Հայաստանի Հանրապետութեան վերանկախացման 28րդ տարեդարձին առիթով, Աթէնքի «Գ. Լազեան» կոմիտէն կազմակերպեց ժողովրդային խնճոյք-խրախճանք, որ տեղի ունեցաւ Շաբաթ՝ 28 Սեպտեմբերին, Գարէայի «Ազատամարտ» ակումբին մէջ։
Երեկոյի բացումը կատարեց ընկ. Զարեհ Բարդամեան, որ բարի գալուստ մաղթեց ներկաներուն եւ անդրադարձաւ անկախութեան խորհուրդին։ Ապա բեմ հրաւիրեց ընկ. Սեւակ Գազարեանին փոխանցելու օրուան խօսքը։ Ան, ի միջի այլոց յայտնեց.- «28 տարիներ առաջ, 21 Սեպտեմբեր 1991ին, Հայաստանի քաղաքացիները պատմական որոշում մը առին: Ընտրական իրաւունք ունեցող բնակչութեան շուրջ 95 տոկոսը մասնակցեցաւ, իսկ աւելի քան 99 տոկոսը «ԱՅՈ» ըսաւ անկախ եւ ինքնավար պետութեան մը ստեղծումին:
Այս 28 տարիներուն ընթացքին, Հայաստան ունեցած է բազմաթիւ նուաճումներ: Ամենամեծ նուաճումը՝ նոյնինքն անկախ պետականութեան հռչակումն էր: Մեծագոյն միւս նուաճումը՝ արցախեան յաղթանակն էր, որ իրականացաւ Արցախի, Հայաստանի եւ սփիւռքի միասնական ջանքերով:
28 տարիներ առաջ, ես չէի ծնած. նոյնպէս Երիտասարդական միութեան անդամներուն մեծամասնութիւնը: Բայց անցնող ամառ մենք որոշեցինք հայրենք այցելել. մեր ազատ եւ անկախ հայրենիքը: Մենք շատ բախտաւոր կը զգանք, նկատի ունենալով, որ երբ այս սրահին մէջ գտնուող ընկերներու մեծամասնութիւնը Երիտասարդական միութեան անդամներ էիք, անկախ Հայաստան գոյութիւն չունէր:
Մենք այսօր կը հրճուինք ու կը տօնենք անկախ պետականութեան հռչակումը, չենք մոռնար սակայն Արարատը, Վանն ու Անին: Չենք մոռնար արեւմտեան Հայաստանը: Ճիգ չենք խնայեր եւ կ՚աշխատինք այդ ուղղութեամբ, որ օր մը կարենանք տօնել նաեւ Միացեալ Հայաստանի Հանրապետութեան հռչակումը»:
Խնճոյքի ընթացքին ներկաները երգեցին ազգային հայրենասիրական երգեր եւ եղան սրտաբուխ բաժակաճառեր, տօնական մթնոլորտի խանդավառութեան մէջ։ Տեղի ունեցաւ վիճակահանութիւն եւ 3 բախտաւորներ շահեցան Հայաստանի Հանրապետութեան ոսկի զինանշաններ:
ՆԵՐԿԱՅ ՄԸ
