Կիրակի, 8 Դեկտեմբեր 2024-ին, Գոքինիոյ Ս. Յակոբ եկեղեցւոյ Թաղային խորհուրդի ու Տիկնանց մարմնոյ կազմակերպութեամբ, փառաւոր կերպով տօնակատարուեցաւ եկեղեցւոյ անուանակոչութեան տօնը։
Մեր մեծ Սուրբին անունով օծուած եկեղեցւոյ զաւակներուն համար, որոնք այդտեղ իսկ մկրտուած ու դրոշմուած են, հաւատքի ու հպարտանքի օր մըն է այդ տօնական թուականը։
Ուրբաթ, 6 Դեկտեմբեր 2024-ի կէսօրէ ետք ժամը 2։00ին, եկեղեցւոյ հոգեւոր հովիւ Տ. Պարէտ քհնյ. Խաչերեան օրհնեց տօնի մատաղի աղը։ Ապա Տիկնանց մարմնոյ անդամները եւ հաւատացեալ տիկիններ, լծուեցան մատաղի պատրաստութեան երկօրեայ աշխատանքներուն։
Տօնի նախորդող շաբաթներուն ընթացքին, Տիկնանց մարմինը լծուեցաւ տօնի աւանդական նուիրահաւաքին։ Մեր եկեղեցւոյ ծխականները, ինչպէս միշտ, իրենց հաւատքին կառչած կատարեցին սրտաբուխ իրենց նուէրները։
Կիրակի, 8 Դեկտեմբերի առաւօտեան ժամը 9։15ին, Ս. Յակոբ եկեղեցւոյ մէջ կատարուեցաւ առաւօտեան ժամերգութիւն։ Իսկ ժամը 10։00-ին սկսաւ Ս. պատարագը։
Յունաստանի Հայոց Թեմի Առաջնորդ Գերպ. Տ. Սահակ Ծ. Վրդ. Եմիշեան, ընդառաջելով Թաղային խորհուրդի հրաւէրին մատուցեց Ս. պատարագը։ Արարողութեան քառաձայն երգեցողութիւնը կատարեց մեր եկեղեցւոյ դպրաց դասը, խմբավարութեամբ՝ դպրապետ պրն. Քերոբ Էքիզեանի, իսկ երգեհոնի վրայ տիկ. Լիանա Սարեանի։ Խորանին վրայ սպասարկեցին սարկաւագներ՝ պրնք. Կարապետ Քէօսէեան, Պետրոս Կարապետեան եւ դպիրներ՝ Տիգրան Կարապետեան, Կարէն Էքիզեան եւ Նարեկ Պէքարեան։
Ընդառաջելով Թաղային խորհուրդի յղած հրաւէրներուն, Ս. պատարագին ներկայ գտնուեցան Հ.Հ. դեսպան պրն. Տիգրան Մկրտչեան, Ազգային վարչութեան ատենապետ պրն. Թագւոր Յովակիմեան, Հայ Աւետարանական եկեղեցւոյ համայնքապետ Վերապատուելի Վիգէն Չոլաքեան, երեսփոխան պրն. Տիմիթրիոս Մարքոբուլոս, Նէոս Գոզմոսի Ս. Յովհ. Կարապետ եկեղեցւոյ Թաղային խորհրդոյ ներկայացուցիչը, կառոյցներու ու միութիւններու ներկայացուցիչներ եւ ուխտաւոր ժողովուրդը։ Գոքինիոյ Հ.Մ.Ը.Մ.-ական սկաուտներ, ներկայ գտնուեցան պատւոյ շարքը կազմակերպելու։ Իսկ Հայ Կաթողիկէ եկե-ղեցւոյ համայնքապետ գերպ. Տ. Յովսէփ Ծ. Վրդ. Պէզազեան, տօնին առթիւ նախապէս փոխանցեց իր բարեմաղթութիւնները։
Առաջնորդ հայր սուրբը իր քարոզին մէջ ընդգծեց առաքեալի խօսքը «յոյսով լեցուիլ, նեղութեանց մէջ համբերող ըլլալ ու յարատեւ աղօթել»։ Ան նաեւ շեշտեց յոյսին հետ ընկերակցող աշխատանքը, հեռանկարն ու ծրագիրները։ Յոյսը պէտք չէ ինքնանպատակ ըլլայ, որպէս հաւատացեալ եւ հաւատացեալներու ամբողջութիւն մեր գործերով եւ ծառայութեամբ կեանքի կը կոչենք անմար յոյսը։ Այսպիսով հայր սուրբը հրաւիրեց հաւատացեալ ժողովուրդը Ս. Յակոբի յոյսով լեցուիլ անոր համբերութեամբ զինուիլ եւ սուրբին օրինակով հարատեւ աղօթենք։
Ետքը տեղի ունեցաւ աւանդական մատաղօրհնութիւնը եւ հոգեհանգիստը։ Այս տարի, նկատի ունենալով 1988-ի Սպիտակի ահաւոր երկրաշարժի թուականի զուգադիպութինը, կատարուեցաւ յատուկ յիշատակութիւն։ Արարողութեան աւարտին երգուեցաւ «Կիլիկիա» ոգերգը, ապա Առաջնորդ Հայր Սուրբը օրհնեց հաւատացեալ ժողովուրդը։ Եկեղեցական արարողութեան աւարտին, Թեմակալ Առաջնորդը եկեղեցւոյ գրասենեակէն ներս ընդունեց պաշտօնական անձնաւորութիւններ, ինչպէս նաեւ Ս. Յակոբ եկեղեցւոյ Թաղային խորհուրդին ու Տիկնանց մարմնոյ յատուկ շնորհաւորութիւններն ու բարեմաղթութիւնները։ Այդ միջոցին, Տիկնանց մարմինը յատուկ հիւրասիրութեամբ պատուեց Առաջնորդ Հայր Սուրբն ու հիւրերը։
Ապա եկեղեցւոյ սրահէն ներս, Ս. Յակոբի տօնին առիթով Թաղային խորհուրդն ու Տիկնանց մարմինը կազմակերպեցին պաշտօնական ճաշկերոյթ մը։ Ներկայ էին Յունաստանի Հայոց թեմի Առաջնորդ գերպ. Տ. Սահակ Ծ. Վրդ. Եմիշեան, պրն. Տիգրան Մկրտչեան, պրն. Թագւոր Յովակիմեան, Թաղային խորհուրդի ու Տիկնանց մարմնոյ անդամները, դպրապետը, սարկաւագներն ու դպիրները։
Առաջնորդ Հայր Սուրբը օրհնեց ճաշի սեղանը, որմէ ետք հոգեւոր հովիւ Տ. Պարէտ քհնյ. Խաչերեան, խօսք առնելով մեծապէս գոհունակութիւն յայտնեց թեմակալ Առաջնորդ Հայր Սուրբին օրհնաբեր ներկայութեանը համար։ Ան ներկայացուց Գոքինիոյ Ս. Յակոբ եկեղեցւոյ մեծ ընտանիքի անդամները, որոնք իրենց աշխատանքային, անհատական ու ընտանեկան առօրեայ բազմապիսի զբաղումներուն ու մտահոգութիւններուն կողքին, մեծամեծ նուիրումներով կը ծառայեն նաեւ եկեղեցւոյ։ Անոնք են, որոնք Գոքինիոյ Ս. Յակոբ եկեղեցւոյ դուռը բաց կը պահեն, շարունակելով նախորդող սերունդներու սրբազան առաքելու-թիւնը։ Խօսքի աւարտին, Տ. Պարէտ քահանան յանուն եկեղեցւոյ մեծ ընտանիքին, շնորհակալութիւն յայտնեց Առաջնորդ Հայր Սուրբին, որ ընդառաջելով հրաւէրին, Ս. պատարագը մատուցեց, աւանդական մատաղը օրհնեց ու այդպիսով մասնակից դարձաւ Գոքինիոյ հայութեան ուրախութեան։ Ան շնորհակալութիւն յայտնեց նաեւ Հ.Հ. պրն. դեսպանին ու Ազգային վարչութեան պրն. ատենապետին, իրենց ներկայութեան ու քաջալերանքին համար։
Ետքը խօսք առաւ Հ.Հ. դեսպան պրն. Տիգրան Մկրտչեան։ Ան շնորհակալութիւն յայտնեց Գոքինիոյ Ս. Յակոբ եկեղեցւոյ հոգեւոր հովիւին ու Թաղային խորհուրդին, իրեն յղուած տօնի հրաւէրին համար եւ մաղթեց անոնց քաջառողջութիւն ու յաջողութիւն։ Պրն. դեսպանը իր ուրախութիւնը յայտնեց Յունաստանի Հայոց թեմի նորընտիր Առաջնորդին հետ ծանօթացման ու յարգալիր գործակցութեան համար, մաղթելով անոր ուժ եւ կարողութիւն։
Ապա խօսք առաւ Ազգային Վարչութեան ատենապետ պրն. Թագւոր Յովակիմեան։
Ան յատուկ կերպով անդրադարձաւ, գաղութի հոգեւոր ու ազգային կեանքէն ներս Գոքինիոյ հայութեան բերած կարեւոր ներդրումին մասին։ Աւարտին գնահատելով եկեղեցւոյ հոգեւոր հովիւը, Թաղային խորհուրդն ու Տիկնանց մարմինը, մաղթեց անոնց յաջողութիւն։
Ընտանեկան ջերմ ու քաջալեր մթնոլորտի մէջ ընթացող ճաշկերոյթի աւարտին, Յունաստանի Հայոց թեմի Առաջնորդ գերպ. Տ. Սահակ Ծ. Վրդ. Եմիշեան, խօսք առնելով իր գնահատանքը յայտնեց տօնի կազմակերպչական մեծ ու յաջող աշխատանքներուն համար։ Ան մեծապէս արժեւորեց Ս. Յակոբ եկեղեցւոյ մեծ ընտանիքի նուիրեալ ծառայութիւնը եւ քաջալերեց անոնց, որպէսզի նոյն հաւատքով, ոգիով ու կամքով շարունակեն իրենց առաքելութիւնը ի սպաս Հայ եկեղեցւոյ ու ժողովուրդին։
Խանդավառ ու ոգեւորիչ տօնակատարութեան աւարտին, Առաջնորդ Սրբազան Հայրը գնահատեց Ս. Յակոբ եկեղեցւոյ հոգեւոր հովիւի, Թաղային խորհուրդի ու Տիկնանց մարմնոյ անդամներու եկեղեցանուէր աշխատանքը, մաղթելով անոնց նորանոր յաջողութիւններ։
Թղթակից
