնը)։
Զարդիս մատենաշար. Գալուստ Կիւլպէնկեան Հիմնարկի Արեւմտահայերէնի զարգացման Բաժանմունքին հետ մեր գործակցութեան որպէս արդիւնք, նախորդ տարեշրջանէն «Զարդիս Մատենաշար»էն ստացած ենք հետաքրքրական մանկավարժական ոճով գրականութեան գիրքեր, որոնք կը զարգացնեն աշակերտներուն երեւակայութիւնը, անոնց զգացական աշխարհը։ Աշակերտները հայերէնով կ՛ապրին, կ՛երեւակայեն, կը ստեղծագործեն եւ կը հարստացնեն իրենց բառապաշարը։ 3րդ դասարանէն մինչեւ 6-րդ դասարան, իւրաքանչիւրը մշակած է իր յատուկ ծրագիրը եւ աշակերտները կը գործածեն այդ գիրքերը։ Ծրագիրին վերջաւորութեան, գրականութեան գիրքերը աշակերտներուն նուէր կը տրուին։
Հոգեբանական աջակցութիւն. Մեծապէս կը գնահատենք իրենց բերած սիրայօժար ու անշահախնդիր ներդրումին ու շնորհակալ ենք տիկիններ՝ Արթեմիս Քիւրտօղլանեանին. ան մեր դպրոցին մէջ կատարեց հոգեբանութեան մասնագիտութեան իր փորձավարժութիւնը։
Տարեշրջանին ընթացքին շաբաթական հերթականութեամբ, մօտէն հետեւեցաւ ու քաջալերեց յարմարակցութեան եւ ընկերականացման հարցեր ունեցող երեխաներու ու անոնց ծնողներուն։
Անի Տէօքմէճեանին՝ իր խորհրդատուական աջակցութեան երբ որ պէտք եղաւ ուսուցչական կազմիս ու ծնողներու, ինչպէս նաեւ աշակերտներու հետ իր գործնաբուժական մասնագիտութեան զօրակցութեան։
Ճատրակ. Վերջին տասնամեակին, Ծնողական միութեան նախաձեռնութեամբ, ամէն Ուրբաթ կէսօրէն ետք, ճատրակի դասեր կը տրուին «Զաւարեան» կեդրոնի 2րդ յարկին մէջ։ Այս տարի, աննախադէպ յաջողութիւն էր «Զաւարեան» ճատրակի խումբին թիւի բարձրացումը 25-ի։ Մեր աշակերտները ուշի ուշով ճատրակի դասերուն հետեւեցան եւ տարեփակին՝ Ուրբաթ 7 Յունիս, ունեցան իրենց ներքին խաղերը։ Շարքով կը դուենք ախոյեանները. առաջին՝ Սեւակ Մինասեան (4-րդ դաս.), երկրորդ՝ Սերոբ Սերոբեան (2-րդ դաս.), երրորդ՝ Ռաֆայէլ Մխիթարեան եւ Նարեկ Արթենեան (3-րդ դաս.)։ Մեծ շնորհակալութիւն մեր սիրելի Ծնողական Միութեան, ինչպէս նաեւ մարզիչին պր. Եանիս Բաբադիմիթրիուին։
Լող. Այս տարին ալ, Զաւարեանի 3-րդ եւ 4-րդ դասարաններուն աշակերտները բ. եռամսեային ընթացքին շաբաթական հերթականութեամբ եւ երկու դասապահի համար մեր դպրոցին մօտակայ լողաւազաններէն մէկուն մէջ իրենց լողի պահերը վայելեցին։ Վերջին դասապահին, աշակերտները անակնկալ մը ըրին լողաւազանի պատասխանատու ուսուցիչներուն եւ իրենց մարզանքի ուսուցչուհիին եւ ինքնափուխ պարեցին իրե՛նց ստեղծած պարագրութեամբ «Մենք ենք մեր սարերը»։
Ազատ Օր. 6-րդ եւ 5-րդ դասարաններուն աշակերտները այցելեցին «Ազատ Օր» օրաթերթին խմբագրատունը։ Անոնք մօտէն ծանօթացան թերթի մը տպագրումին եւ հրատարակման փուլերուն։ Ուշադրութեամբ լսեցին ու լուսաբանական հարցումներ ուղեցին խմբագրական կազմին եւ պաշտօնէութեան՝ Քերոբ Էքիզեանի, Մայք Չիլինկիրեանի ու տիկին Ալիս Յարութիւնեանին, եւ գոհացում ստացան իրենց տուած բացատրութիւններէն։ Իսկ «Նոր Օրէն – Ազատ Օր» 100-ամեակի ելոյթին առիթով, նախակրթարանի բոլոր դասարաններուն աշակերտները անխտիր, մասնակցեցան խմբային ձեռային աշխատանքներով, ինչպէս նաեւ անհատական շնորհագրերով։
Դեսպանութիւն. Ընդառաջեցինք Յունաստանի մօտ Հայաստանի Հանրապետութեան դեսպանին՝ պարոն Տիգրան Մկրտչեանին հրաւէրին եւ մեր աշակերտները մերթ ընդ մերթ՝ ա., բ. եւ գ. դասարաններ եւ ապա դ., ե. եւ զ. դասարանները դեսպանատուն այցելեցին եւ հանդէս եկան երգերով, պարերով եւ արտասանութիւններով։ Սիրելի պարոն դեսպանը բոլորին տուաւ իր բարեմաղթանքներն ու ապա աշակերտները դեսպանութեան ազնիւ անձնակազմին կողմէն հիւրասիրուեցան։
Ներքին դպրոցական ելոյթներ
1.- Արցախի ժողովուրդին զօրակցութիւն. Մանկապարտէզէն մինչեւ աւարտական դասարանի աշակերտները, Սեպտեմբեր 2023-ին աջակցեցան Համազգայինի Կեդրոնական Վարչութեան համասփիւռքեան ծրագիրին եւ զօրակցութեան գծագրութիւններ եւ նամակներ ղրկեցին Արցախի ազատամարտիկներուն։
2.- Սուրբ Յակոբ. Շրջանիս հոգեւոր հովիւ տէր Պարետ քհնյ. Խաչերեան կրօնական տօներուն նախօրեակին այցելեց մեր դպրոցը եւ 5րդ ու 6րդ դասարաններու աշակերտներուն հետ զրուցեց։ Սուրբ Յակոբի տօնին նախօրեակին, 3-րդ եւ 4-րդ դասարաններուն աշակերտները եկեղեցի այցելեցին եւ հոգեւոր հովիւը իրենց խօսեցաւ եկեղեցուոյ պատմութեան մասին եւ գոհացում տուաւ անոնց գետաքրքրութեան։
3.- Խաղ եւ դաս. Խաղը կարեւոր է դասի ընթացքին։ Դասարանները իրենց դասապահերուն ընթացքին, բացի իրենց դասարանէն, օգտագործեցին նաեւ շրջափակը, ինչպէս նաեւ մարզադաշտը զանազան դաստիարակչական խաղերու համար։
4.- ΤΡΕΧΩ ΓΙΑ ΤΟ ΕΥΖΗΝ. մեր մարզանքի ուսուցչուհիին տիկին Էղլի Քալիորային նախաձեռնութեամբ, աշնան, դպրոցին մարզադաշտին մէջ իւրայատուկ եւ եզակի իր յղացման մէջ, սննդականոնի վերաբերեալ դրօշարշաւ կազմակերպուեցաւ։ Մասնակցեցաւ բոլոր աշակերտութիւնը։ Անշուշտ կրնաք հասկնալ որքան մեծ եղաւ անոնց ե՛ւ մեր խանդավառութիւնը։
5.- Տօներ. Հոգեւոր, ինչպէս նաեւ հայկական եւ յունական տօներուն առթիւ, բոլոր դասարաններուն աշակերտները հանդէս եկան իրենց նախաձեռնած աշխատանքներով եւ ներկայացումներով։
6-րդ դասարանին պտոյտները
Այս տարի, մեր աւարտական դասարանը 3 անգամ՝ 2-ական դասապահ տրամադրելով, շրջեցաւ դպրոցին շրջանը ու ճանչցաւ Գոքինիոյ թաղերը եւ տեղեկացաւ տեղւոյն հայ համայնքին հարուստ պատմութեան մինչեւ այսօր։
Ընդառաջեցինք եւ մասնակցեցանք
— Ցեղասպանութեան յիշատակում. Ցեղասպանութեան տխուր տարելիցին առթիւ Կեդրոնական ձեռնարկին որ տեղի ունեցաւ Աթէնքի Երաժշտասրահին մէջ (ΩΔΕΙΟ ΑΘΗΝΩΝ), Կիրակի, 21 Ապրիլ 2024-ին, մեր նախակրթարանի բոլոր աշակերտները հանդէս եկան 4 հայկական եւ 1 յունական երգերով։ Օտար հանրութեան ցոյց տուինք թէ կանք եւ վերապրող սերունդները պիտի շարունակեն պայքարիլ հայ ժողովուրդին իրաւունքներուն համար։ Կը գնահատենք բոլոր ծնողներուն օգնութիւնը։ Շնորհակալ ենք։
— Գոքինիոյ Հ.Մ.Ը.Մ.-ի վարչութեան դիմումին եւ քաջալերեցինք մեր աշակերտներուն մասնակցին վոլէյ պոլին հետ ծանօթացման 2024 Յունիս ամսուան ընթացքին յետմիջօրէի ամենօրեայ մարզախաղերուն։
— Աթէնքի Հ.Մ.Ը.Մ.-ի վարչութեան դիմումին եւ քաջալերեցինք մեր աշակերտներուն մասնակցին Յունիսի առաջին շաբաթավերջին կողովագնդակի մինի-մրցախաղերուն։
Այցելութիւններ
1.- Ինչպէս ամէն տարի, այս տարի ալ իւրաքանչիւր դասարան ամսական հերթականութեամբ, դասարանին մէջ նախապէս ծրագրուած եւ մշակուած, դաստիարակչական այցելութիւններ տուաւ զանազան վայրեր՝ Յունաստանի հին եւ նոր խորհրդարանի շէնքերը, STEM/ռոպոթիքի (յատուկ ծրագիրներ), Հին շուկայ, գրադարաններ, զանազան թանգարաններ՝ Աթէնքի Ազգային հնաբանական, Աքրոբոլիսի հնաբանական թանգարան, հեռախօսութեան, ռազմական, նաւային, եւայլն, որոնք ընդհանրապէս կապուած են իրենց դասանիւթերուն հետ՝ Հմտութեան աշխատանոց (Εργαστήριο Δεξιοτήτων), Պատմութիւն, Գրականութիւն, Մթնոլորտ եւ բնապահպանում, լեզու/ընթերցասիրութիւն….։
2.- Հայերէնը կենդանի լեզու տնօրէնութիւնս եւ հայ ուսուցչական կազմս կը հաւատայ թէ հայեցի կրթութեան գլխաւոր ազդակն է հայերէնը դառնայ մեր երեխաներուն առօրեան արտայայտող լեզուն. այս ուղղութեամբ հարատեւ եւ ծրագրուած աշխատանքը կարեւոր է։
ԻԱ. դարուն մէջն ենք, դժբախտաբար բոլորս նկատած ենք թէ գրաւոր ու բանաւոր լեզուն նահանջի մէջ են։ Սակայն չենք վհատիր։ Այս ուղղութեամբ գործակցելով Գալուստ Կիւլպէնկեան հիմնարկին հետ, մեր դպրոցին բոլոր դասարանները տարին երկու անգամ (որքան օրէնքը կը թոյլատրէ նոյն տարուան ընթացքին նոյն վայրը այցելել, անկապ մեծարուած ծրագրին) կ՛այցելեն ΚΗΠΟ ΤΗΣ ΚΑΛΜΗΣ – ΜΙΚΡΟ ΒΟΥΝΟ վայրը։ Միակ վայրն է ուր բոլոր ծրագիրները կը կատարուին հայերէնով, աշակերտներուն կենդանի մասնակցութեամբ։ Հոն իւրաքանչիւր դասարան կը հետեւի իրեն յարմար ծրագիրի մը, յատուկ նիւթով որ կապ ունի բնութեան հետ, երեխային առօրեային հետ՝ սերմանում, ծաղկում, քաղում, գաղթող թռչուններ, թռչուններու բոյներու շինութիւն, թռուցիկ պատրաստել ու թռցնել, ընտանի կենդանիներ կերակրել, եւայլն։ Քիչ մը հեռու է վայրը, սակայն աշակերտներուն գոհունակութիւնը տեսնելով, ինչպէս նաեւ ծնողներուն գոհունակութեան արտայայտութիւները լսելով, մենք ալ աւելի կը քաջալերուինք։
3.- Մօտիկ բերել եւ ծանօթացնել իրարու Հ.Կ.Խ.ի դպրոցներուն աշակերտները Հաւատարիմ նպատակին՝ մօտիկ բերել եւ ծանօթացնել իրարու Հ.Կ.Խ.ի երկու նախակրթարաններուն եւ միջնակարգին աշակերտները, ինչպէս ամէն տարի, այս տարին ալ աւարտական դասարանը այցելեց Լ. եւ Ս. Յակոբեան նախակրթարանը, ուր մօտէն ծանօթացաւ այդ դրպոցին իր դասընկերներուն հետ, ինչպէս նաեւ ծանօթացաւ «Ճենազեան» միջնակարգին միջավայրին, դասարաններուն եւ աշակերտներուն։
Մեր դպրոցը այցելեցին
1.- Ամանորի եւ Սուրբ Ծննդեան տօներուն առթիւ, Ծնողական միութեան անդամուհիները կարկանդակներով եւ նուէրներով այցելեցին մեր դպրոցը, ու աշակերտներուն եւ ուսուցիչներուն փոխանցեցին իրենց բարեմաղթանքերը։
2.- Ուսումնական Խորհուրդին նախաձեռնութեամբ, տարեշրջանի սկիզբին, մեր դպրոցը այցելեց պատմաբան տիկին Գոհար Գանտահարեան։ Ան Հ.Կ.խաչի երկու նախակրթարաններու ուսուցիչներուն ներկայութեամբ, մեր դպրոցին 6-րդ դասարանին երկու դասապահի ընթացքին ներկայացուց հայոց պատմութեան դասանիւթէն Վարդանանց պատերազմը։
3.- Սփիւռքի հայկական երկրորդական վարժարաններու տնօրէններ, ինչպէս նաեւ հայ հրատարակչատան տուներու պատասխանատուներ։
Նաեւ մեր դպրոցը այցելեցին եւ հետաքրքրական զրոյցներ ունեցանք իրենց հետ՝
— Հայաստանէն պատմաբաններ պարոններ Խաչատուր Ստեփանեան եւ Էտկար Յովհաննէսեան
— Εταιρία Φιλων Αρχαιολογικού Μουσείου Αθηνών
— Σύνδεσμος Συριανών Αθηνών-Πειραιώς
— Σύλλογος Ειρήνης Νικαιας
— ΕΚΠΑ / Καποδιστριακό համալսարանէն խումբ մը ուսանողներ իրենց դասախօսներուն հետ — «Մոնումենթա» ծրագիրին ծիրէն ներս, ճարտարապետ տիկին Մաթինա Մալիքութի
Մեր վարժարանի այս տարուան գործունէութիւններուն ցուցակը բաւական երկար է. կրնաք յաւելեալ տեղեկանալ այցելելով մեր վարժարանին կայքէջը՝ https://dim-kyan-stavr-nikaias.att.sch.gr/
Մեր շնորհակալական խօսքը կ՛ուղղենք՝
— Թեմիս առաջնորդ Սրբազան Հօր Գեղամ Արք. Խաչերեանին, շրջանիս Ս.Յակոբ եկեղեցւոյ հոգեւոր հովիւ հայր Պարէտ Խաչէրեանին ու Թաղային եւ Տիկնաց մարմիններուն։
— Հ.Հ. Յունաստանի մօտ յարգելի դեսպանին, պարոն Տիգրան Մկրտչեանին, ինչպէս նաեւ դեսպանութեան անձնակազմին։
— Վարժարանին բարօրութեան հոգատար՝ Ազգային վարչութեան, Ուսումնական, Տնտեսական եւ Կալուածային խորհուրդներուն։
— Հայ Կապոյտ Խաչի Շրջանային եւ քոյր մասնաճիւղերուն վարչութիւններուն։
— Բիրէայի Տարրական Կրթութեան Գրասենեակին տՆօրէնուհի տիկին Մէյտասիին եւ պաշտօնակիցներուն։
— Շրջանիս Դաստիարակչական Աշխատանքներու խորհդատու պր. Ախիլէաս Միթիլիսին։
— Նիքէայի Ուսուցիչներուն միութեան։
— Նիքէա-Ռենտի քաղաքապետութեան։
Յատուկ շնորհակալան խօսք՝
— Գալուստ Կիւլպէնկեան հիմնարկի հայկական բաժնին տնօրէնութեան եւ վարիչ պատասխանատուին, իրենց կրթական, բարոյական, նիւթական զօրակցութեան, ինչպէս նաեւ ցոյց տուած վստահութեան համար։
— Ամերիկայի Յունահայերուն միութեան՝ բարոյական եւ նիւթական շարունակ աջակցութեան համար.
— Վարժարանիս Ծնողական միութեան Վարչութեան սիրելի ծնողներուն՝ Դանիկ Քէօսէյեան-Եորղանճեան, Մարալ Ասատրեան-Զօլամեան, Ալիս Տէրարթինեան, Ազնիւ Մովսէսեան, Մարի Աճէմեան, Հռիփսիմէ Կարապետեան. տարեշրջանին ընթացքին ճիգ չխնայեց դպրոցին զանազան կարիքները հոգալ։ Ծնողականը ամէն տարի կը կազմակերպէ գիրերու ցուցավաճառք եւ գիտակից հայ գիրքին կարեւորութեան՝ հերթաբար ցուցահանդէսը կը հարստացնէ հետաքրքրական հայկական մանկապատանեկան գիրքերով, որոնք իսկապէս ծնողներուն եւ աշակերտներուն կողմէն կը յափշտակուին։ Նաեւ, կը հոգայ մեր աւարտականներուն յիշատակի նուէրները։ Նաեւ կը շարունակէ ճատրակի դասերը շաբաթական հերթականութեամբ։
Շնորհակալութիւն՝
— Սան պահող բարերար Տիկին Պերճուհի Ունճեանին։ Ամէն տարի 500 եւրոյի կրթաթօշակով կը պարգեւատրէ հայկական դասանիւթերուն մէջ բացառիկ ճիգ թափող եւ գերազանց արդիւնքներ ձեռքբերող աշակերտ մը։
— Արամ եւ Իոաննա Գասարճեաներ եւ պարոն Հայկ Աճէմեան նուիրատուներուն։ Եւ մեր բոլոր բարեկամներուն, որոնք թիկունք կը կանգնին մեր սիրելի «Զաւարեան» վարժարանին ու կը հոգան անոր բազմատեսակ կարիքներուն։
— Հ.Կ.Խաչի «Սօսէ» մասնաճիւղին շատ սիրելի ընկերուհիներուն, որոնք մշտապէս բարոյապէս եւ երբ կարիքը զգացուի նիւթապէս, նեցուկ կը կանգին մեր աշխատանքներուն։
— «Ազատ Օր» օրաթերթի ու «Արմենիքա» պարբերաթերթի խմբագրութեանց, «Զաւարեան» կեդրոնի խորհուրդին:
Մրցանակներ
Ամէն տարի Հ.Կ.Խաչի Շրջ. վարչութիւնը աւարտական դասարանէն տարեշրջանի ընթացքին, հայերէն լեզուի մէջ գերազանց արդիւնք բերող աշակերտին կը պարգեւատրէ Պատանեկան Միութեան ամառուան բանակումի մասնակցութեան մրցանակով։
Մեր դպրոցի շրջանաւարտներէն պարոն հայկ Աճէմեան, 100 եւրոյի մրցանակով կը պարգեւատրէ մեր վարժարանի աւարտական դասարանէն հայոց պատմութեան գերազանց աշակերտը։
Դժուար է զանազանել, մանաւանդ երբ դասարան մըն է որուն 15 աշակերտներն ալ հայերէնի դասանիւթերուն ընթացքին՝ լեզու, հայոց պատմութիւն, աշխարհագրութիւն եւ գրականութիւն, բացառիկ հետաքրքրութիւն եւ խանդավառութիւն ցուցաբերեցին։ Չափազանցութիւն չէ երբ ըսեմ թէ դասապահերը իրե՛նք վարեցին, ուր անշուշտ՝ ստեղծագործեցին։ Հ.Կ.Խաչի Շրջ. վարչութեան մրցանակին կ՛արժանանայ Վանեսա Մուրատեան, իսկ հայոց պատմութեան մրցանակին՝ Կիրակոս Մկրտիչեան։
Վարձքը կատար՝
Մեր սիրելի աշակերնտերուն, որոնք տարեշրջանի ընթացքին բացի իրենց ամենօրեայ պարտականութիւններէն, գուրգուրացին իրենց վարժարանին վրայ:
Մանկապարտէզի ու նախակրթարանի բոլոր ուսուցիչներուն, որոնց հասկացողութեան եւ անկեղծ գործակցութեան շնորհիւ, մեր վարժարանը կը զարգանայ, կը բարգաւաճի կիրթ մթնոլորտի, անկեղծ, ջերմ ու հաղորդական միջավայրի մէջ։ Մասնաւորաբար հայ ուսուցչական կազմին, որ ամէն ջանք կը թափէ, որպէսզի մեր աշակերտները ապրումով ճանչնան մեր հեքեաթները, աւանդութիւնները, հայոց պատմութիւնը, մեր հարուստ մշակոյթն ու գրականութիւնը։ Այսպէս՝ կը կազմեն հա՛յօրէն ապրող, ստեղծող ինքնավստահ հայ անհատներ։
Մասնաւոր շնորհակալութիւն՝
Դպրոցի մատակարար, տիկին Կարինէ Խաչատրեանին, դպրոցական ինքնաշարժներու վարորդներուն՝ Նորա Յակոբեան եւ Նիքօ Ծավարա, ուղեկցող տիկիններուն՝ Լուիզա Աւագեան եւ Սուզաննա Պօղոսեան։
Ձեզի, շատ սիրելի ծնողներ, որ մեզի կը վստահիք ձեր զաւակները, ձեր աչքի լոյսերը։ Դուք՝ անկեղծ գիտակից հայկական դպրոցին առաքելութեան, համեստօրէն կը շարունակէք անոր նեցուկ կանգնիլ։ Շնորհակալութիւն։
Վկայականներու փաշխման չանցած, սրտիս խօսքը կ՛ուղղեմ մեր այս տարուան 15 շրջանաւարտներուն։
Սիրելի աշակերտներս,
Աշխատունակ, փնտռուող, հետաքրքիր ու աշխուժ՝ կայտառ ու խանդավառ, դասարան մը եղաք։ 15 աշակերտներ, սակայն իւրաքանչիւրդ իր ձիրքերով ու բացառիկ կարողութիւններով։
Պատրաստ որեւէ մարտահրաւէրի։
Ձեր սէրը դպրոցին հանդէպ արտայայտեցիք իւրայատուկ առաջարկներով եւ եզակի աշխատանքներով, հետաքրքրուեցաք մեր ժողովուրդին պատմութեամբ եւ մանաւանդ մեր համայնքին պատմութեամբ։ Մարդկային ընկերութեան մէջ արժէքներու կարեւորութեան գաղափարը մշակեցիք եւ ընկալեցիք ձեր մատղաշ հոգիներուն մէջ։ Իւրաքանչիւր պահ ձեր հետը, ինծի համար յայտնութիւն մըն էր, իսկ բոլորիս համար՝ ստեղծագործութեան պահ մը։ Վստահ եմ թէ ուր որ ալ պիտի շարունակէք ձեր ուսումը, հոն ալ պիտի ծաղկիք ու աւելիով պիտի զարգացնէք ձեր տաղանդները։ Ապրի՛ք, հազա՛ր ապրիք ու բարի շարունակութիւն ունենաք…. եւ դուք ծնողներ, հերերնին տեսնէք։