Ուսումնական տարեշրջան մը եւս իր աւարտին կը հասնի վկայականներու բաշխման հանդիսութեամբ, որ ուրախութեամբ ներկայացուցին մեզի, «Արթին Գալուստեան» մանկապարտէզի եւ «Լ. եւ Ս. Յակոբեան» վարժարանի նախակրթարանի մեր սիրելի շրջանաւարտները:
6-րդ դասարանի շրջանաւարտները վեց տարի առաջ, Ծաղիկ դասարանի շրջանաւարտներուն տեղը գտնուելով, իրենց առաջին վկայականը ստացան, ինչպէս այսօր մեր սիրելի փոքրիկները:
Առաջին անգամ մանկապարտէզ եկող երեխաները իրենց մտերմիկ ու տաքուկ տունը ձգելով կը յաճախեն հայ դպրոցը որ գրկաբաց կ՛ընդունի զիրենց:
Հայ դպրոցը իր առաւելութիւններով, իր որակով, իր ապահով, ընտանեկան ու ջերմ միջավայրով եւ իր ընծայած բարձրորակ կրթութիւնով հայ մանուկին «երկրորդ տուն»ն է:
Սփիւռքի մէջ հայ դպրոցին հիմնական առաքելութիւններէն մէկը դաստիարակչական գործի արդիւնաւորումն է: Այս ուղղութեամբ, նոր ու ժամանակակից մանկավարժական մօտեցումներով եւ ծրագիրներով, հայերէնի ուսուցման, լեզուն իր ամբողջութեամբ ընդգրկուած է իբրեւ ապրող, շնչող, ինքզինք զարգացնող, աշխարհին հետ զուգահեռ յառաջացող միջոց, որպէսզի աշակերտները հարուստ ու հպարտ զգան իրենց երկու լեզուներով ու անոնց զուգահեռ զարգացումով:
Մանկապարտէզին մէջ ամբողջ տարուան ընթացքին մշակեցինք զանազան դաստիարակչական ծրագիրներ թէ հայերէնով, թէ յունարէնով, զանազան նիւթերու շուրջ ինչպէս՝
-մեր մարմինը — առողջապահութիւն
-այլազանութիւն
— մանուկներու իրաւունքները
-զգացումները
-բնութիւն ու բնապահպանութիւն
-կենդանիները
-տիեզերքը եւ մոլորակները
— գիրքեր ու ընթերցասիրութիւն
Հայերէնի ու յունարէնի կողքին ներկայ էր անգլերէն լեզուի ուսուցումը:
Համագործակցեցանք Գ. դասարանի աշակերտներուն եւ ուսուցչուհիներուն հետ Կաղանդի եւ բռնութեան դէմ մեր կատարած աշխատանքներու ընթացքին:
Կազմակերպեցինք Զատկուան տօնական աշխատանոց ու «բաց դռներու» օր, ուր բոլորս միասին՝ ծնողք, փոքրեր ու յաջորդ տարեշրջանի աշակերտներ առիթը ունեցանք հաճելի ու ստեղծագործական պահեր ապրելու ու ընտելանալու մանկապարտէզի ջերմ միջավայրին:
Նաեւ, գիտակցելով թէ խաղը երեխային ճանաչողական եւ ընկերային զարգացման հիմնական յատկանիշն է արեւմտահայերէն լեզուն խաղի եւ ստեղծագործութեան միջոց դարձաւ: Ստեղծուեցաւ մթնոլորտը որպէսզի երեխաները հայերէնը սիրեն ու իրենց տեսանկիւնէն դիտուած, աշխարհը ծանօթանան եւ իրենց ապրած իրավիճակները հասկնան:
Մանկապարտէզին մէջ կիրարկուած Անահիտ Սարգիսեանի՝ «Բարեւ արեւ» ծրագրին շնորհիւ խաղը, երգը, լեզուն, մշակոյթը, պատմութիւնը եւ աւանդութիւնները բոլորը միասին կ’ամբողջացնեն ու կը կազմաւորեն փոքրիկներուն գիտելիքներու աշխարհը:
«Լ. եւ Ս. Յակոբեան» վարժարանի աշակերտութիւնը մասնակցեցաւ զանազան դաստիարակչական ծրագիրներու, դաստիարակչական այցելութիւններ կատարեց եւ իր աշխոյժ մասնակցութիւնը բերաւ բոլոր դպրոցական տօնակատարութիւններուն, նշելով բոլոր թէ՛ հայկական, թէ յունական տօները:
Այցելութիւններ կատարեցինք եւ բախտը ունեցանք այցելութիւններ ընդունելու մեր դպրոցին մէջ:
Կաղանդի շրջանին այցելեցինք Հայաստանի Հանրապետութեան դեսպանատունը, ուր մեր աշակերները երգեցին ու պարեցին եւ վայլեցին դեսպանին՝ պարոն Տիգրան Մկրտչեանի ջերմ հիւրասիրութիւնը: Այցելեցինք նաեւ «Ազատ Օր»-ի խմբագրատունը, որ նշեց իր 80-ամեակը: Իւրայատուկ փորձառութիւն պատճառեց պարոն Եոաննիս Փափանիքոլաու համահելլենական եւ պալքանական խաղերու մրցանակակիրի եւ պարոն Գոստաս Բուլոս, պարոն Գոստաս Ստոֆորոս եւ տիկին Մարինա Եօթի հեղինակներուն այցելութիւնը:
Նաեւ, մեր դպրոցը այցելեցին կոյրեր ուղեկցող շուներու «Լարա» անունով խումբը, «Զամոմինիա» նուագախումբը եւ մոլորակացոյցը: Մեր դպրոցին մէջ տեղի ունեցան սեմինարներ պատմաբան եւ կրթական մշակ տիկին Գոհար Գանտահարեանի կողմէ, մանկավարժ տիկին Ռանիա Գաբարալիոթի եւ գրագէտ ու մանկավարժ տիկին Անկելիքի Մաստրոմիխալաքիի կողմէ:
Այս տարի, մեր աշակերտները առիթը ունեցան հետեւելու պարի եւ նկարչութեան աշխատանոցներուն, որ տեղի ունեցան շաբաթական յաճախականութեամբ: Այս երկու աշխատանոցներուն արդիւնքները կրնաք վայելել այսօր: Պարերը որ պարեցին նախակրթարանի աշակերտները պզտիկ նմուշ մըն են ձեռք ձգած աշխատանքին, որ կը կատարուի պարի աշխատանոցի ընթացքին տիկին Զօի Փափաեոաննիտուի ղեկավարութեամբ:
Նոյնպէս, նկարչութեան աշխատանոցի մեր աշակերտներուն իրագործած ստեղծագործութիւնները տիկին Մարիա Տիմաքիի ղեկավարութեամբ եւ տիկին Նազիկ Ճամուզեանի օժանդակութեամբ կրնաք վայելել մեր պատրաստած ցուցահանդէսին, որ տեղի կ’ունենայ մանկապարտէզի սրահին մէջ:
Համագործակցեցանք պետական «Աթինա Իկիա» կազմակերպութեան հոգեբաններուն հետ եւ շաբաթական մեր հանդիպումներով փորձեցինք աւելի սերտ կապեր ստեղծել աշակերտներուն միջեւ:
Մեր աշակերտները իրենց ուսուցիչներուն առաջնորդութեամբ եւ քաջալերանքով մասնակցեցան զանազան մրցոյթներու, ինչպէս հռետորական աշակերտական փառատօնին եւ համահելլենական հէքեաթի մրցոյթին:
Մեծ հպարտութիւն ու պատիւ պատճառեց մեր վարժարանի Գ. դասարանի Ալեքսանդր Գալստեանի ստացած մրցանակը մտային թուաբանական տարեկան ողիմպիատին «ABAC 2024»:
Նաեւ, բացառիկ եւ պատուաբեր արդիւնք բերաւ մեր վարժարանի Դ. դասարանի մասնակցութիւնը 8-րդ միջազգային աշակերտական մրցոյթին «Արեւելքի հելլենականութիւն՝ Պոնտոս, Թրաքիա, Փոքր Ասիա», ուր մեր աշակերտուհի Էվա Յակոբեան, 3-րդ մրցանակին արժանացաւ իր բանաստեղծութեամբ՝ «Մանիշակագոյն ծաղիկը» (անմոռուկ անունով ծաղիկը՝ «Մի մոռնար — յիշատակի խորհրդանիշ»)՝ նուիրուած հայրենիքին եւ այն բոլորին, որ պէտք չէ մոռնանք:
Այս առիթով, Էվային պիտի յանձնուի Հայաստանի Հանրապետութեան արտակարգ եւ լիազօր դեսպանին՝ պարոն Տիգրան Մկրտչեանին կողմէ շնորհաւորական նամակ մը, իսկ նուէր մը Հայ Կապոյտ Խաչի Շրջանային Վարչութեան կողմէ:
Միաժամանակ, նպատակ ունենալով բարեկիրթ անձնաւորութիւններ կազմաւորել, մեր մանուկներուն աշխարհահայեացքը ընդլայնել եւ համամարդկային ընդհանուր գիտութիւնը զարգացնել, իրենց մաքուր ու անմեղ սիրտերը միասնաբար մշակեցինք ազնուութեան, ընկերասիրութեան, համագործակցութեան, հաւատարմութեան, համերաշխութեան, յարգանքի եւ ուրիշ կարեւոր արժանիքներու սերմը ցանելով։
Այս տարեշրջանը սկսաւ շատ ցաւալի ու անսպասելի պատահարով մը, որ պատճառեց մեր վարժարանի շատ սիրելի Բաբգէն Գասապեանի վաղահաս կորուստը: Այս պատճառով, «Լ. եւ Ս. Յակոբեան» վարժարանի եւ «Ճենազեան» միջնակարգի Ծնողական միութիւնները, տնօրէնութեան, ուսուցչական կազմի եւ ծնողներուն օժանդակութեամբ, երախտագիտութեան զգացումներով իր նուիրած բազմամեայ անխոնջ ծառայութեան հանդէպ, որոշեցին վերանորոգել մեր դպրոցական գրադարանը եւ պատուել հանգուցեալ տնօրէնի յիշատակը զայն անուանակոչելով «Բաբգէն Գասապեան» գրադարան:
2023 — 2024 ուսումնական տարեշրջանը բոլորելով մեր ջերմագին շնորհակալութիւնները կը յայտնենք Թեմիս Առաջնորդ Սրբազան հօր, շրջանիս հոգեւոր հովիւին, Ազգային վարչութեան, ուսումնական, տնտեսական ու կալուածային խորհուրդներուն, Հ.Կ.Խաչի, Հ.Մ.Ը.Մ.-ի եւ Համազգայինի Շրջանային եւ մասնաճիւղերու վարչութեանց:
Շնորհակալութիւն նաեւ, մեր վարժարանի տնօրէնութեան՝ պարոն Վանկելի Կեքային, որուն ջանքերուն շնորհիւ կարելի եղաւ շարունակել դպրոցի բնականոն եւ առանց վարանումի գործունէութիւնը ու յաջողութեամբ ամբողջանալ այս դժուար դպրոցական տարին:
Շնորհակալութիւն՝ Ճենազեան միջնակարգի տնօրէնուհի տիկին Արշալոյս Սափրիչեանին:
Շնորհակալութիւն՝ ուսուցչական կազմին տիկիններուն՝ Ալինա Պարտագճեանին, Մանիա Ճանապեանին, Աննա Սաֆարեանին, Պէթի Մանուսելիին, Էլենա Բանտաքիին, Լինա Մինիին, Նանա Լուլուքողլուին, Քրիստինա Տելիին, Նազիկ Ճամուզեանին, Զօի Փափաեոաննիտուին, Նաֆսիքա Փափաիլիային, Մարիա Տիմաքիին եւ պարոններ Եաննի Ցիկունինի եւ Վասիլի Մելիոյին, որ ճիգ թափեցին ու պատրաստ էին յօժարօրէն բոլոր ստեղծուած մարտահրաւէրները դիմագրաւելու:
Շնորհակալութիւն՝ վարժարանի անձնակազմին՝ մեր սիրելի տիկին Անիին, վարորդներուն, պարոններ՝ Յովիկ, Տիմիթրի, Եորղօ, ուղեկցող տիկիններուն` Վերժին, Լուսի, Եաննա, Սեւան եւ բոլոր անոնց, որ իրենց նիւթական եւ բարոյական աջակցութիւնը ընծայեցին մեր ճիգերուն արդիւնաւորման համար:
Շնորհակալութիւն՝ մեր վարժարանի Ծնողական միութեան, որ ամբողջ տարուան ընթացքին մեր կողքին էր ու ամէն ջանք թափեց մեր կարիքները հոգալու, իր ցուցարերած ջերմ աջակցութեան համար նկարչութեան ցուցահանդէսի պատրաստութեան ընթացքին, ինչպէս նաեւ մեր շրջանաւարտներուն յանձնուած նուէրներուն համար:
Շնորհակալութիւն տիկին Կիւլա Գարապաճագեանին որ հագուստներ կարեց հանդէսին համար եւ երաժիշտ պարոն Միհրան Չալիքեանին, որ գեղեցիկ երգ մը յօրինեց յատկապէս 6-րդ դասարանի շրջանաւարտներուն համար:
Յատուկ շնորհակալութիւններ ձեզի սիրելի ծնողներ ձեր համագործակցութեան համար, ինչպէս նաեւ ձեր ցուցաբերած վստահութեան, հայկական մեր այս վարժարանի կատարած առաքելութեան՝ լաւագոյն հայեցի դաստիարակութիւն ջամբելու նորահաս հայ սերունդներուն:
Այս տարեշրջանը դրոշմուած է մեր սիրելի, բարեկիրթ, հեզ ու խոնարհ հանգուցեալ տնօրէնին՝ Բաբգէն Գասապեանի վաղահաս կորուստէն: Իր բազմամեայ ծառայութեամբ մեր վարժարաններուն մէջ սերունդներ դաստիարակեց կրթական մշակի իր առաքելութեամբ: Այս պատճառով, մեր հանդէսը իր յիշատակին կը նուիրենք: Իր ջամբած ծառայութեան հետքերը այս կրթօճախին մէջ անջնջելի պիտի մնան:
Եզրափակելով, կը շնորհաւորենք մեր սիրելի շրջանաւարտները:
Հպարտ ենք ձեր բոլորին յաջողութիւններով, ձեր իւրայատուկ նկարագիրներով ու յառաջդիմութեամբ: Սրտանց կը մաղթենք ձեզի բացառիկ ու նորանոր նուաճումներ: Իրականացնէք ձեր փափաքներն ու երազները, յաջողութիւն ու լուսաշող ապագայ մը ունենաք:
Նաեւ, բարեսիրտ ու բարեկիրթ անձնաւորութիւններ ըլլալով, հայ ազգի արժանի ժառանգորդները դառնաք:
Դուք էք մեր յոյսն ու ապագան:
Բարի արձակուրդ եւ բարի վերամուտ
