ԱՌԱՋՆՈՐԴԱԿԱՆ Ս. ՊԱՏԱՐԱԳ ՀԱՆԴԻՍԱՊԵՏՈՒԹԵԱՄԲ՝
Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ՎԵՀԱՓԱՌ ՀԱՅՐԱՊԵՏԻ
Անհուն ուրախութեամբ կը յայտնենք թեմիս սիրելի ժողովուրդի զաւակներուն, որ Մեծի Տանն Կիլիկիոյ Վեհափառ Հայրապետ Ն.Ս.Օ.Տ.Տ. Արամ Ա. Կաթողիկոս Յունաստանի արտաքին գործոց նախարարութեան պաշտօնական հրաւէրով Աթէնք պիտի ժամանէ: Այս բարեբաստիկ եւ օրհնաբեր այցելութեան առթիւ, Կիրակի՝ 29 Հոկտեմբեր 2017ին առաւօտեան հանդիսաւոր Ս. Եւ Անմահ Պատարագ պիտի մատուցուի Գոքինիոյ Ս. Յակոբ եկեղեցւոյ մէջ։
Պիտի պատարագէ
ԳԵՐԱՇՆՈՐՀ Տ. ԳԵՂԱՄ Ս. ԱՐՔ. ԽԱՉԵՐԵԱՆ
ԱՌԱՋՆՈՐԴ՝ ՅՈՒՆԱՍՏԱՆԻ ՀԱՅՈՑ ԹԵՄԻՆ
Սրբազան արարողութեան պիտի հանդիսապետէ
եւ իր հայրապետական պատգամը փոխանցէ
Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ
ՄԵԾԻ ՏԱՆՆ ԿԻԼԻԿԻՈՅ
Սկիզբ Ս. Պատարագի՝ ժամը 10։00ին։
Ժողովրդային ընդունելութիւն՝ Վեհափառ
Հայրապետին եկեղեցւոյ մուտքին ժամը 10։30ին։
Վեհափառ Հայրապետի պատգամ՝ ժամը 11։00ին։
Ս. Պատարագի երգեցողութիւնը պիտի կատարուի Աթէնքի եկեղեցիներու դպրաց դասերու կողմէ, ղեկավարութեամբ՝ պրն. Մկրտիչ Գրիգորեանի։
Ս. Պատարագի աւարտին ներկայ հաւատացեալ ժողովուրդը եկեղեցւոյ սրահին
մէջ աջահամբոյրով պիտի ստանայ Հովուապետի Աջին հայրական օրհնութիւնը։
Հովուապետ եւ ժողովուրդ հանդիպման այս շնորհաբաշխ եւ օրհնաբեր հանդիպման առթիւ, սրտագին կոչ կ՛ուղղենք մայրաքաղաքիս բոլոր եկեղեցիներու ծխական շրջաններու ժողովուրդին՝ խուռներամ բազմութեամբ ներկայ ըլլալու եւ մասնակցելու Ս. Պատարագին եւ հաղորդուելու Վեհափառ Հայրապետին արի եւ ժողովրդանուէր հովուապետի յորդորալի եւ գօտեպնդիչ պատգամով։
ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ
ՅԱՅՏԱՐԱՐՈՒԹԻՒՆ
Այսու կը տեղեկացնենք Գարէայի եւ շրջակայքի, ինչպէս նաեւ Նէոս Գոզմոս(Ֆիքս)ի եւ շրջակայքի մեր սիրելի ժողովուրդի զաւակներուն թէ Կիրակի՝ 29 Հոկտեմբեր 2017ի առաւօտեան, Գոքինիոյ Ս. Յակոբ եկեղեցւոյ մէջ մատուցուող Ս. Պատարակին մասնակցողներուն փոխադրութիւնը դիւրացնելու նպատակաւ՝ վերոյիշեալ շրջաններու Թաղային Խորհուրդներուն նախաձեռնութեամբ,
պիտի տրամադրուի «բուլման» ինքնաշարժ մը, որ ճամբայ պիտի ելլէ Գարէայի ազգապատկան սրահէն առաւօտեան ճիշդ ժամը 8:45ին, ապա՝ Նէոս Գոզմոս(ֆիքս)էն «ԻՔԱ»ի հրապարակի «Քոսթի» անուշավաճառին դիմացի դպրոցէն՝ առաւօտեան ճիշդ ժամը 9:20ին:
Ծանօթ.- Նէոս Գոզմոս (Ֆիքս)ի Ս. Կարապետ եւ Աթէնքի Ս. Գրիգոր Լուսաւորիչ եկեղեցիները փակ պիտի մնան վերոյիշեալ Կիրակի առաւօտ:
ԹԱՂԱՅԻՆ ԽՈՐՀՈՒՐԴՆԵՐ
