Թագուհի Ղեւոնդեանի յիշատակին
Միհրան Ք.
Նորոգ հանգուցեալ Ղեւոնդեան թագուհին համեստագոյնն էր համեստներու մէջ եւ իր ազնուութեամբ իրեն մրցակից ունէր…իր կողակիցը՝ սիրեցեալ Կարոն, որուն միանալու գնաց ան Շաբաթ, 9 Յունուարին:
Մահուան հրեշտակին գալուստը զգալով, Թագուհի մը միայն պիտի թելադրէր իր զաւկին ու հարազատներուն. «չեմ ուզեր, որ մահուանս մասին օրաթերթին մէջ կամ այլուր մահազդի ծանուցում տրուի, որպէսզի դժուար այս օրերուն եւ յամեցող վարակի պայմաններուն տակ ծանօթներ ու բարեկամներ պարտքի մը ծանրութիւնը չզգան եւ գործ ու զբաղում չթողուն յուղարկաւորութեանս մասնակցելու համար…»:
Ահա սիրեցեալն Թագուհին, մահուան անկողնին մէջն իսկ, ուժասպառ, որեւէ բարիք ընելու անզօր՝ կը մտածէ «բարիք»ի մը մասին, որուն համար հազիւ թէ պիտի բաւէին իր ուժերը…:
Եկեղեցւոյ մէջ, դագաղին դիմաց, սուրբ գրքէն որոշ մէջբերումներ կատարելով գերապայծառը կը փորձէ բառերով բանաձեւել ննջեցեալին եկեղեցասէրի ու մեծհոգութեան բարեմասնութիւնները, երբ սգակիր ներկաները կեանքի մէջ, ի կենդանութեան շատ աւելիին վկաները կը կազմեն եւ վայելած են արդէն այր ու կին՝ Կարօ եւ Թագուհի Ղեւոնդեան ամոլին առաքինութիւնները:
Հոն, խունկով ու աղօթքով եւ շարականներու տխուր մեղեդիով պարուրուած եկեղեցւոյ մթնոլորտին մէջ, մտքիս կու գան հին պատկերներ՝ յիսուն տարիներու խորերէն:
Պէյրութէն գործուղուած եմ եւ հաստատուած Աթէնք՝ տիկնոջս եւ մէկ ու չորս տարեկան երկու փոքր երախաներուս հետ: Դժուար էր բաժանումը բարեկամններէ ու հարազատներէ: Մանաւանդ երախաներուս համար ծանր էր կարօտը իրենց մեծ մայրերուն ու «թանթիկ»ներուն: Յունարէնն ալ անծանօթ էր մեզի, որ ըստ կարիքի կարենայինք յարաբերիլ բժիշկի հետ, շրջապատի հետ…: Շատեր եղան մեզի ապաւէն եւ իրենց ցուցաբերած սիրով մեղմացուցին մեր դժուարութիւնը, կարօտի կսկիծը: Անոնց մէջ եզակի եւ գրեթէ ամէնօրեայ եղաւ հոգածութիւնը սիրեցեալն Թագուհիին, որ իբրեւ գթառատ ու հարազատ մեծ քոյր մը վերաբերեցաւ տիկնոջս եւ իրբեւ խնամոտ մեծ մայր մը՝ երախաներուս հետ:
Նոյն ջերմութիւնը վայելեց նաեւ անձս՝ իր ամուսինէն՝ յաւետ սիրեցեալն Կարոյէն:
Երկուքով նուիրեալներ էին հանրային կեանքին: Նորոգ հանգուցեալը Հ.Օ.Մ.-ի՝ Հայ Կապոյտ Խաչի ճամբով, որուն ծառայած է երկար տարիներ իբրեւ ժրաջան վարչական անդամ: Ինք եւ իրեն սերնդակից հոյլ մը վարչականներ կամաւոր ու սեւ աշխատանքի անսակարկ նուիրուածութիւնը աւանդ ձգեցին յետնորդներուն եւ անոնց օրինակովն է, որ կամաւոր աշխատանքի Հայ Կապոյտ խաչեան աւանդութիւնը կը շարունակուի: Իսկ իր լուսահոգի կողակիցը՝ Կարոն, Հ.Յ.Դ.ի անդամ, մշակութային միջոցառումներուն լիցք կու տար արուեստի տարբեր մարզերու ատակ իր կարողութիւններով, իբրեւ արտասանող, մեներգող, երգչախումբի մասնակից, թատերական ներկայացումներուն մէջ կարեւոր դերակատարութեամբ, «կենդանի պատկեր»ներու յղացումով…: Վարպետ լուսանկարիչ էր եւ նոյնքան վարպետ գեղանկարիչ: Նախախնամութիւնը տնօրինած է, որ կենդանական աշխարհին վիճակուած ըլլայ մահուան մեծ «պատիժ»ը՝ կեանք կոչուած նոյնքան մեծ հրաշքէն վերջ: Ահա թէ ինչու այդ մեծ «պատիժ»էն ետք, մեզի՝ ողջ մնացողներուս կը պահենք անվերադարձ մեկնողի մը բարեմասնութիւններուն յիշատակը միայն, անտեսելով ողջութեանը՝ անոր ունեցած եւ բոլորիս համար ի զօրու հաւանական բացթողումները, թերութիւնները:
Այս մտածումներուս մէջ, մտովի կը պեղեմ աւելի քան յիսուն տարիներու յուշերս եւ չեմ գտներ ոչ մէկ պատահար ու դէպք, որ դագաղին մէջ յաւէտ ննջեցեալը ոեւէ անձ վշտացուցած կամ նոյնիսկ կենցաղային պարզ բամբասանք մը կատարած ըլլայ որեւէ պարագայի: Եւ ես ինծի կ՚ըսեմ.
Եթէ ճիշդ են հրեշտակներու մասին ըսուածները, ապա ուրեմն հրեշտակ մը աւելցաւ երկնքին մէջ:
«Երթաք խաղաղութեա՜մբ…» կը լսեմ գերապայծառին ձայնը:
Հողը թեթեւ…: