Հ. Կ. Խ.-ի Ա. եւ Ժ. Ճէնազեան ազգային միջնակարգ վարժարանի 2023-2024 ուսումնական տարեշրջանի ամփոփ տեղեկագիր
ՎԵՐԱՄՈՒՏ — 11 Սեպտեմբեր 2023
2023-2024 տարեշրջանի պաշտօնական բացումն ու ջրօրհնէքի արարողութիւնը տեղի ունեցաւ 2023 Սեպտեմբեր 11-ին հանդիսապետութեամբ Թեմակալ Առաջնորդ՝ Տէր Գեղամ Արք. Խաչերեանի: Ներկայ էին՝ Տէր Նարեկ քհնյ. Շահինեան, Ազգային վարչութեան, Հ.Կ.Խաչի Շրջանային վարչութեան եւ Ուսումնական Խորհուրդի ներկայացուցիչներ ու ծնողներ:
ԱՐՁԱՆԱԳՐՈՒԹԻՒՆ ԵՒ ԱՇԱԿԵՐՏՈՒԹԵԱՆ ԹԻՒ
Ա. դասարան 18, Բ.՝ 20, Գ.՝ 14:
Ընդհանուր թիւ՝ 52 աշակերտ:
Նոյեմբերին Ա. կարգէն աշակերտուհի մը փոխադրուեցաւ այլ դպրոց, ընտանեկան պատճառներով:
ՈՒՍՈՒՑՉԱԿԱՆ ԿԱԶՄ
Տարեշրջանի առաջին օրէն ուսուցչական կազմը ներկայացաւ ծառայելու մեր դպրոցէն ներս ու բաղկացաւ հետեւեալներէն (այբբենական կարգով).
Էւստաթիու Իոաննիս՝ ուսողութեան ուսուցիչ:
Կեքաս Էւանկելոս՝ անգլերէն լեզուի ուսուցիչ:
Սափրիչեան Արշալոյս ՝ տնօրէնուհի եւ ուսուցչուհի հայոց լեզուի, գրականութեան եւ պատմութեան:
Վլախոփուլու Անտրոնիքի՝ յունաց լեզուի ու գրականութեան եւ պատմութեան ուսուցչուհի:
Տումաս Թեոտորոս՝ մարմնամարզութեան ուսուցիչ:
Փափաիլիա Նաւսիքա՝ Ֆրանսերէն լեզուի ուսուցչուհի:
Փիփերիտու Էլենի՝ իրագիտութեան, տարրալուծութեան, կենսաբանութեան եւ աշխարհագրութեան ուսուցչուհի:
Քոլցիտա Ալեքսանտրա՝ յունաց լեզուի ու գրականութեան եւ պատմութեան ուսուցչուհի:
Հոկտեմբերին կազմը ամբողջացաւ տեղեկագիտութեան ուսուցիչով՝ պարոն Մելլիոս Վասիլիոս:
Ուսուցչական կազմը մասնակցեցաւ բազմաթիւ դասընթացներու, թէ՛ խմբովին, թէ՛ անհատապէս:
Ուսուցչական կազմի գործակցութիւնը տնօրէնութեան հետ ամբողջ տարեշրջանի ընթացքին եղաւ ջերմ ու արդիւնաւէտ, միշտ առաջադրելով մեր աշակերտներուն բազմակողմանի կրթութիւնն ու անոնց հոգեմտաւոր առողջ աճման յարմարագոյն պայմանները ստեղծելու հրամայականը:
Մեր նիստերու տոմարին մէջ անցուցած ենք 31 ատենագրային արձանագրութիւն:
2023-2024 ՏԱՐԵՇՐՋԱՆԻ ՈՒՍՈՒՄՆԱԿԱՆ
ԵՒ ԿՐԹԱԿԱՆ ՎԻՃԱԿ
Նկատի առնելով Կրթութեան Նախարարութեան կողմէ թելադրուած ներքին արժեւորման ուղղութիւնները, տարեշրջանի սկիզբը ուսուցչական կազմ եւ տնօրէնութիւն ճշդեցինք կրթական թիրախներն ու ծրագիրները, միշտ ի մտի ունենալով պատանիներուն տալ արդիական մեթոտներով, բազմակողմանի, բարձրորակ կրթութեան կողքին, հայեցի դաստիարակութիւն եւ ներշնչել մարդկային բարձր արժէքներ. հայրենասիրութիւն, նուիրուածութիւն, վեհ գաղափարներու համար յարատեւ պայքար, բարձունքներու նուաճում:
Հպարտ ենք արձանագրելու, թէ այս տարի առաջին անգամ ըլլալով հիմնեցինք յետ միջօրեայ դաստիարակչական խմբակներ՝
Աւանդական պարերու (Հինգշաբթի օրերը, ժամը 14:30-16:00)
Երգչախումբ (Երեքշաբթի օրերը, ժամը 14:30-16:00)
Թատերախումբ (Ուրբաթ օրերը, ժամը 18:30-20:00)
«Մենք» աշակերտական թերթիկի խմբագրութեան (Ուրբաթ օրերը, ժամը 18:30-20:00)
Շրջանաւարտներու (Շաբաթ օրերը, ժամը 14:30-16:00)
Յոյն ուսուցիչներու համար հայերէնի դասերու (Չորեքշաբթի օրերը, ժամը 14:30-16:00)
Տարեշրջանի աւարտին մեր աշակերտութեան ուսումնական վիճակը կ‘ամփոփուի հետեւեալ կերպով.
Վերաքննելի՝ 5, Միջակ՝ 2, Լաւ 21, Շատ Լաւ՝ 13, Գերազանց՝ 9 աշակերտ:
Ծանօթ՝ Վերոնշեալ գնահատականները տրուած են քսանի վրայ հետեւեալ հիմունքով. Միջակ՝ 10-12,4. Լաւ՝ 12,5-15,4. Շատ Լաւ՝ 15,5-18,4. Գերազանց՝ 18,5-20:
Ուրախութեամբ կը հրաւիրենք հետեւեալ գերազանց աշակերտները յաջորդ տարեշրջանի յունաց Ազգային տօնի՝ Հոկտեմբեր 28-ի տօնակատարութեան, որպէսզի ստանան Կրթութեան նախարարութեան կողմէ պարգեւուող վկայագիրներն ու մրցանակները.
Ա. դասարանէն՝
Լուլումարի Անայիս
Բ. դասարանէն՝
Եզեկիէլեան Արամ, Լուլումարիս Անտոնիս, Մարտիկեան Ալպեր, Պարղուտեան Վանա, Խաչերեան Կարէն
Գ. դասարանէն՝
Գույումճեան Նաթալի, Գարճեան Արիս, Գարճեան Ալեքս
Նշենք, թէ այս տարի ընտրուեցանք Կրթական նախարարութեան կողմէ մասնակցելու Միջնակարգ վարժարաններու Համահելլէնական քննութիւններուն:
Յառաջատար ծրագրով մը դիմած ենք մասնակցելու եւրոպական Էրազմիւս նախագիծին:
ՄՐՑԱՆԱԿՆԵՐ
Ինչպէս ամէն տարի, մեր վարժարանէն ներս տեղի ունեցան Ուսողութեան ընկերութեան «Թալիս» եւ «Պիւթակորաս» մրցոյթները, որոնց մեր աշակերտները անգամ մը եւս բարձր գնահատանքի արժանացան:
Հ. Կ. Խաչի Շրջանային վարչութեան կողմէ աւանդութիւն դարձած է Հ.Յ.Դ. Պատանեկան միութեան բանակումի մասնակցութեան մրցանակը, որ կը շնորհուի շրջանաւարտներէն հայագիտական առարկաներուն ամենաեռանդուն ճիգը թափող եւ լաւագոյն արդիւնքը ներկայացնող աշակերտին: Այս տարի մրցանակին կ’արժանանայ՝ Գույումճեան Նաթալի:
ՁԵՌՆԱՐԿՆԵՐ, ՆԱԽԱՁԵՌՆՈՒԹԻՒՆՆԵՐ ԵՒ
ԴԱՍՏԻԱՐԱԿՉԱԿԱՆ ԱՅՑԵԼՈՒԹԻՒՆՆԵՐ
Աշակերտութիւնը, ամէն տարուան պէս, տարեշրջանի սկիզբը ընտրեց իր դասարանային եւ դպրոցական վարչութիւնները, որոնց միջոցաւ անոնք աւելի աշխուժ մասնակցութիւն կը բերեն դպրոցի կեանքէն ներս եւ գործնապէս կ’իւրացնեն ժողովրդավարութեան կանոնները: Այս տարուան դպրոցական աշակերտական վարչութիւնը մեծ ճիգ թափեց Հայաստան մեր այցելութեան նախահաշիւին կարեւոր ներդրում մը ցուցաբերելու նպատակով, ինչ որ յաջողութեամբ պսակուեցաւ:
Սեպտեմբերին կազմակերպեցինք ներդպրոցական մարզական խաղեր:
Յատուկ աշխատանոցի մը ընդմէջէն մեր աշակերտները սորվեցան ինչպէս կարելի է բեմականացնել գրական գործ մը, ստեղծել թուային բեմական միջավայր եւ երաժշտութիւն եւ նկարահանել տեսերիզ մը ամէնէն արդիական միջոցներով:
Այցելեցինք Պենաքի թանգարանը, ուր դիտեցինք Aurora’s Sunrise վաւերագրական շարժանկարը:
Նոր Տարուան եւ Ս. Ծնունդի առիթով, այցելեցինք Հայաստանի Հանրապետութեան դեսպանատունը, ուր աշակերտութիւնը ելոյթ ունեցաւ ազգային երգերով ու պարերով:
Ազգային եւ կրօնական տօները նշեցինք պատշաճ ու ստեղծագործ կերպով՝ ազգային եւ աւանդական երգերով ու պարերով, թատերական ներկայացումներով, գիտելիքներու խաղերով եւ պատմական աշխատութիւններու ներկայացումներով:
Կազմակերպեցինք յաճախակի աշակերտական տօնախմբութիւններ եւ հայկական խոհանոցի ու աւանդական երգի ու պարի աշխատանոց, մասնակցութեամբ աշակերտութեան, ծնողներու եւ ուսուցչական կազմին: Այս ձեռնարկները հայկական շունչով ուրախութիւն կը ստեղծեն դպրոցէն ներս:
Այս տարուան մեր աշակերտներու հետազօտական աշխատանքները, որոնց նիւթն էր հայկական Սփիւռքը եւ անոր կառոյցը, ներկայացուած են մեր դպրոցի կայքէջին մէջ:
Առիթը ունեցանք այցելելու Ազատ Օրի խմբագրատունը, ուր մեր նոր աշակերտները ծանօթացան թերթի պատմութեան, տպագրման գործընթացին: Աշակերտական «Մենք» թերթիկին համար թղթակցութիւններ ու յօդուածներ լոյս տեսան եւ պիտի տեսնեն յառաջիկային:
Բարեկենդանին աւանդական խաղեր կազմակերպեցինք ու խաղացինք մեր աշակերտներուն հետ: Ըստ աւանդութեան, աշակերտները այդ օր «դատեցին» իրենց ուսուցիչները:
Մեր երգչախումբը մասնակցեցաւ Սրբոց Վարդանանց տօնակատարութեան երգեցողութեան:
«Ցիքնոփեմբթի»ն վերածեցինք «Հայկական խորովածի օր»-ուան, աւանդական խորովածով, երգ ու պարով:
Զատկուան նախօրէին շինիչ աշխատանոց մը կազմակերպեցինք Տէր Նարեկ քհնյ. Շահինեանին հետ:
Յատկապէս զարկ տուինք մեր պատանիներու ընկերային զգայնութեան եւ մարդկային համերաշխութեան: Այսպիսով.
Մեր դպրոցին մէջ առցանց աշխատանոց մը կազմակերպեցինք Kids save lives ծրագրի ծիրէն ներս: Աշակերտներ եւ ուսուցիչներ իւրացուցինք նախնական օգնութեան հիմնական գիտելիքներ:
Կազմակերպեցինք «Կենդանասիրութեան օր»-ը, որու ընթացքին աշակերտները իրենց աշխատութիւնները ներկայացնելով բոլորս իրազեկ դարձուցին կենդանիներու լուրջ հարցերուն:
Ամբողջ տարեշրջանի ընթացքին հաւաքեցինք կերպընկալէ շիշերու կափարիչներ, եւ զանոնք նուիրեցինք անդամալոյծներու «Իլիախթիտա» կազմակերպութեան, որպէսզի սայլակներ գնուին:
Ցեղասպանութեան տարելիցին առիթով ոգեկոչական ձեռնարկներուն եւ բողոքի ցոյցին ներկայ եղանք, վերահաստատելով մեր սրբազան ուխտը՝ պայքարելու մինչեւ վերջնական յաղթանակ:
Դաստիարակչական այցելութիւններ կատարեցինք Յունաստանի ազգային գրադարան, Փիրէայի քաղաքապետական թատրոն, Կորնթոսի բնագիտական կեդրոն եւ Էլեւսինայի հնագիտական վայրը, ուր մեր Գ. կարգի աշակերտները ուղեկիցի դերը ստանձնելով վայրը ներկայացուցին մնացեալ աշակերտութեան եւ Խայտարիի 8-րդ միջնակարգի Գ. կարգի աշակերտներուն:
Այս տարի եւս Աթէնքի քաղաքապետարանի «Աթինա Պրոմախոս» հոգեկան կախուածութիւններու կանխարգելման կեդրոնի հետ համագործակցելով, մշակեցինք յատուկ կրթական ծրագիր, որու նպատակն էր կանխել հաւանական ժխտական մօտեցումները եւ ամրապնդել մեր դպրոցի ներդաշնակ ու ապահով կրթական միջավայրը: Ծրագիրը իրագործուեցաւ շաբաթական դասարանային հանդիպումներով Փետրուար եւ Մարտ ամիսներու ընթացքին: Աւարտին, տնօրէնութիւնը, ուսուցչական կազմը եւ պատասխանատու հոգեբան՝ տիկին Վլութողլուն համատեղ խորհրդակցելով, ստեղծեցինք ներդպրոցական յարձակողականութեան կանխարգելման եւ դիմագրաւման յատուկ արձանագրութիւն:
Բնապահպանական (որթատունկի), մշակութային (Սփիւռքի քաղաքներու), այլեւ մեր դպրոցական եւ արհեստագիտական կողմնորոշման ծրագիրներու ծիրէն ներս, կազմակերպեցինք եւ իրագործեցինք դաստիարակչական եռօրեայ պտոյտ մը դէպի Սիրոս, ուր բացառիկ առիթը ունեցանք տեսակցելու էրմուպոլիսի քաղաքապետին, ծանօթանալու քաղաքապետութեան եւ Հ.Յ.Դ. Հայ դատի յանձնախումբի բազմամեայ համագործակցութեան: Բացառաբար այցելեցինք նախկին որբանոցը Նիար Իսթ Րիլիֆ Կազմակերպութեան, որ ներկայիս զօրանոց է: Սիրոսի մէջ այցելեցինք նաեւ Յունաստանի երկրորդ մեծագոյն նաւերու շինութեան եւ նորոգման գործարանը եւ Փարաքոփիի այգիներն ու գինեգործարանը:
Մեր դպրոցի բակին մէջ տեղադրուեցաւ հրաշալի մոլորակացոյց մը: Մեր աշակերտները առիթը ունեցան անջրպետի մասին իրենց գիտելիքները հարստացնելու:
Նախակրթարաններու աւարտականներուն համար կազմակերպեցինք ծանօթացման օր, որու ընթացքին մեր զոյգ նախակրթարաններու վեցերորդ դասարաններու աշակերտները ջերմ մթնոլորտի մէջ, ծանօթացան մեր շէնքային հնարաւորութիւններուն, կրթական ծրագիրներուն եւ առիթը ունեցան ա՛լ աւելի սերտացնելու իրենց բարեկամական կապերը: Կազմակերպեցինք նաեւ Հ.Կ.Խ.-ի Զաւարեան նախակրթարանի աւարտականներու ծնողներուն համար, ծանօթացման, զեկուցական հանդիպում մը, գործակցելով դպրոցի տնօրէնութեան հետ:
Կազմակերպեցինք հաճելի պտոյտներ դէպի մեր մօտիկ Նէա Զմիռնիի հրապարակը եւ Սթաւրոս Նիարխոս հաստատութեան զբօսայգիները:
Այս տարի եւս մեր աւարտականներուն համար կազմակերպեցինք դպրոցական եւ արհեստագիտական կողմնորոշման դասընթաց աշխատանոց, զոր վարեց մասնագիտացած յատկապէս հրաւիրուած հոգեբան մը:
Մեր աշակերտները դարձան մեր հնամեայ մշակոյթի դեսպաններ: Մեր սրահին մէջ հիւրընկալեցինք Խայտարիի 8-րդ միջնակարգ վարժարանի Գ. կարգը: Մեր Գ. կարգի աշակերտները ուրախութեամբ ներկայացուցին իրենց աշխատութիւնները մեր պատմութեան ու հարուստ մշակոյթի մասին եւ իրենց յոյն տարեկիցներուն հայկական աւանդական երգեր ու պարեր սորվեցուցին: Երկու դպրոցներու միջեւ ստեղծուեցան ջերմ բարեկամական կապեր:
Քննութիւններէն առաջ վերջին օրը բոլորս միասին զուարճացանք Վարդավառի ջրախաղով:
ՅԱՐԱԲԵՐԱԿԱՆ
Մեր աշակերտներու ծնողներուն հետ անմիջական, յաճախակի եւ սիրալիր ու շինիչ կապ հաստատեցինք, թէ՛ մօտէն, թէ՛ էլ. նամակագրութեան եւ հեռաձայնի միջոցաւ: Միշտ համախորհուրդ գործեցինք, ի խնդիր մեր պատանիներու լաւագոյն աճման:
Սրբազան հօր եւ Ազգային վարչութեան հետ մեր կապերը եղան յարգալից, իսկ Ուսումնական եւ Տնտեսական խորհուրդներուն հետ՝ անմիջական ու գործնական:
Սիրալիր եւ շինիչ յարաբերութիւններ ունեցանք Հ.Կ.Խ.-ի Շրջանային եւ տեղւոյն վարչութիւններուն հետ:
Սերտօրէն գործակցեցանք Հ.Մ.Ը.Մ.-ի եւ Համազգայինի Շրջանային եւ տեղւոյն վարչութիւններուն հետ:
Ուրախութիւնը ունեցանք գործակցելու Ուսումնական խորհուրդին կողմէ հրաւիրուած պատմաբան եւ կրթական մշակ տիկին Գոհար Գանտահարեանին հետ: Միասնաբար քննարկեցինք Հայոց պատմութեան դասաւանդման կերպն ու ծնողներու համար յատուկ ծրագիրներու մշակումը:
Վարժարանէն ներս հիւրընկալելով Երեւանի Մանկավարժական համալսարանի պատմութեան բաժինի վարիչ պարոն Խաչատուր Ստեփանեանը եւ իր գործակից Էդգար Յովհաննիսեանը, ամրապնդեցինք մեր գործակցութիւնը քննելով Հայոց պատմութեան դասաւանդման կերպն ու ընթացքը:
Ծանօթացանք եւ անկեղծ բարեկամական կապ ստեղծեցինք ճարտարապետ եւ նկարիչ պարոն Էւանկելոս Ծիմոփուլոսին հետ, որ դպրոցին նուիրեց Արցախին նուիրուած բացառիկ գեղանկար մը:
Շրջանի Կրթութեան տնօրէնութեան հետ համադրած ենք մեր կրթական աշխատանքը: Հանդիպումներ ունեցած ենք տնօրէնին եւ մեր վարժարանը հսկող բոլոր պատասխանատուներուն հետ, ամրապնդելով արդէն իսկ գոյացած փոխադարձ յարգանքն ու գործակցութիւնը:
Ստացուած ու առաքուած նամակներ, հրաւէրներ, հաստատագրեր եւ այլ բնոյթի փաստաթուղթեր պահած ենք էլեկտրոնային արխիւով, ինչպէս թելադրուած է:
ԾՆՈՂԱԿԱՆ ՄԻՈՒԹԻՒՆ
Տարեշրջանի սկիզբը Ծնողական միութիւնը ընտրեց իր վարչութիւնը, որ բաղկացաւ հետեւեալ անդամներէն.
Անեթա Նշանեան, Վերոնիկ Գոնեալեան, Թամար Յովակիմեան, Սոնա Գրիգորեան, Յովսէփ Թութուշեան:
Վարչութիւնը ամէն ջանք թափեց, որպէսզի գոհացնէ վարժարանի կարիքները: Մեր յարաբերութիւնները եղան միշտ սիրալիր եւ գործակցութեան ոգիով սահմանուած: Տարեշրջանի սկիզբը կատարեց խմբային ապահովագրութիւն աշակերտութեան համար: Կազմակերպեց թատրոնի երեկոյ: Նոր Տարուան արձակուրդէն ետք աւանդական գաթաներ ու նուէրներ տրամադրեց աշակերտներուն:
Սեպտեմբեր մէկին մեր սիրելի պաշտօնակիցի՝ մեր դպրոցի նախկին եւ Լ. Եւ Ս. Յակոբեան վարժարանի տնօրէնի՝ Բաբգէն Գասապեանի արկածը եւ ամիսներ ետք անոր կորուստը ցնցեցին մեր կրթական ընտանիքը: Պատուելով անոր յիշատակը, մեր եւ Լ. եւ Սոֆիա Յակոբեան վարժարանի տնօրէնութեան եւ զոյգ Ծնողական միութեանց գործակցութեամբ, մեր գրադարանը պիտի վերանորոգուի եւ անուանակոչուի «Բաբգէն Գասապեան գրադարան»:
ԱՄԱՎԵՐՋԻ ՀԱՆԴԷՍ ԵՒ ՎԿԱՅԱԿԱՆԱՑ ԲԱՇԽՈՒՄ
Մեր վարժարանի ամավերջի հանդէսն ու վկայականաց բաշխման արարողութիւնը տեղի ունեցաւ Չորեքշաբթի, 26 Յունիս 2024-ի երեկոյեան ժամը 21.00-ին, մեր բակին մէջ:
Ներկայացուեցան մեր աշակերտներու կրթական ծրագիրներու աշխատութիւնները, երգեր, պարեր ու բեմականացուած աւանդազրոյցներ ու աւանդութիւններ:
ՈՒԽՏԱԳՆԱՑՈՒԹԻՒՆ ԴԷՊԻ ՀԱՅՐԵՆԻՔ
Այս տարի եւս մեր վարժարանը սերտօրէն գործակցելով մեր ծնողներուն, Հ.Կ.Խ.-ի Շրջանային վարչութեան, Ուսումնական եւ Տնտեսական խորհուրդներուն հետ կարողացանք կազմակերպել եւ իրականացնել եօթնօրեայ ուխտագնացութիւն դէպի Մայր Հայրենիք՝ Հայաստան 30 Յունիսէն մինչեւ 8 Յուլիս 2024: Այս մէկը կարելի եղաւ իրագործել շնորհիւ Տնտեսական խորհուրդի եւ Հ.Կ.Խ.-ի յատկացումներուն, անհատներու նուիրատուութիւններու, ծնողներու ներդրումին եւ մեր աշակերտներու աշխուժ գործունէութեան:
Ուխտագնացութեան ծրագիրը կը պարունակէր հետեւեալ այցելութիւններն ու հանդիպումները.
Խոր Վիրապ, Գէորգ Չաւուշի արձան, Նորավանք, Արենիի քարանձաւ, Չարենցի Կամար, Գառնիի հեթանոսական տաճար, Գեղարդի վանք, «Քարերի սիմֆոնիա», Մատենադարան, Գաֆեսճեան արուեստի կեդրոն, Արամ Մանուկեանի արձան, «Յառաջ» Արեւմտահայերէնի կեդրոն, արեւմտահայերէն Ուիքիփետիայի տնօրէնուհիին հետ հանդիպում, Ազգային պատկերասրահ, Էրեբունի եւ Երեւանի գնացքի կայարան, Սասունցի Դաւիթի արձան, Երեւանի օփերային մէջ դիտեցինք Արամ Խաչատուրեանի «Սպարտակ» պալէն, Սեւանայ լիճ, Սեւանայ վանք, Դիլիջան, Հաղարձին վանք, Պարզ լիճ, Վերնիսաժ եւ Վարդան Մամիկոնեանի արձան, Էջմիածին եւ Օշականի Սուրբ Մեսրոպ եկեղեցին: Օր վեցերորդ՝ մեր յարգանքի տուրքը մատուցեցինք Ծիծեռնակաբերդի անմար բոցին առջեւ ու այցելեցինք Ցեղասպանութեան թանգարանը: Այցելեցինք Սարդարապատի յուշահամալիրը եւ Պատմութեան ու ազգագրութեան թանգարանը, Գիւմրի քաղաքը, Գիւմրիի մայր Հայաստանը եւ Սեւ ամրոցը, «Ակունք» պետական աւանդական երգի-պարի հրաշալի ներկայացումը: Վարդավառի տօնախմբութիւններուն ներկայ եղանք, Սահմանադրութեան օրը նշեցինք Երեւանի մէջ: Վերջին գիշերը այցելեցինք Մայր Հայաստանի արձանը՝ հրաժեշտ առնելու եւ կրկին վերադառնալու ուխտ կատարելու: Յիշատակներով ու զգացումներով լիցքաւորուած՝ վերադարձանք Յունաստան:
ՇՆՈՐՀԱԿԱԼԻՔ
Պարտք կը զգանք անգամ մը եւս հրապարակաւ մեր շնորհակալութեան եւ երախտագիտութեան խօսքը ուղղել Սրբազան հօր, Հ.Կ.Խ.-ին, Ուսումնական եւ Տնտեսական խորհուրդներուն, մեր կողքին կանգնած սիրելի Հ.Մ.Ը.Մ.-ին եւ Համազգայինին, մեր սիրելի ծնողներուն եւ Ծնողական միութեան վարչութեան, Լ. եւ Ս. Յակոբեան եւ Զաւարեան նախակրթարաններու տնօրէններուն, անվերապահ գործակցութեան համար: Շնորհակալութիւն Հայ Կաթողիկէ եկեղեցւոյ, ամավերջի հանդէսին համար լուսարձակին սիրայօժար տրամադրութեան համար: Շնորհակալութիւն կը յայտնենք Նումիլ ընկերութեան, տիկիններ Ալիս Ֆուրունճեան, Էլենա Աւանեսեան, Հայկանուշ Ադամեան, պարոններ Րաֆֆի Տեմիրճեան, Լիւտվիկ Զատիկեան, Քոսթաս Փեթրու, Վիգէն Մինասեան, Գրիգոր Մինասեան, Յովհաննէս Թէրզեան, Սերգօ Մովսէսեան, Լուլումարի, Թոքաթլեան, Մասոյեան Պարղուտեան, Գարճեան եւ Գասապեան ընտանիքներուն անոնց կամաւոր աշխատանքներուն եւ առատաձեռն նուիրատուութիւններուն համար: Շնորհակալութիւն մեր դպրոցի մայրիկին՝ տիկին Անի Քէօշկէրեանին, մեր վարորդներուն եւ ուղեկցող տիկիններուն:
Յատուկ շնորհակալական խօսք կ’ուղղենք մեր ուսուցիչներուն, որոնք անսակարկ նուիրումով կը ծառայեն այս դպրոցէն ներս:
Շնորհակալութիւն բոլո՛ր անոնց, որոնք հաւատքով սատարեցին մեր վարժարանի յաջող գործունէութեան:
ՎԵՐՋԻՆ ՊԱՏԳԱՄ ՄԵՐ ՇՐՋԱՆԱՒԱՐՏՆԵՐՈՒՆ
Սիրելի՛ աղջիկներ եւ տղաք,
Դուք հրաժեշտ կ’առնէք մայրենի լեզուի օրրանէն՝ Հայ դպրոցէն, ամբարած ըլլալով այն թանկագին պաշարը, որ ձեր անցագիրը պիտի հանդիսանայ ամէն անգամ որ պիտի ուզէք սլանալ դէպի ամենահեռաւոր հորիզոնները:
Ձեր առջեւ կը բացուի ամբողջ աշխարհը, իր միլիոնաւոր հնարաւորութիւններով: Ամէն վայրկեան դուք պիտի կոչուիք ընտրելու ձեր ուղին, ձեր իղձերու իրականացման եւ երջանկութեան գագաթը նուաճելու համար: Սակայն կը գիտակցիք, թէ մարդ, իբրեւ ընկերային էակ, իր անձնական փափաքներուն կողքին, անհրաժեշտ է աշխատի նաեւ իր հաւաքականութեա՛ն բարօրութեան համար: Մեր հաւաքականութիւնը մեր ազգն է սիրելիներ. աշխարհասփիւռ հայութիւնը, զոր դուք ուսումնասիրեցիք այս տարի եւ որուն մէկ մասնիկն ենք բոլորս անխտիր:
Ուրեմն, ինչպէս ծիծեռնակը կը վերադառնայ մի՛շտ իր բոյնը, դուք ալ սիրելիներ հասէք շա՜տ հեռուները, բայց վերադարձէք միշտ հայութեան տաքուկ բոյնը՝ դպրոցը, ակումբը, եկեղեցին, հայրենիքը, յիշելով մեր մեծ բանաստեղծի՝ Եղիշէ Չարենցի պատգամը՝ «Ո՛վ հայ ժողովուրդ, քո միակ փրկութիւնը քո հաւաքական ուժի մէջ է»:
Դուք այսքան տարի ուս ուսի տուած, առիւծի նման պարեցիք:
Մի՛շտ պարեցէք:
Պարեցէ՛ք, մինչեւ մեր պարը Մասիս լերան լանջին պարենք:
Տնօրէնութիւն
