Հրաւէրով Հ.Յ.Դ. Յունաստանի Կեդր. կոմիտէին, Ուրբաթ՝ 17 Դեկտեմբեր 2021-ի երեկոյեան, Յունաստանի մէջ Հայաստանի Հանրապետութեան նորանշանակ դեսպան պ. Տիգրան Մկրտչեան, առիթը ունեցաւ ծանօթանալու յունահայ գաղութին մէջ գործող միութիւններու պատմութեան ու գործունէութեան։ Հանդիպումին, որ տեղի ունեցաւ Գոքինիոյ «Զաւարեան» կեդրոնին մէջ, ներկայ եղան Հ.Կ.Խաչի, Համազգայինի եւ Հ.Մ.Ը.Մ.-ի Շրջանային վարչութիւնները, ինչպէս նաեւ «Ազատ Օր» օրաթերթը։ Երեկոյի բացումը կատարեց Հ.Յ.Դ. Յունաստանի Կ.Կ.-ի ներկայացուցիչ ընկ. Հռիփսիմէ Յարութիւնեան, որ հակիրճ կերպով բացատրեց հանդիպումին նպատակը եւ դեսպանին ներկայացուց միութենական ու կառուցային գործունէութեան շրջագիծը, որ կը գործէ տաասնամեակներէ ի վեր եւ իր մէջ կ՚ամփոփէ կրթական, խնամատարական, բարեսիրական, մշակութային, մարզական, հայ նոր սերունդի կազմաւորման եւ մամուլի բնագաւառները։
Յաջորդաբար, կառոյցներու անունով խօսք առին ընկ. Լիզա Աւագեան, ընկ. Վերժին Կարապետեան, եղբ. Գէորգ Պօղոսեան եւ ընկ. Մայք Չիլինկիրեան, որոնք տուին իւրաքանչիւր կառոյցի մասին պատմական տեղեկութիւններ եւ ապա ծանրացան անոնց գործունէութեան վրայ, նշելով այն կարեւոր կէտերն ու նուաճումները, որոնք կը յատկանշեն իւրաքանչիւր միութեան աշխատանքի ոլորտը։ Ներկայացումի ընթացքին, դեսպանը երախտագիտութեամբ նշեց նաեւ Հայ Օգնութեան Միութեան կողմէ ստացած յատուկ կրթաթոշակը, ընդլայնելու եւ կատարելագործելու համար իր բարձրագոյն ուսումի ծրագիրները։
Իր խօսքը ուղղելով ներկայ վարչականներուն, դեսպանը նշեց թէ յունահայ գաղութը համեմատաբար աւելի փոքր գաղութ մըն է, սակայն իր կազմակերպուածութեամբ եւ գործունէութեամբ յատուկ տեղ կը գրաւէ Սփիւռքի իրականութեան մէջ։ Ան իր ուրախութիւնը յայտնեց, որ գաղութային գործօնները այնքան աշխուժ աշխատանք կը տանին եւ լայնօրէն կը սատարեն հայ-յունական կապերու զարգացման։
Դեսպանը հակիրճ տեղեկութիւններ փոխանցեց նախապէս Պալթեան երկիրներու մէջ իր ունեցած գործունէութեան մասին, ապա անդրադառնալով Յունաստանի մէջ դեսպանութեան ապագայ գործունէութեան, կարեւորութեամբ ընդգծեց մշակութային դիւանագիտութեան անհրաժեշտութիւնը, Յունաստանի քաղաքական իրականութեան հետ շփման մէջ ըլլալու հրամայականը եւ երկու երկիրներու միջեւ յարաբերութիւններու եւ գործակցութեան առաւել հզօրացումը։ Դեսպանը յատուկ նշում կատարեց Հայաստան, Յունաստան եւ Կիպրոս եռակողմ ձեւաչափի բազմաոլորտ գործակցութեան հնարաւորութիւններուն մասին, որոնք նաեւ դեսպանութեան առաջնահերդութիւններու ծիրէն ներս կը գտնուին։
Ներկայացումներու աւարտին, տեղի ունեցան հարցումներ, որոնց հանգամանօրէն պատասխանեց դեսպանը եւ տուաւ յաւելեալ տեղեկութիւններ զանազան ծրագիրներու մասին։
Աւարտին, տեղի ունեցաւ հիւրասիրութիւն, որու ընթացքին նաեւ եղաւ մտերմիկ զրոյց դեսպանին հետ, հայ-յունական ոլորտի հեռանկարներուն եւ հայ կեանքի զարգացումներուն մասին։ Նաեւ, դեսպանը առիթը ունեցաւ այցելելու «Զաւարեան» կեդրոնի զանազան բաժինները եւ իր հիացումը արտայայտեց յունահայ գաղութի կառուցային կարելիութիւններուն ու ծաւալած գործունէութեան մասին։
Հանդիպում Հայ դատի յանձնախումբի եւ
Հ.Յ.Դ. Երիտասարդական միութեան հետ
Չորեքշաբթի՝ 15 Դեկտեմբերի երեկոյեան, Կ.Կ.-ի նստավայրէն ներս, դեսպան Տիգրան Մկրտչեան հանդիպում ունեցաւ Հ.Յ.Դ. Յունաստանի Հայ դատի յանձնախումբի եւ Երիտասարդական միութեան Կեդրոնական վարչութեան հետ։ Հանդիպումին ներկայ էին նաեւ Կեդր. Կոմիտէի անդամներ։
Շինիչ մթնոլորտի մէջ կայացած հանդիպումի ընթացքին, երկու կառոյցները դեսպանին ներկայացուցին իրենց քաղաքական եւ քարոզչական աշխատանքները, յատկապէս Հայ դատի, հայոց ցեղասպանութեան, արցախեան հիմնահարցի եւ հայկական պահանջատիրութեան փորձադաշտին մէջ։
Նշումներ եղան յոյն քաղաքական շրջանակներուն հետ գործակցութեան բաժիններուն, հայ եւ յոյն խորհրդարանական գործակցութեան մէջ գաղութային ներդրումին, երկու երկիրներու խորհրդարաններուն կողմէ Ցեղասպանութիւններու ճանաչման կարեւոր իրագործումներուն, քարոզչական եւ ցուցական լայն աշխատանքնրուն, ինչպէս նաեւ կազմակերպ երիտասարդութեան կողմէ տարուած աշխատանքին մասին, ներքին գաղութային եւ արտաքին յարաբերական ու քաղաքական իր երեսներով։
Դեսպան Տիգրան Մկրտչեան բարձր գնահատեց երկու կաոոյցներու աշխատանքը եւ նշեց համագործակցութեան կարեւորութիւնը հայկական հիմնախնդիրներու յառաջ մղումին առնչութեամբ, թուրքեւատրպէյճանական սադրանքներու առաջքը առնելու կարեւորութեամբ եւ յոյն հասարակական կարծիքը միշտ իրազեկ պահելու անհրաժեշտութեամբ։
Երկուստեք տեղի ունեցան միտքերու փոխանակումներ յառաջիկայ գործունէութեան եւ գործակցութեան հեռանկարով։
