«Լոյս ի լուսոյ ի Հօրէ առաքեցար եւ մարմնացար ի սուրբ կուսէն,
զի վերստին նորոգեսցես զապականեալ ադամ»
«Լոյսէն Լոյս` Հօրմէ ղրկուեցար եւ Սուրբ Կոյսէն մարմնացար,
որպէսզի ապականած Ադամը վերստին նորոգես»
Շարական
Ազգային առաջնորդարանէն բիւր օրհնութեամբ եւ Աստուածորդիի ծննդեան աւետիսի խնդակցութեամբ կ՚ողջունենք Յունաստանի մեր սիրելի հաւատաւոր ժողովուրդը։
Փառք եւ գոհութիւն կը յայտնենք լոյս Աստուծոյ, որ այս տարի Ամանորի եւ Ս. Ծննդեան տօնական օրերը որպէս նորընտիր Առաջնորդ Յունաստանի Հայոց թեմի կը դիմաւորենք մեր թեմի զաւակներուն հետ։
Կ՚ողջունենք Յունաստանի Հայոց թեմի հոգեւորականաց դասը, Ազգային օրէնսդիր եւ գործադիր մարմինները, Թաղական խորհուրդները եւ Հոգաբարձուները, Տիկնանց մարմնոյ անդամները, եկեղեցւոյս սպասաւոր` սարկաւագները, դպիրները եւ դպրաց դասի անդամները, ինչպէս նաեւ մեր գործակից միութիւնները։
Մեր Տիրոջ Յիսուս Քրիստոսի ծնունդը Աստուծոյ եւ մարդուն միջեւ նոր յարաբերութիւն եւ մտերմութիւն ստեղծեց, մեզ հրաւիրեց լուսաւորուիլ միտքով եւ հոգիով։
Լոյսի որդիներ
Աստուած իր մարդեղացմամաբ նոր լուսաւորութիւն բերաւ մեզ։ Քրիստոս կ՚ըսէ «ես եմ լոյսը աշխարհի» (Յով. 8:12) եւ առաքեալը կը յիշեցնէ «դուք բոլորդ լոյսի որդիներ էք»։ (Ա. Թս. 5:5) Յիսուս մանուկի ծնունդը ոչ միայն աւետեց Աստուծոյ հրաշափառ մարդեղացումը, այլ նաեւ մեր մարդկային բնութեան լոյսով ճաճանչումը։
Լոյսը կեանք է, ուժ է։ Ինչպէս որ, արեգակը իր լոյսով կեանք կու տայ բնութեան նոյնպէս ալ Աստուծոյ ներկայութեամբ մեր միտքն ու հոգին կը կենսաւորուին, կը լուսաւորուին։
Մարդկային ընկերութիւնը փոխանակ իր գերարագ զարգացումները եւ համաշխարհայնացման հակումները օգտագործէ Լոյսին երթալու, Ճշմարիտը ճանչնալու, հետզհետէ կը հեռանայ ճշմարիտ լոյսէն։ Քրիստոսի սա խօսքը «Լոյսը աշխարհ եկաւ, բայց մարդիկ խաւարը լոյսէն աւելի սիրեցին» (Յով. 3:19) այսօր եւս հարազատութեամբ կը հնչէ:
Յիսուս մանկան ծնունդը մեզ դարձեալ կը յիշեցնէ լոյսի որդիներ ըլլալու օրհնութիւնը եւ կը հրաւիրէ ոչ միայն լուսաւորուիլ, այլ նաեւ լուսաւորել մեր շրջապատը, եւ այդ լոյսը սիրով կը ճառագայթէ։
Յաճախ կը լսենք սիրոյ մասին, անոր կարեւորութեան մասին, բարոյական արժէքի մասին, եւ շատ յաճախ կը մոռնանք, թէ սէրը սոսկ զգացում չէ այլ ընկերային կեանքի հիմնական սիւներէն մէկը։
— Սիրել պէտք է նշանակէ համբերել։ Այսօրուան ընկերային կեանքի վազքը ներթափանցուած է մեր հաւատքի եւ մարդկային յարաբերութիւններուն մէջ, երեւութապէս շատ պարզ իրավիճակներու մէջ նոյնիսկ չենք հանդուրժեր իրար։ Առաքեալը կ՚ըսէ «միշտ համբերատար եղէք եւ ձեր սէրը ցոյց տուէք` հանդուրժելով իրարու»։ (Եփ. 4:2) Հետեւաբար, սիրել չի նշանակեր լոկ իւրայատուկ զգացումներով լեցուիլ այլ նաեւ՝ հանդուրժողութեամբ եւ համբերութեամբ ապրիլ բոլորին հանդէպ, մարմնաւորելով սէրը կեանքին մէջ։ Առաքեալը եւս մեզ կը յիշեցնէ ըսելով, «սէր ունեցողը համբերատար կ՚ըլլայ»: (Ա. Կրթ. 13:4)
— Սիրել պէտք է նշանակէ ընդունիլ մեր նմանը։ Մեր կեանքի մեծագոյն պայքարը եղած է ոչ թէ սիրոյ պակասը, այլ իր շատ պարզութեան մէջ ընդունիլ մեր դիմացինը իր սխալներով, իր դժուարութիւններով, իր թերութիւններով կամ առաւելութիւններով։ Յովհաննէս աւետարանի շնացող կնոջ մասին պատմող դրուակին մէջ, ուր ժողովուրդը շնութեան մէջ բռնուած կինը կ՚ուզէ քարկոծել, Յիսուս կ՚ըսէ «Ձեր մէջէն անմեղը թող ի՛նք առաջին քարը նետէ անոր վրայ»։ Յիսուս մանուկ, որ բոլորիս մեղքերուն համար մարդացաւ դարձեալ կ՚ըսէ. ձեր մէջէն թող անմեղը քարը նետէ։ Մարդկային ընկերութիւնը դասակարգերու կը բաժնէ մարդիկ՝ հարուստներ եւ աղքատներ, պաշտօնաւորներ եւ պարզ աշխատողներ, ուսեալներ եւ արհեստաւորներ եւ այսպէս շարունակ, սակայն այս տարբերութիւններուն մէջ մարդը չի դադրիր մարդ ըլլալէ: Քրիստոս տարբերութիւն չի դրաւ մարդոց միջեւ, ընդունեց մարդոց այնպէս ինչպէս որ էին եւ հրաւիրեց կատարեալին: Ճշմարիտ սէրը դիմացինը ընդունելու համարձակութեամբ կ՚արտայայտուի:
— Սիրել պէտք է նշանակէ հասկնալ դիմացինը։ Բոլորս միշտ հետամուտ եղած ենք շատ արագ դատել մեր դիմացինը։ Որքանո՞վ արդար է երբ մարդիկ կը դատեն մեզ առանց հասկնալ փորձելու եւ հիմնաւոր պատճառներու։ Քրիստոս կ՚ըսէ, «Ինչ որ կ՚ուզէք, որ մարդիկ ընեն ձեզի, նոյնը ըրէք դուք անոնց»։ (Մթ. 7:12) Սիրոյ վեհ գաղափարները եւ զգացումները կ՚արտայայտուին եւ կը զարգանան դիմացինը հասկնալու ջանքերով։ Իւրաքանչիւր ընտանիք եւ կամ ընկերային կեանք չի կրնար սիրով լեցուիլ եթէ բացակայի իրարու հանտէպ փոխադարձ հասկացողութեան ոգին։ Հետեւաբար, սիրոյ հիմնական սիւներէն մէկը հասկնալն է, ճանչնալն է դիմացինը։
Հետեւաբար, Քրիստոսի Սուրբ ծնունդը կը հրաւիրէ Աստուածային լոյսով ճշմարիտ սէրը գործնականօրէն կեանքի կոչել։ Ինչպէս Աստուած, Յովհանէս աւետարանիչի վկայութեամբ, «ա՛յնքան սիրեց աշխարհը, որ մինչեւ իսկ իր միածին Որդին տուաւ», եւ այս սիրոյ որպէս օրինակ Քրիստոս կը յորդորէ մեզ ըսելով «Սիրեցէ՛ք իրար։ Ինչպէս ես ձեզ սիրեցի` դուք ալ իրար սիրեցէք։ Ձեր իրար սիրելով է, որ մարդիկ պիտի գիտնան, թէ դուք իմ աշակերտներս էք»։ (Յով. 13:35) Քրիստոս Աստուածային համբերութեամբ սիրեց մեզ, ընդունեց մեզ այնպէս ինչպէս որ կանք եւ հասկնալով իւրաքաչիւրիս հոգեվիճակը, զգացումները եւ դժուարութիւնները իր մարդեղացմամբ օրհնեց մեզ։ Հետեւաբար, Սուրբ ծննդեան ուրախութիւնը կ՚արժեւորուի լուսաւոր միտքի եւ սիրոյ ճշմարիտ արտայայտութեամբ։
Արդարեւ, Յիսուս Քրիստոսի աստղազարդ ծնունդը մեր դիմաց կը բանայ լայն հորիզոններ արժեւորելու մեզի յանձնուած օրհնութիւնները, ինչպէս նաեւ կը հրաւիրէ հաւատքի վահանով եւ յոյսի համբերութեամբ կոփուիլ կեանքի մարտահրաւէրներուն դիմաց։
Մեր հոգեթով աղօթքն է առ Աստուած, որ իր Միածնի օրհնութեամբ ծաղկին Յունաստանի թեմի մեր բոլոր կառոյցները, պարուրէ մեր շատ սիրելի ժողովուրդը, իւրաքանիւր ընտանիք լեցնէ խինդով եւ աստուածային լուսաւորութեամբ։ Եւ վերջապէս՝ մեր աղօթքն է, որ մանուկ Յիսուսի խաղաղութիւնը տարածուի մեր հայրենիքի երկնակամարին վրայ։
Իմ թանկագին ժողովուրդ՝ Սուրբ Ծննդեան եւ Ամանորի տօնական ոգիով կ՚ողջունեմ ձեզ եւ արծարծ զգացումներով կ՚աւետեմ,
Քրիստոս Ծնաւ եւ Յայտնեցաւ
Ձեզի մեզի մեծ Աւետիս
Աղօթարար,
ՍԱՀԱԿ Ծ. ՎՐԴ. ԵՄԻՇԵԱՆ
Առաջնորդ Յունաստանի
Հայոց Թեմի
