Սրբազան հայրը այցելեց Քալամարիայի մետրոպոլիտին
Հինգշաբթի, 23 Նոյեմբեր 2023-ին ժամը 11:00-ին թեմիս բարեջան Առաջնորդ Գերշ. Տ. Գեղամ Ս. Արք. Խաչերեանը Թեսաղոնիկէի Ս. Աստուածածին եկեղեցւոյ հոգեւոր հովիւին եւ Թաղական խորհուրդի ատենապետին ընհերակցութեամբ այցելեց Թեսաղոնիկէի Քալամարիա շրջանի մետրոպոլիտին։
Մետրոպոլիտը ողջունեց Սրբազան հօր ներկայութիւնը եւ իր ուրախութիւնը յայտնեց, որ իւրաքանչիւր այցելութեան Թեսաղոնիկէ, կը յիշէ եւ կ՚այցելէ զինք։
Հանդիպման ընթացքին երկու հոգեւորականները զրուցեցին Թեսաղոնիկէի հայ համայնքին եւ եկեղեցական հարցերու վերաբերող նիւթերու մասին։ Զրոյցի ընթացքին մետրոպոլիտը յայտնեց, որ Թեսաղոնիկէի հայ համայնքին հետ շատ ջերմ եւ եղբայրական յարաբերութիւններ ունի։
Աւարտին, Սրբազան հայրը շնորհակալութիւն յայտնեց ջերմ ընդունելութեան եւ նկատի ունենալով, որ տօնական օրերը կը մօտենան, հայկական խմիչքներ եւ անուշներ նուիրեց մետրոպոլիտին։
Աղօրհնէք եւ աւանդական սիրոյ ճաշ
Ուրբաթ, 24 Նոյեմբեր 2023-ին, ժամը 13:00-ի,ն Թեսաղոնիկէի Ս. Աստուածածին եկեղեցւոյ հոգեւոր հովիւ հայր սուրբը կատարեց աղօրհնէք, որպէսզի Տիկնանց մարմնի անդամուհիները սկսին մատաղի պատրաստութեան։
Նոյն օրը, ժամը 15:00-ին, մատաղօրհնէքին առիթով Տիկնանց մարմնի անդամուհիները տարիներ շարունակ սովորութիւն դարձուցած սիրոյ սեղանը սարքեցին։
Ճաշին ներկայ գտնուեցան թեմիս բարեջան Առաջնորդ Գերշ. Տ. Գեղամ Ս. արք. Խաչերեան, որ նաեւ օրհնեց սեղանը, թեմիս Առաջնորդական փոխանորդ Գերպ. Տ. Յովհաննէս Ծ. վրդ. Սաղտըճեանը, եկեղեցւոյս հոգեւոր հովիւը, Թաղական խորհուրդի եւ դպրաց դասի անդամները։
Ճաշին ընթացքին, հոգշ. հայր սուրբը բոլորին անունով բարի գալուստ մաղթեց Առաջնորդ Սրբազան հօր եւ զինք հրաւիրեց, որպէսզի սրտի խօսքը փոխանցէ ներկամերուն։ Ան իր խօսքին մէջ նախ ուրախութիւն յայտնեց, որ ներկայ գտնուեցաւ սոյն ճաշին եւ ապա բարձրօրէն գնահատեց Տիկնանց մարմինի անդամուհիները ու անոնց մաղթեց ուժ եւ կարողութիւն։ Սրբազան հայրը իր գնահատանքը յայտնեց նաեւ Թաղական խորհուրդին, որ միշտ նեցուկ կը կանգնի Տիկնանց մարմինի ծրագիրներուն։ Իր խօսքի աւարտին, շնորհակալութիւն յայտնեց իրենց սարքած սիրոյ սեղանին համար։
Այցելութիւն «Մալաքեան-Գասպարեան» վարժարան
Շաբաթ, 25 Նոյեմբեր 2023-ին առաւօտեան ժամը 10:00-ին, Սրբազան հայրը հանդիպում ունեցաւ Թեսաղոնիկէի «Մալաքեան-Գասպարեան« շաբաթօրեայ դպրոցի 5-րդ եւ 6-րդ դասարաններու աշակերտներուն հետ։ Հանդիպման ընթացքին Սրբազան հայրը խօսեցաւ մատաղի մասին: Ապա աշակերտներուն հետ այցելեցին մատաղի պատրաստութեան վայրը, ուր աշակերտները աւելի մօտէն հետեւեցան անոր պատրաստութեան։
Սրբազան հայրը հանդիպում ունեցաւ նաեւ ուսուցչաց կազմին հետ։ Հանդիպումին՝ ուսուցիչները ներկայացուցին իրենց տարուայ ծրագիրը։ Աւարտին, Սրբազան հայրը բարձրօրէն գնահատեց տնօրէնուհիին եւ ուսուցչաց կազմին՝ իրենց կամաւոր ծառայութեան համար։
Ս. Աստուածածին եկեղեցւոյ 120-ամեակին նուիրուած ճաշկերոյթ
Շաբաթ, 25 Նոյեմբեր 2023-ին, երեկոյեան ժամը 08:30-ին, Թեսաղոնիկէի Ս. Աստուածածին եկեղեցւոյ կից գտնուող «Տէր-Զաքարեան» սրահէն ներս, Թաղական խորհուրդը կազմակերպած էր ճաշկերոյթ մը՝ եկեղեցւոյ 120-ամեակին առիթով։
Ներկայ էին թեմիս բարեջան Առաջնորդ Գերշ. Տ. Գեղամ Ս. արք. Խաչերեանը, Առաջնորդական փոխանորդ հայր սուրբը, շրջանիս հոգեւոր հովիւը, Յունաստանի մէջ Հ.Հ. պատուարժան հիւպատոսը, Թեսաղոնիկէի մէջ Հ.Հ պատուոյ հիւպատոսը, թեսաղոնիկահայ միութեանց ներկայացուցիչներ եւ բարեկամներ։
Ճաշկերոյթը սկիզբ առաւ Սրբազան հօր աղօթքով, որմէ ետք բացման խօսքով հանդէս եկաւ շրջանիս հոգեւոր հովիւը, որ բարի գալուստ մաղթեց բոլորին եւ ուրախութիւնը յայտնեց Սրբազան հօր ներկայութեան համար։ Իր խօսքէն ետք, հայր սուրբը հրաւիրեց Թաղական խորհուրդին ատենապետը, որպէսզի իր սիրտի խօսքը փոխանցէ ներկաներուն։ Յետոյ, հայր սուրբը ընթերցեց Թաղական խորհուրդին միամեայ տեղեկագիրը։
Ճաշկերոյթի ընթացքին, տեղի ունեցաւ գեղարուեստական յայտագիր, որ կ՚ընդգրկէր հայկական պարեր, Թեսաղոնիկէի Համազգայինի «Մասիս» պարախումբի հինգ անդամուհիներու կատարողութեամբ, նուագ՝ արական սեռի անդամներու կատարողութեամբ։
Աւարտին, հայր սուրբը Առաջնորդ սրբազան հայրը հրաւիրեց, որպէսզի իր հայրական խօսքը ուղղէ ներկաներուն։
Սրբազան հայրը իր խօսքին մէջ անդրադարձաւ եկեղեցւոյ միութիւնները աշխուժ եւ գործօն պահելու անհրաժեշտութեան մասին։ Իսկ եկեղեցւոյ 120-ամեակին առիթով, Թաղական խորհուրդին առաջարկով, ան պարգեւատրեց Տիկնանց մարմինի ատենապետուհի՝ Տիկ. Վերգին Աւետիսեանը, որ տարիներ շարունակ նուիրումով ծառայած է եւ կը շարուանակէ ծառայել մեր եկեղեցւոյ մէջ։ Սրբազան հայրը նաեւ պարգեւատրեց պրն. Սեպուհ Սահաթճեանը, որ երկար տարիներ Թաղական խորհուրդին աջակցած է եւ բոլոր իրաւաբանական հարցերով զբաղած։
Այս առիթով, Սրբազան հայրը, Ն.Ս.Օ.Տ.Տ. Արամ Ա. Վեհափառ հայրապետին յատուկ արտօնութեամբ, հոգշ. հայր սուրբին լանջախաչ կրելու իրաւունքը տուաւ, միայն Թեսաղոնիկէէն ներս պետական եւ եկեղեցական պաշտօնական առիթներուն կրելու համար զայն։
Եպիսկոպոսական Ս. Պատարագ եւ մատաղօրհնէք
Կիրակի, 26 Նոյեմբեր 2023-ին, առաւօտեան ժամը 10:30-ին, Թեսաղոնիկէի Ս. Աստուածածին եկեղեցւոյ մէջ մատուցուեցաւ եպիսկոպոսական Ս. Պատարագ եւ տեղի ունեցաւ մատաղօրհնէք։
Ս. Պատարագը մատուցեց եւ մատաղօրհնէքին նախագահեց թեմիս բարեջան Առաջնորդ Գերշ. Տ. Գեղամ Ս. արք. Խաչերեանը։ Անոր սպասարկեցին Թեմիս Առաջնորդական փոխանորդ Գերպ. Հայր սուրբը եւ եկեղեցւոյ հոգեւոր հովիւը։ Խորանի սպասարկութիւնը կատարեցին եկեղեցւոյս սարկաւագները, իսկ երգեցողութիւնը՝ Գոմոթինիի Ս. Գրիգոր Լուսաւորիչ եկեղեցւոյ դպրաց դասը, ղեկավարութեամբ շրջանի հոգեւոր հովիւ Արժ. Տ. Դանիէլ քհնյ. Գալօղլեանի։
Եկեղեցւոյ 120-ամեակին առիթով, Առաջնորդ Սրբազան հայրը քարոզի պահուն անդրադարձաւ եկեղեցւոյ կարեւորութեան մասին եւ յայտնեց, թէ անցնող 120 տարիներուն, այս եկեղեցւոյ ճամբէն բազմաթիւ սերունդներ անցած են, որոնց նուիրումին եւ ծառայութեանց շնորհիւ, այս եկեղեցին կանգուն մնացած է, գործած եւ պիտի շարունակէ գործել, ծառայութեան ջահը փոխանցելով նոր սերունդին։
Ս. Պատարագի աւարտին, տեղի ունեցաւ մատաղօրհնէք եւ հոգեհանգստեան պաշտօն՝ Յունաստանի թեմի նախկին Առաջնորդ, հոգելոյս Տ. Սահակ Ս. արք. Այվազեանի եւ եկեղեցւոյ բոլոր բարերարներուն եւ սպասաւորներուն հոգիներուն համար։
Ս. Պատարագէն ետք, եկեղեցւոյ բակին մէջ, Համազգայինի փոքրիկներու «Կիլիկիա» պարախումբը ներկայացուց երեք հայկական պարեր, որմէ ետք, «Տէր-Զաքարեան» սրահին մէջ, Թաղական Խորհուրդին կազմակերպութեամբ, տեղի ունեցաւ պաշտօնական ճաշ՝ Առաջնորդ Սրբազան հօր նախագահութեամբ եւ միութեանց անդամ-անդամուհիներուն ներկայութեամբ։
ԹՂԹԱԿԻՑ
