Կիրակի, 1 Դեկտեմբեր 2024-ին Հայ Կապոյտ Խաչի Երիտասարդ անդամներու Յանձնախումբի հրաւէրով եւ կազմակերպութեամբ, տեղի ունեցաւ այցելութիւն մը՝ Փիրղոս Վասիլիս բերդը ու պտոյտ մը անոր այգիներուն մէջ, պատմական ներկայացումով, ապա նաեւ՝ հոն արտադրուած գինիներու համտես:
Ձեռնարկը գեղեցիկ առիթ մը եղաւ որ, մասնակցողները հաճելի եւ ընկերային մթնոլորտի մէջ Կիրակի կէսօր մը վայելեն բարեկամներով, նաեւ միջոց մը որ զուարճութեան զուգահեռ՝ բարեսիրական նպատակի համար նուիրաբերեն:
Յանձնախումբին կողմէ ընկ. Լոռի Աւագեան շնորհակալութիւն յայտնեց բոլոր անոնց, որոնք սիրով ընդառաջեցին յանձնախումբի հրաւէրին եւ կատարուած նուիրատուութիւններուն համար:
Յանձնախումբի որոշումով, այս նախաձեռնութենէն գոյացած կոկիկ հասոյթը կը տրամադրուի Հ.Օ.Մ.ի որբախնամ ծրագրին, մէկ տարուայ (2024-ին համար) խնամակալութիւն մը ստանձնելու, 2020-ի Արցախի պատերազմին ծնողազուրկ դարձած եւ մինչեւ օրս խնամակալ չունեցող հայորդիի մը:
Վերոնշեալ յանձնախումբը նշանակուած է Հ.Կ.Խ.ի Շրջանային Վարչութեան կողմէ եւ կը գործէ անոր հովանաւորութեան տակ:
Անոր պարտականութիւն տրուած է, որ ձեւեր մտածէ եւ միջոցառումներ ձեռնարկէ՝ միջին եւ երիտասարդ տարիքի սերունդը մօտեցնելու համար մեր միութեան շուրջ:
Թղթակից
