Իւրաքանչիւր տարի կ՚ըսենք՝ «յաջորդ տարի այդքան շատ ծրագիրներու եւ գործունէութիւններու պիտի չմասնակցինք», սակայն կարծես ճիշդ հակառակը փափաքած կ՚ըլլանք, եւ ահաւասիկ այս տարեշրջանը հարուստ եղաւ զանազան հետաքրքրական ծրագիրներով։ Այս տարի ալ, ընդունեցինք հիւրեր, կազմակերպեցինք ելոյթներ, մասնակցեցանք դպրոցէն դուրս կատարուած տարբեր եղելութիւններու։
Դպրոցական կեանք
Հայեցի կրթութեան գլխաւոր ազդակն է հայերէնը գործածուի իրբեւ ապրող լեզու։ Ու այդ յաջողելու համար, կարեւոր է հայ երեխան ներգրաւել։ Յարատեւ եւ ծրագրուած աշխատանք կը պահանջուի։
Գործակցութիւն «Գալուստ Կիւլպէնկեան Հիմնարկ»ի Արեւմտահայերէնի զարգացման բաժանմունքին հետ
1. «Զարդիս» մատենաշար. երրորդ տարին ըլլալով, հայերէն լեզուի դասագիրքերուն զուգահեռ, գործածեցինք «Զարդիս» մատենաշարէն ստացած մանկավարժական ոճով հետաքրքրական գրականութեան գիրքերը, որոնք կը զարգացնեն աշակերտներուն երեւակայութիւնը։ Անոնք հայերէնով կ՚ապրին եւ կը հարստացնեն իրենց բառապաշարը։
2.Ֆիլմի աշխատանոց. Զ. դասարանը հետեւեցաւ 15 օրուան համար ստեղծարար ֆիլմի աշխատանոցի եւ ունեցաւ գործուն մասնակցութիւն։ Աշակերտները ստեղծարար ու հնարար յղացումներով պատրաստեցին ֆիլմը։
Գրադարան. դպրոցին փոխառական գրադարանը օժտուած է քառալեզու (հայերէն, յունարէն, անգլերէն, ֆրանսերէն) մանկապատանեկան գիրքերով։ Շարունակ կը ճոխացուի նոր գիրքերով։ Յատկապէս զարկ կը տրուի հայերէն գիրքերուն։
Դպրոցին առօրեային ընթացքին յատուկ ժամ կը տրամադրուի փոխառական գրադարանին համար եւ ուրախ ենք, որ գիրքերը չեն զարդարեր գրադարանը, այլ շարունակ կը գործածուին։
Ուիքիփետիա. Արեւմտահայերէնի Ուիքիփետիայի եւ յունական Ուիքիփետիայի գործակցութեան ծիրէն ներս, Զ. դասարանը այցելեց յունական Ուիքիփետիայի երիտասարդական բաժնի պատասխանատուներէն պրն. Ն. Լիքոմիթրոս։ Ան աշակերտներուն ներկայացուց Ուիքիփետիան եւ անոր ընծայած ապահով գործիքները։
Լող. այս տարի ալ, Գ. եւ Դ. դասարաններու աշակերտները 2-րդ եռամսեայի ընթացքին շաբաթական հերթականութեամբ եւ երկու դասապահի համար մեր դպրոցին մօտակայ լողաւազաններէն մէկուն մէջ վայելեցին իրենց լողի պահերը։
Վոլէյ եւ ճատրակ
— Գոքինիոյ Հ.Մ.Ը.Մ.-ի առաջարկին ընդառաջելով, դպրոցի Դ., Ե. եւ Զ. դասարաններու աշակերտներուն մեծամասնութիւնը տարեշրջանի ընթացքին, ամէն Երկուշաբթի եւ Չորեքշաբթի, դպրոցէն արձակումէն ետք հետեւեցաւ «μετά το σχόλασμα» վոլէյի մարզական ծրագիրին։
— Վերջին տասնըհինգամեակին, Ծնողական միութեան նախաձեռնութեամբ, ամէն Ուրբաթ ճատրակի դասեր կը տրուին «Զաւարեան» կեդրոնի 2-րդ յարկին մէջ։
Երաժշտութեան աշխատանոց. այս տարեշրջանէն սկսեալ, շաբաթական հերթականութեամբ կը գործէ դպրոցին «Երաժշտութեան աշխատանոց»ը (Μουσική Ακαδημία), որուն պատասխանատուն է, երաժշտագէտ, յօրինող եւ միջազգային ճանաչումի արժանացած պրն. Միհրան Չալըքեան։
Ներքին ու արտաքին դպրոցական ելոյթներ
1. Շրջանիս հոգեւոր հովիւ Տ. Պարէտ քհնյ. Խաչերեան, կրօնական տօներուն նախօրեակին այցելեց դպրոցը եւ զրուցեց Ե. ու Զ. դասարաններու աշակերտներուն հետ։
2. Յունաստանի Հայ Կապոյտ Խաչի 100-ամեակի հանդիսութիւն
Հպարտութեամբ ընդառաջեցինք եւ մաս կազմեցինք Հ.Կ.Խաչի 100-ամեակին առթիւ կազմակերպուած տօնահանդէսին։ Ե. եւ Զ. դասարաններուն աշակերտները մաս կազմեցին Հ.Կ.Խաչի երեք դպրոցներու բարձր դասարաններէն կազմուած երգչախումբին, խմբավարութեամբ պրն.Միհրան Չալըգեանի։
3. Դեսպանութիւն. ընդառաջեցինք Յունաստանի մէջ Հայաստանի Հանրապետութեան դեսպանին, պարոն Տիգրան Մկրտչեանի հրաւէրին եւ մեր աշակերտները մերթ ընդ մերթ՝ Ա., Բ. եւ Գ. եւ ապա Դ., Ե. եւ Զ., դեսպանատուն այցելեցին եւ հանդէս եկան երգերով, պարերով ու արտասանութիւններով։ Սիրելի պարոն դեսպանը բոլորին տուաւ իր բարեմաղթանքներն ու ապա աշակերտները հիւրասիրուեցան։
4. Լութրաքին պատմութեան խաչմերուկին՝ վկայութիւններ եւ յիշողութիւններ, 1922 «Μνήμες 1922 – Το Λουτράκι στο σταυροδρόμι της ιστορίας: τα ορφανά αρμενόπουλα στο Λουτράκι».
Չորեքշաբթի, 29 Յունուար, 2025, Լութրաքիի «Ալեքսատրիօ» դահլիճին մէջ (Αλεξάνδρειο Συνεδριακό Κέντρο) տեղի ունեցաւ իւրայատուկ իր յղացումով աշակերտական ձեռնարկ մը «Լութրաքին պատմութեան խաչմերուկին՝ վկայութիւններ եւ յիշողութիւններ, 1922» նիւթով։ Ելոյթին մեր դպրոցին Դ., Ե. եւ Զ. դասարաններուն սաները հանդէս եկան երգերով ու նուագներով, պարերով եւ պատկերացումներով։ Աշակերտական յայտագիրի աւարտին, դպրոցի տնօրէն պրն. Սիղրիմիս, յաջորդաբար բեմ հրաւիրեց օրուան բանախօս, պատմաբան տիկին Էլեֆթերիա հանդէս եկան։ Ձեռնարկին ներկայ էին Յունահայոց թեմի Ազգային վարչութեան ատենապետը, Հայ դատի յանձնախումբին ներկայացուցիչը, Գոքինիոյ Հ.Կ.Խաչի «Սօսէ» մասնաճիւղի ընկերուհիներ, ինչպէս նաեւ Կորնթոսի եւ Լութրաքիի Յունաց ուղղափառ եկեղեցուոյ Առաջնորդն եւ հոգեւորականներ, երեսփոխաներ, քաղաքապետեր եւ փոխքաղաքապետեր։
5. Ծառատնկում
Մասնակցեցանք Հայոց ցեղասպանութեան 110-ամեակի յիշատակումին առիթով կազմակերպուած ծառատնկումին, որ իրագործեց Հայ դատի յանձնախումբը, Իմիթոս լերան վրայ։
6. Հայկական որբանոցները Յունաստանի եւ յատկապէս Ատիկէի / Կորնթոսի մէջ
Ուրբաթ, 2 Մայիս 2025-ին, մեր դպրոցը այցելեցին Աթէնքի Ամերիկեան վարժարանի Պատմական արխիւներու բաժինին (Ιστορικό Αρχείο Αμερικανικής Σχολής — Γεννάδειος Βιβλιοθήκη) տնօրէնուհի տիկին Էլեֆթերիա Դալեզիու եւ Պոլսոյ «Օզիէկին» Համալսարանի պատմաբան-հետազօտող տիկ. Մերիհ Էրոլ։ Անոնք դպրոցի Գ., Դ., Ե. եւ Զ. դասարաններու աշակերտներուն ներկայացուցին՝ փաստացի աղբիւրներու վրայ յենուելով, հայ եւ յոյն որբերու ժամանումը Յունաստան եւ անոնց հաստատումը որբանոցներուն մէջ, ինչպէս նաեւ «Զաւարեան» դպրոցի առաջին տարիներու պատմութիւնը եւ ունեցած կարեւոր դերը Գոքինիոյ եւ շրջակայքի հայ համայնքին մէջ։ Ապա յաջորդեց զրոյց աշակերտներուն հետ։
7. Այցելութիւն Լ. եւ Ս.Յակոբեան նախակրթարան եւ «Ճենազեան» միջնակարգ.
Հաւատարիմ նպատակին՝ մօտիկ բերել եւ ծանօթացնել իրարու Հ.Կ.Խ.-ի երկու նախակրթարաններուն եւ միջնակարգի աշակերտները, աւարտական դասարանը այցելեց Լ. եւ Ս. Յակոբեան նախակրթարանը, ուր մօտէն ծանօթացաւ դպրոցին՝ իր դասընկերներուն հետ, ինչպէս նաեւ ծանօթացաւ «Ճենազեան» միջնակարգի միջավայրին, դասարաններուն եւ աշակերտներուն։
Եւրոպայի հայկական վարժարաններու աշակերտներու հետ ծանօթացում
Փարիզի «Արապեան-Մեսրոպեան» վարժարանին Ե. դասարանի աշակերտները, իրենց հինգօրեայ Յունաստան դաստիարակչական այցելութեան առիթով, մէկ օր տրամադրեցին եւ մեր դպրոցը այցելեցին, ծանօթացան «Զաւարեան»-ի իրենց դասընկերներուն եւ միասին հաճելի պահեր անցուցին։
Դաստիարակչական այցելութիւններ
Ինչպէս ամէն տարի, այս տարի ալ ամէն ամիս, իւրաքանչիւր դասարան կը հետեւի արտադպրոցական ծրագրի մը, որ սակայն կապ ունի իր դասարանին մէջ տարած զանազան գործունէութիւններուն հետ։ Այս ուղղութեամբ, իւրաքանչիւր դասարան ամսական հերթականութեամբ դաստիարակչական այցելութիւններ տուաւ՝ Յունաստանի հին եւ նոր խորհրդարանի շէնքը, STEM/ռոպոթիքի յատուկ ծրագիր, Աթէնքի համերգասրահը, գրադարաններ, Տրաբեցոնայի Բնապահպանման կեդրոնը, «Վոթանիքօ պուրակ»ը (Διομήδειος Κήπος), Իմիթոս լերան «Զգացական անտառ»-ը, զանազան թանգարաններ՝ հնաբանական, հեռախօսութեան, ռազմական, նաւային, եւ այլն։ Հայկական եւ յունական պատմութեան դասերուն զուգահեռ, աշակերտները այցելեցին «ΑΡΧΑΙΑ ΑΓΟΡΑ», Աքրոփոլիսին թանգարանը, Քիքլատեան թանգարանը, ինչպէս նաեւ «Κέντρο Ελληνισμού».
Յունաց Սուրբ Նիկողայոս տօն. Նաւաստիներու հովանաւոր Սուրբ Նիկողայոս տօնին առիթով, ընդառաջեցինք Կրթութեան նախարարութեան, Բիրէայի քաղաքապետարանի եւ Յունական նաւարկութեան (ΕΛΛΗΝΙΚΗ ΝΑΥΤΙΛΙΑ) միասնական հրաւէրին ու Գ., Դ., Ե. եւ Զ. դասարաններուն աշակերտները, իրենց ուսուցիչներու ուղեկցութեամբ, այցելեցին «ANEK LINES»ի լիովին վերանորոգուած «Էլեֆթերիոս Վենիզելոս» նաւը եւ շրջայց կատարեցին։ Նաւուն անձնակազմը մեծ ուրախութեամբ եւ ոգեւորութեամբ դիմաւորեց մեզ եւ պտտցուց նաւուն կամուրջին շուրջը, ուր ծանօթացանք նաւարկութեան համար անհրաժեշտ գործիքներուն։
«Իէթոնիա Փիլի» եւ «Լիբազմաթայի համալիր» դաստիարակչական շրջապտոյտ. Հինգշաբթի, Մարտ 13, 2025, դպրոցը այցելեցին Պոլսոյ «Կեդրոնական վարժարան»-ի աշակերտներ, իրենց ուսուցիչներուն ընկերակցութեամբ։ Մեր դպրոցին Զ. դասարանին աշակերտները անոնց ընկերակցեցան «Իէթոնիա Փիլի» եւ «Լիբազմաթայի համալիր» դաստիարակչական շրջապտոյտին։ Հոն, ուր Փոքր Դպրոց վերադարձին յաջորդեց խորովածի ճաշկերոյթ։
Մարզանք եւ մարկավարժութիւն. Հոկտեմբերին, բոլոր աշակերտութիւնը նշեց «Մարզանքի համաշխարհային օր»ը այցելելով Ողիմպիական թանգարանը։ Կայքէջի բնագաւառին մէջ անվտանգ նաւարկութիւն. Ե. եւ Զ. դասարաններուն աշակերտները մասնակցեցին Յունաստանի ոստիկանութեան գլխաւոր շտապի կողմէ կազմակերպուած «Կայքէջի բնագաւառին մէջ անվտանգ նաւարկութիւն» նիւթով առցանց սեմինարին: Աշակերտները ստացան կարեւոր խորհուրդներ իրենց պաշտպանութեան, ինչպես նաեւ՝ եթէ որեւէ հարց եւ կամ անբնական բան/եղելութիւն նկատեն աշխատանք կամ գործողութիւն կատարելու ժամանակ։
Առողջապահական. Մեր դպրոցը, «Բերանի խոռոչի առողջութեան համաշխարհային օր»ուան համար (Παγκόσμια Ημέρα Στοματικής Υγείας) ընդառաջեց Փիրէայի Ատամնաբուժերու միութեան հրաւէրին եւ աշակերտները մասնակցեցան գերազանց նկարներով։ Բոլորին աշխատանքները յատուկ գնահատանքի արժանացան։ Պարգեւատրուեցան եւ ստացան հետաքրքրաշարժ նուէրներ հետեւեալ աշակերտները՝ Փանայոթիս Ցաքիրողլու (Ե.), Էկեան Մարղարիթա (Ե.) եւ Եորղանճեան Վահան (Գ.):
Սնունդի համաշխարհային օր. 16 Հոկտեմբերին նշեցինք «Սնունդի համաշխարհային oրը» (Παγκόσμια Ημέρα Διατροφής)։ Բոլորիս կը յիշեցնէ առողջ եւ կայուն սննդականոնի հետապնդումին կարեւորութիւնը։ Խաղերու ընդմեջէն, աշակերտները յիշեցին սննդային խումբերը եւ սննդակարգի կանոններուն կիրառումը՝ զուգորդուած վարժութիւններու հետ, որոնք աշխուժօրէն կը նպաստեն լաւ առողջութեան պահպանման:
Բնագիտութեան եւ Մաթեմաթիքի մրցոյթներ
Ե. եւ Զ. դասարաններու աշակերտները մասնակցեցան Բնագիտութեան եւ Մաթեմաթիքի մրցոյթներու։ Մասնակցած 21 աշակերտներէն, տասական հոգի ձեռքբերեցին Գերազանց արդիւնք (ΑΡΙΣΤΕΙΑ)։
Անոնց արդիւնքները մեր դպրոցը հրապարակեց մեր կայքէջին վրայ, ինչպէս նաեւ «Ազատ Օր»-ի մէջ։
1. Բնագիտութեան մրցանակները յանձնուեցան 6 Յունիսին, ներկայութեամբ ծնողներու եւ դպրոցի ամբողջ աշակերտութեան։
2. Թուաբանութեան մրցանակները յանձնուեցան այսօր, «Յունաստանի Մաթեմաթիքի ընկերակցութեան» անդամներէն եւ մեր նախկին ուսուցիչ, դասախօս պր. Եանիս Սիուլասին կողմէն։
Դպրոցական հրաժեշտի ելոյթներ
Այս տարի որոշեցինք բաց-ելոյթներով եւ ծնողներու ներկայութեամբ փակել մեր տարեշրջանը։ Այդ ուղղութեամբ՝
1. Երեքշաբթի 27 Մայիս, 2025 — «Մեր հայրենիքը – մեր մշակոյթը» ծրագիր. 28 Մայիսի տօնակատարութեան ընթացքին, «Զաւարեան» կեդրոնի հանդիսասրահին մէջ ցուցադրուեցան բոլոր դասարաններու աշակերտներուն «Մեր հայրենիքը – մեր մշակոյթը» նիւթով զանազան աշխատանքները։ Հիանալի գործերու, աշխատանքներու ականատես եղանք, ու անգամ մը եւս լեցուեցանք պարծանքի զգացումներով։
2. Չորեքշաբթի 4 Յունիս, վերջին երեք դասապահերուն ընթացքին դպրոցի մարզադաշտին մէջ բոլոր աշակերտներուն, ինչպէս նաեւ ներկայ գտնուիլ փափաքող ծնողներու մասնակցութեամբ տեղի ունեցան հետեւեալ ելոյթները.-
2.1. Վոլէյ պոլի ցուցադրութիւն եւ մրցաշարք. Դպրոցիս 4-րդ, 5-րդ եւ 6-րդ դասարաններու աշակերտները, որոնք կը հետեւին Հ.Մ.Ը.Մ.-ի «μετά το σχόλασμα» վոլէյի մարզական ծրագրին, ներկայացուցին «Վոլէյ պոլ»ը. Ապա, բոլոր աշակերտները Հ.Մ.Ը.Մ.-ի վոլէյ պոլի խումբերուն մարզիչին կողմէն հրաւիրուեցան վոլէյի ցանցին շուրջ իրենց փորձերը կատարել։ Խանդավառութիւնը աննկարագրելի էր։
2.2 Ճատրակի ցուցադրութիւն. Մեր դպրոցին ճատրակի խումբը, մարզախաղը ծանօթացուց մնացեալ աշակերտներուն, եւ ճատրակի հսկայ մոմլաթի վրայ զետեղուած համապատասխան քարերով յատուկ ցուցադրութիւն ըրաւ։
6-րդ դասարանին պտոյտները
Այս տարի, մեր աւարտական դասարանը երկու անգամ՝ 2-ական դասապահ տրամադրելով, շրջեցաւ դպրոցին շրջանը ու ճանչցաւ Գոքինիոյ թաղերը եւ տեղեկացաւ տեղւոյն հայ համայնքին պատմութեան մասին մինչեւ այսօր։ Իսկ 13 Յունիսին, Փիրէա պիտի շրջի։
Տօներ
Հոգեւոր՝ Սուրբ Թարգմանիչներ, Վարդանանց, ինչպէս նաեւ հայկական պետական-ազգային եւ յունական ազգային տօներուն առթիւ, բոլոր դասարաններուն աշակերտները հանդէս եկան իրենց նախաձեռնած աշխատանքներով եւ ներկայացումներով։
Տեառնընդառաջ. Հինգշաբթի, 13 Փետրուար 2025-ի երեկոյեան, Գոքինիոյ Ս. Յակոբ եկեղեցուոյ մէջ կատարուեցաւ Տեառնընդառաջի նախատօնակի արարողութիւնը։ Արարողութեան ներկայ էին մեր վարժարանի աշակերտներ, ծնողներ, ուսուցչուհիներ ու հայրենակիցներ։ Աւարտին, եկեղեցւոյ բակին մէջ վառուեցաւ աւանդական խարոյկը։ Աշակերտներն ու ներկաները խանդավառութեամբ մասնակցեցան աւանդական խարոյկահանդէսին երգով, պարով եւ երբ կրակին բոցը սկսաւ ցածնալ, կրակին վրայէն ցատկել սկսան։
Վարդանանց ազգային-կրօնական տօնին առթիւ, աշակերտները Ս.Յակոբ եկեղեցին առաջնորդուեցան եւ Ս.Պատարագին հետեւեցան։ Դ.,Ե. եւ Զ. դասարաններուն աշակերտները մասնակցեցան շարականներու երգեցողութեան։ Յունահայոց թեմի Առաջնորդ Տ. Սահակ եպս.Եմիշեանին ներկայութեան մանկապարտէզի եւ նախակրթարանի աշակերտները ներկայացուցին օրուան պատշաճ յայտագիր։
Մեր դպրոցը այցելեցին
— Երեքշաբթի, 14 Յունուար 2025-ին, Յունաստանի Հայոց թեմի Առաջնորդ Տ. Սահակ եպս. Եմիշեան այցելեց մեր դպրոցը, կատարելու համար Նոր տարուան ու Ս. Ծննդեան տօներու առթիւ տնօրհնէք։ Ս. Յակոբ եկեղեցւոյ հոգեւոր հովիւ Տ. Պարէտ քհնյ. Խաչերեանին հետ դիմաւորեցինք Առաջնորդ Հօր։ Արարողութենէն առաջ, Առաջնորդ Սրբազանը աշակերտներուն տեղեկութիւններ տուաւ տնօրհնէքի աւանդութեան մասին եւ յիշեցուց, որ Մեծի Տանն Կիլիկիոյ Ն.Ս.Օ.Տ.Տ. Արամ Ա. Կաթողիկոս, այս տարին հռչակած է «Աւանդութիւններու վերակենսաւորման տարի»։ Աշակերտները երգեցին «Խորհուրդ մեծ» շարականը ու կաղանդի երգեր, ստանալով Առաջնորդ հօր գնահատանքն ու օրհնութիւնը։
-Ուսումնական Խորհուրդին նախաձեռնութեամբ, տարեշրջանի սկիզբին, մեր դպրոցը այցելեց պատմաբան տիկին Գոհար Գանտահարեան։ Ան ուսուցիչներու ներկայութեամբ, Զ. դասարանի աշակերտներուն 2 դասապահի ընթացքին ներկայացուց Հայոց պատմութեան դասանիւթէն Վարդանանց պատերազմը։
— Ամանորի եւ Ս. Ծննդեան տօներուն առթիւ, Ծնողական միութեան անդամուհիները կարկանդակներով եւ նուէրներով այցելեցին մեր դպրոցը, ու աշակերտներուն եւ ուսուցիչներուն փոխանցեցին իրենց բարեմաղթանքերը։
-Սիրով ընդունեցինք մեր դպրոցին մէջ Պոլսոյ «Կեդրոնական վարժարան»-ի տնօրէնուհիին, ինչպէս նաեւ Արաս հրատարակչատան նախկին տնօրէնին։
Յունաստան իրենց այցելութեան առթիւ, ուրախութեամբ ընդունեցինք եւ հետաքրքրական զրոյցներ ունեցանք իրենց հետ՝
- Պոլսոյ «Եսայեան» վարժարանի փոխ-տնօրէնուհի եւ «Պոլսոյ հայ Ուսուցչաց Հիմնարկին» անդամ տիկին Գարին Գոչ։ Ան դպրոցին նուիրեց նոր հրատարակուած մանկական հեքիաթներ, 2025-ի օրացոյցներ, ինչպէս նաեւ Բ. — Դ. դասարանի աշակերտներու համար թուաբանութեան եւ մանկական երկրաչափութեան նորարար մեթոտաբանութեամբ ուսուցման հայալեզու օժանդակ գիրքեր (հրատարակուած «Հայ Ուսուցչաց Հիմնարկ»-ին կողմէ)։
- Պոլսոյ «Յանկարծ» թատերախումբին անդամները,
-Պոլսոյ «Փարոս» հրատարակչատունէն տիկին Մարալ Ֆուքսին,
— Ինչպէս նաեւ Պոսթընէն, Գերմանիայէն եւ Պոլսէն հայրենակիցներ, որոնք հետաքրքրութիւնը ունէին ճանչնալ Գոքինիոյ «Զաւարեան» դպրոցը։
Ընդառաջեցինք եւ հարցազրոյց տուինք հետեւեալներուն՝
- Փիրէայի «ΖΑΝΝΕΙΟ» երկրորդական դպրոցի պատմութեան դասախօսին, տիկին Քալիոբի Վաթիքիոթիին.
- Պոլսոյ «Օզիէկին» Համալսարանի պատմաբան-հետազօտող տիկ.Մերիհ Էրոլին.
- Քափոտիսթրիաքօ (ΕΚΠΑ) համալսարանի «Թրքական ուսումներ» բաժնի ուսանողներուն եւ իրենց դասախօսին.
Մեր շնորհակալական խօսքը կ՚ուղղենք
Թեմիս առաջնորդ Սրբազան հօր՝ Սահակ արք. Եմիշեանին, շրջանիս Ս. Յակոբ եկեղեցւոյ հոգեւոր հովիւ Տ. Պարէտ քհնյ. Խաչէրեանին ու Թաղային եւ Տիկնանց մարմիններուն։ Հ.Հ. Յունաստանի մօտ յարգելի պարոն դեսպանին։ Վարժարանին բարօրութեան հոգատար՝ Ազգային վարչութեան, Ուսումնական, Տնտեսական եւ Կալուածային խորհուրդներուն, Հայ Կապոյտ Խաչին Շրջանային եւ քոյր մասնաճիւղերուն վարչութիւններուն։
Յատուկ շնորհակալան խօսք՝
— Գալուստ Կիւլպէնկեան հիմնարկի հայկական բաժնին՝ կրթական, բարոյական, նիւթական զօրակցութեան, ինչպէս նաեւ ցոյց տուած վստահութեան համար։
— Ամերիկայի յունահայերու միութեան՝ բարոյական եւ նիւթական շարունակական աջակցութեան համար.
- Վարժարանիս Ծնողական միութեան վարչութեան սիրելի ծնողներուն՝ Դանիկ Քէօսէյեան-Եորղանճեան, Մարալ Ասատրեան-Զուլամեան, Ալիս Տէրարթինեան, Ազնիւ Մովսէսեան, Մարի Աճէմեան, Հռիփսիմէ Կարապետեան. տարեշրջանին ընթացքին ճիգ չխնայեցին դպրոցին զանազան կարիքները հոգալ։ Այս տարի ալ շաբաթական հերթականութեամբ շարունակեցին ստանձնել ճատրակի դասերը։ Ծնողականը ամէն տարի կը կազմակերպէ գիրքերու ցուցավաճառք եւ գիտակից հայ գիրքին կարեւորութեան մասին, հերթաբար ցուցահանդէսը կը հարստացնէ հետաքրքրական հայկական մանկապատանեկան գիրքերով, որոնք իսկապէս ծնողներուն եւ աշակերտներուն կողմէն կը յափշտակուին։ Նաեւ, կը հոգայ մեր աւարտականներուն՝ մանկապարտէզի եւ նախակրթարանի յիշատակի նուէրները։
Շնորհակալութիւն՝
— «Ազատ Օր» օրաթերթի ու «Արմենիքա» պարբերաթերթի խմբագրութեան կազմերուն, «Զաւարեան» կեդրոնի խորհուրդին:
- Սան պահող բարերար տիկին Պերճուհի Ունճեանին։
- Նուիրատուներուն՝ Արամ եւ Իոաննա Գասարճեանին եւ պարոն Հայկ Աճէմեանին։
— Եւ մեր բոլոր բարեկամներուն՝ որոնք թիկունք կանգնեցան մեր վարժարանին ու հոգացին բազմատեսակ կարիքներուն։
Վարձքը կատար՝
Մեր սիրելի աշակերնտերուն. տարեշրջանի ընթացքին բացի իրենց ամենօրեայ պարտականութիւններէն, գուրգուրացին իրենց վարժարանին վրայ: Յատկապէս մեր աւարտականներուն, որոնք պատրաստ են որեւէ մարտահրաւէրի։ Սիրեցին դպրոցը, հետաքրքրուեցան համայնքին պատմութեամբ։ Վստահ ենք թէ ուր որ ալ պիտի շարունակեն իրենց ուսումը, հոն ալ պիտի ծաղկին ու աւելիով պիտի զարգացնեն իրենց տաղանդները։
Մանկապարտէզի ու Նախակրթարանի բոլոր ուսուցիչներուն, որոնց հասկացողութեան եւ անկեղծ գործակցութեան շնորհիւ, մեր վարժարանը կը զարգանայ, կը բարգաւաճի կիրթ մթնոլորտի, անկեղծ, ջերմ ու հաղորդական միջավայրի մէջ։ Ի մասնաւորի կորովի հայ ուսուցչական կազմին՝ Անի Աբիկեանին, Անուշ Ֆենդեանին եւ Թամար Պետոյեանին։ Ամէն ջանք կը թափէ, որպէսզի մեր աշակերտները ապրումով ճանչնան մեր հեքեաթները, աւանդութիւնները, Հայոց պատմութիւնը, մեր հարուստ մշակոյթն ու գրականութիւնը։ Այսպէս՝ կը կազմեն հայօրէն ապրող, ստեղծող ինքնավստահ հայ անհատներ.Մեր աշակերնտերն են՝ որ կը տողանցեն Հ.Մ.Ը.Մ.-ի սկաուտական դրօշին տակ, կը խանդավառեն մեզ իրենց աշխուժ թէ նազ պարերով Համազգայինի պարախումբերու ելոյթներուն։
Շնորհակալութիւն՝
Դպրոցի մատակարար, տիկին Կարինէ Միքայէլեանին. Ինքնաշարժներու վարորդներուն՝ Նորա Յակոբեան եւ Նիքոս Ծավարաս, ուղեկցող տիկիններուն՝ Լուիզա Աւագեան եւ Սուզաննա Պօղոսեան։
Շնորհակալութիւն՝ մեր սիրելի ծնողներուն, որոնք գիտակից հայկական դպրոցին առաքելութեան, համեստօրէն կը շարունակեն անոր նեցուկ կանգնիլ։ Շնորհակալութիւն։
Մրցանակներ
Ամէն տարի Հ.Կ.Խաչի Շրջ. Վարչութիւնը աւարտական դասարանէն տարեշրջանի ընթացքին, հայերէն լեզուի մէջ գերազանց արդիւնք բերող աշակերտին կը պարգեւատրէ Պատանեկան Միութեան ամառուան բանակումի մասնակցութեան մրցանակով։ Մրցանակին կ՚արժանանայ Յակոբ Մկրտիչեան։
Մեր դպրոցի շրջանաւարտներէն պարոն Հայկ Աճէմեան, 100 եւրոյի մրցանակով կը պարգեւատրէ մեր վարժարանի աւարտական դասարանէն Հայոց Պատմութեան գերազանց աշակերտը։ Մրցանակը յանձնուեցաւ Նելլի Ղազարեանին։
Կրթաթոշակ
Տիկին Պերճուհի Ունճեան, իր ամուսնոյն Բիւզանդ Ունճեանի յիշատակին, կը շարունակէ անոր եւ իր կրթաթոշակը՝ ամէն տարի 500 եւրոյի կրթաթոշակով պարգեւատրել հայկական դասանիւթերուն մէջ բացառիկ ճիգ թափող եւ գերազանց արդիւնքներ ձեռքբերող աշակերտ մը։
Վերջաբան
Շրջանաւարտներու հրաժեշտի երեկոյին, Զ. դասարանի ուսուցչուհին տիկին Տեսփինա Մաքետոնոփուլու իր հրաժեշտի խօսքը ուղեց աւարտականներուն ու իրենց ծնողներուն։ Երեկոյին ներկայ էր նաեւ Յունաստանի Մաթեմաթիքի Ընկերակցութեան (ΕΜΕ) անդամ, թուաբանութեան ΕΥΚΛΕΙΔΗΣ Α΄ պարբերաթերթին խմբագրական կազմի անդամ եւ մեր դպրոցին նախկին ուսուցիչ պր. Եաննիս Սիուլաս։ Ան իր ուղերձի աւարտին, յանձնեց Թուաբանութեան մրցոյթին գնահատանքի (ΑΡΙΣΤΕΙΑ) արժանացած 10 աշակերտներուն. Զ. դասարանի՝ Առաքելեան Վիքթորիա, Գաբրալոս Ակելոս, Ղազարեան Նելլի, Մկրտիչեան Յակոբ եւ Սերոբեան Սեսիլ եւ Ե. դասարանի՝ Աւագեան Մայք, Ղազարեան Դաւիթ, Մարինոս Եորղոս, Մինասեան Սեւակ եւ Չթէյեան Յարութ։
Բարի ամառ
