Հայ Գթութեան Խաչի «Էրեբունի» մասնաճիւղի Մեսրոպ Մաշտոց միօրեայ հայկական դպրոցը երկար տարիներէ ի վեր կը շարունակէ իր գործունէութիւնը. Այն կը վայելէ հիւսիսային Յունաստանի Գոմոթինի քաղաքի Թաղային Խորհուրդի հովանաւորութիւնը եւ անվերապահ ու յարատեւ աջակցութիւնը։ Դպրոցի գործունէութիւնը կը վարէ ուսուցչուհի Ռուզաննա Զոհրապեան, որ բարձր տրամադրուածութեամբ կը կատարէ իր աշխատանքը։ Արուեստի նուիրուած յատուկ պահերը կը գործադրուին Լիլիան Մատինեանի կողմէ։
Այս ուսումնական տարեշրջանին ընթացքին (2024-2025) դպրոց կը յաճախէ 48 աշակերտ, որոնք բաժնուած են տարիքային չորս տարբեր խումբերու, մինչեւ 6 տարեկան՝ 8 տղաք, մինչեւ 8 տարեկան՝ 10 տղաք, մինչեւ 11 տարեկան՝ 13 տղաք եւ ապա մինչեւ 14 տարեկան՝ 17 տղաք։ Դպրոցը կը գործէ Շաբաթ եւ Կիրակի օրերուն, իսկ վերջին երկու տարիներուն աւելցած է նաեւ Հինգշաբթի օրը, այլ ծրագիրներով, որ յատկացուած են հայ ժողովուրդի մշակոյթի պատմութեան, ներկայի եւ պատմական Հայաստանի աշխարհագրութեան առարկաներուն։
Տարին երկու անգամ բոլոր խումբերը կը գրեն ստուգողական աշխատանք, իսկ դպրոցի տարեշրջանը աւարտելէ առաջ՝ քննութիւն, որը միայն բարձր գնահատական ստանալու արդիւնքէն ետք, կը ստանան իրենց վկայականը, դպրոցի տնօրէնութեան, շրջանի հոգեւոր հովիւի, Թաղային խորհուրդի եւ ուսուցիչի մակագրութեամբ։
Դպրոցի աշակերտները իրենց աշխուժ ներկայութիւնը կը բերեն համայնքային կեանքէն ներս, հանդէս գալով եկեղեցւոյ անուանակոչութեան տօնին, Ամանորի եւ Սուրբ Ծննդեան արարողութիւններուն, Տեառնընդառաջի նշումին, Մայրերու Օրուան, ինչպէս նաեւ Հայկական ցեղասպանութեան տարելիցի ձեռնարկներուն, ու տարբեր այլ միջոցառումներու, միշտ ներկայացնելով գեղեցիկ յայտագրեր օրուայ խորհուրդին հետ կապակցուած։
Դպրոցի սաները կը մասնակցին նաեւ Հայաստանի Հանրապետութեան կողմէ կատարուող նախաձեռնութիւններու, ինչպիսին են օրինակ՝ Փարաջանովի 100-ամեակին նուիրուած յատուկ տեսահոլովակի մը պատրաստութիւնը, որ մշակուելէ եւ պատրաստուելէ ետք ուղարկուեցաւ Հայաստան։
Ամբողջ տարուան ընթացքին, բացի պարտադիր ուսուցման դասերէն, կը կազմակերպուին նաեւ զանազան հետաքրքրական ժամանցներ՝ հայկական խոհանոց, հայ մեծերուն նուիրուած ֆիլմերու ցուցադրութիւն, եւայլն։
Գոմոթինիի վարժարանէն ներս տարուող աշխատանքը իր քաղցր պտուղները կուտայ համայնքային կեանքին, պատրաստելով երիտասարդ հայորդիները ազգային կեանքէն ներս աշխուժ ներկայութիւն ըլլալու համար։
Բոլորին վարձքը կատար։ Յարատեւ աշխատանք կը մաղթենք Գոմոթինիի հայկական վարժարանին։
