Գոմոթինիի Ս. Գրիգոր Լուսաւորիչ եկեղեցւոյ հիմնադրութեան 190-ամեակը, ինչպէս նաեւ Ս. Յակոբ Մծբնայ հայրապետի տօնախմբութիւնը արժանաւորապէս նշուեցան քաղաքիս համայնքէն ներս, ստեղծելով հոգեւոր վերելքի եւ խանդավառութեան պահեր։
Արդարեւ, Հինգշաբթի, 11 Դեկտեմբերի առաւօտեան ժամը 8։00-ին կատարուեցաւ աղօրհնէք եւ ոչխարներու զենում, որոնցմէ ետք մատաղի պատրաստութիւն՝ Տիկնանց մարմինի եւ Հայ Գթութեան խաչի տեղւոյն մասնաճիւղի անդամուհիներուն եւ հաւատացեալ կիներուն ձեռամբ։
Նոյն օրուան երեկոյեան ժամը 7։30-ին, Գոմոթինիի համայնքի սրահին մէջ տեղի ունեցաւ պաշտօնական հանդիպում Յունաստանի թեմի բարեջան առաջնորդ Հայր սուրբին եւ շրջանի բոլոր միութիւններուն միջեւ։ Արեւելեան Մակեդոնիոյ եւ Թրակիոյ հոգեւոր հովիւը ծանօթացուց ներկաները Հայր սուրբին, ապա առաջնորդը գնահատեց միութիւնները եւ շեշտեց շրջանի ազգային կեանքի աշխուժութիւնը, ընդգծելով նաեւ Յունաստանի հայ գաղութին մէջ համայնքի կարեւոր տեղն ու դերակատարութիւնը։
Յաջորդ օրը, Ուրբաթ կէսօրուան ժամը 12։00-ին, առաջնորդ Հայր սուրբը, շրջանի հոգեւոր հովիւին եւ թաղականութեան ատենապետին հետ, այցելեց Գոմոթինիի մետրոպոլիտը։ Երկուստեք նշուեցան հայ եւ յոյն աւանդական յարաբերութիւնները եւ եղաւ նուէրներու փոխանակում։
Ուրբաթ երեկոյեան ժամը 8:30-ին, եկեղեցւոյս 190-ամեակի նշումի ծիրէն ներս, Գոմոթինիի երաժշտական դպրոցին մէջ տեղի ունեցաւ թատերական ներկայացում յոյն հանրածանօթ դերասան Խրիսթինա Ալեքսանեանի կողմէ, որ ներկայացուց «Անժէլ Գուրթեանի տետրակները» եւ հմայեց ներկայ հանդիսատեսները։ Աւարտին տեղի ունեցաւ պաշտօնական ընթրիք։
Կիրակի, 15 Դեկտեմբերի առաւօտուն, բացառիկ տօնական մթնոլորտ կը տիրէր եկեղեցիէն ներս եւ անոր շրջակայքը։ Մեծ թիւով ժողովուրդ ներկայ եղաւ սրբազան արարողութեան եւ ուխտը վերանորոգեց Ս. Յակոբի խորհուրդով։ Առաւօտեան ժամը 10:00-ին, տեղի ունեցաւ սուրբ եւ անմահ պատարագ՝ որ մատուցեց Յունաստանի հայոց թեմի բարեջան առաջնորդ գերպ. Տ. Սահակ Ծ. վրդ. Եմիշեան, առընթերակայութեամբ շրջանի հոգեւոր հովիւ Տ. Դանիէլ քհնյ. Գալօղլեանի։ Ներկայ էին քաղաքի պետական, զինուորական եւ ոստիկանական մարմինները, Ազգային վարչութեան ատենապետ պ. Թագւոր Յովակիմեան, Թաղային խորհուրդի անդամները, Թրակիոյ շրջանէն թաղականութիւններու եւ միութիւններու ներկայացուցիչներ։
Ներկայ ժողովուրդին ուղած իր քարոզին մէջ, Առաջնորդ Հայր սուրբը շնորհաւորեց եկեղեցւոյ 190-ամեակը եւ ըսաւ, թէ մօտ երկու դար առաջ այս եկեղեցին կարուցուեցաւ մեր հաւատացեալ ժողովուրդին կողմէ եւ մինչեւ օրս ունեցած է տարբեր հոգեւորականներ եւ սպասաւորներ, մեր ժողովուրդի զաւակները դրոշմուած են այս Ս. Եկեղեցւոյ մէջ, մեր սիրելի ժողովուրդի զաւակները պսակուած են անոր խորանին առջեւ, շատ մը հայորդիներ իրենց մահկանացուն կնքած են եւ կատարուած է յուղարկաւորութեան արարողութիւն, նաեւ եկեղեցւոյ կամարներուն տակ հնչած են եկեղեցական արարողութիւններ ու նշուած են եկեղեցւոյ հիմնադրութեան ամեակներ։
Առաջնորդը նաեւ ըսաւ, որ դարեր շարունակ մեր ժողովուրդը նշած է Ս. Յակոբ Մծբնայ հայրապետին տօնը` աւելցնելով, որ ան եղած է Մծբին քաղաքի եպիսկոպոսը, սակայն այն ժամանակուան ժողովուրդը Նոյեան տապանի պատմութեան հանդէպ կասկած ունէր եւ Ս. Յակոբ իր աղօթքով՝ յոյսը Աստուծոյ վրայ դնելով, ստացաւ տապանէն փայտի մասունք մը։
Պատարագի աւարտին կատարուեցաւ մատաղօրհնէք, ինչպէս նաեւ սրբապատկերներու եւ սպասներու օրհնութեան կարգ։
Տօնախմբութեան առիթով, Հայ Գթութեան Խաչի Գոմոթինիի մասնաճիւղի վարչութիւնը կազմակերպեց հայկական ճաշերու եւ իրերու պազար, որուն ընդառաջեց շրջանի ժողովուրդը եւ գնահատեց խաչուհիներու ժրաջան աշխատանքը։
Այնուհետեւ «Փոսիտոնիօ» ճաշարանին մէջ սարքուեցաւ սիրոյ սեղան` նախագահութեամբ Հայր սուրբին եւ ներկայութեամբ յոյն պետական անձնաւորութիւններուն, Թրակիոյ շրջանի ուխտաւորներուն եւ Գոմոթինիի հաւատացեալ ուխտաւորներուն։
Գոմոթինիի միօրեայ վարժարանի աշակերտութիւնը, տիկին Ռուզաննա Զօհրապեանի ղեկավարութեամբ, ներկայացուց հայրենասիրական բանաստեղծութիւններ, ինչպէս նաեւ մշակութային միութեան երիտասարդները հանդէս եկան ազգային պարերով։ Մշակութային միութեան «Նայիրեան Մեղեդի» երգչախումբը ղեկավարութեամբ Տ.Դանիէլ քհնյ. Գալօղլեանի ներկայացուց փունջ մը երգեր։ Աւարտին, առաջնորդ Հայր սուրբը 190-ամեակի առիթով յատուկ գնահատեց կազմակերպիչները, մաղթելով առողջութիւն բոլորին։
ԹՂԹԱԿԻՑ
