Յունաստանի Հայոց թեմակալ առաջնորդը ստացաւ եպիսկոպոսի աստիճան
Բացառիկ հանդիսաւորութեամբ եւ շուքով Մեծի Տանն Կիլիկիոյ Կաթողիկոսութեան միաբանութենէն երեք անդամներ՝ Յունաստանի Հայոց թեմի առաջնորդ գերպ. Տ. Սահակ Ծ. վրդ. Եմիշեան, Քուէյթի եւ շրջակայից Հայոց թեմի կաթողիկոսական փոխանորդ գերպ. Տ. Պետրոս Ծ. վրդ. Մանուէլեան եւ կաթողիկոսարանի դիւանապետ գերպ. Տ. Տաճատ Ծ. վրդ. Աշըգեան, Անթիլիասի մայրավանքին մէջ, Շաբաթ 22 եւ Կիրակի, 23 Փետրուար 2025-ին, ստացան եպիսկոպոսական աստիճան, ձեռամբ Մեծի Տանն Կիլիկիոյ Արամ Ա. կաթողիկոսին։
Յունաստանի թեմէն ներկայ եղաւ պատուիրակութիւն մը, որուն մաս կը կազմէին Ազգային վարչութեան ատենապետը եւ անդամները, Կաթողիկոսարանի Ազգային Կեդր. վարչութեան անդամը, Թեսաղոնիկէի եւ Գոքինիոյ հոգեւոր հովիւները եւ ուխտաւորներ, որոնք մօտէն հետեւեցան հանդիսաւոր արարողութիւններուն ու շնորհաւորեցին Յունաստանի թեմի նօրաօծ առաջնորդ գերշ. Տ. Սահակ եպս. Եմիշեանը։
Հաւատքի խոստովանութիւն ու ուխտի ստորագրութիւն
Շաբաթ, 22 Փետրուարի երեկոյեան, տեղի ունեցաւ երեք միաբաններու հաւատքի խոստովանութիւնը յատուկ արարողութեամբ, որուն նախագահեց Վեհափառ հայրապետը։ Եկեղեցւոյ մէջ մուտքի թափորին, հայրապետական ամպ հովանին բռնեցին Ազգային վարչութեան ատենապետ Թագւոր Յովակիմեան եւ Ազգ. կեդր. վարչութեան անդամ Արմէն Տէրեան։
Խարտաւիլակ հայր սուրբին՝ Տ. Ստեփանոս Ծ. Վրդ. Փաշայեանի առաջնորդութեամբ, ընծայեալները ծնրադիր առաջնորդուեցան դէպի Սուրբ Երրորդութեան խորան, ուր Հայրապետը զանոնք հաւատքի քննութենէ անցուց եւ իր հայրական յորդորները տուաւ անոնց։ Ընթերցուեցան Յունաստանի ու Քուէյթի եւ Շրջակայից թեմերու ազգային երեսփոխանական եւ Կիլիկեան ուխտեալ միաբանութեան կողմէ տրուած վկայագիրներն ու խնդրագիրները։ Նուիրեալները ծնկաչոք ընթերցեցին իրենց ուխտագիրները եւ հրապարակաւ վերահաստատեցին իրենց հաւատարմութիւնը հայ եկեղեցւոյ Մեծի Տանն Կիլիկիոյ Կաթողիկոսութեան պատմական ու դարաւոր Սուրբ Աթոռին, ինչպէս նաեւ իրենց հնազանդութիւնը՝ Վեհափառ հայրապետին եւ ծառայական հաստատակամութիւնը՝ հայ եկեղեցւոյ ու մեր ժողովուրդին։
Հոգեպարար արարողութեան աւարտին, Վեհափառ հայրապետը եպիսկոպոսական իշխանութեան խորհրդանիշ եմիփորոններ զգեցուց անոնց։
Ձեռնադրութիւն եւ օծում
Կիրակի, 23 Փետրուար 2025-ին, Արամ Ա. Վեհափառ Հայրապետը մատուցեց սուրբ եւ անմահ Պատարագ եւ կատարեց եպիսկոպոսական ձեռնադրութիւնն ու օծումը։
Հայրապետական ամպ հովանին կրելու պատիւը ունեցան Պերճ Աբգարեան, Թագւոր Յովակիմեան, Ռազմիկ Գարակիւլեան եւ Արսէն Գալֆայեան։ Նշենք, որ վերջինը եղաւ Յունաստանի Հայոց թեմակալ առաջնորդի եպիսկոպոսական օծման կնքահայրը։
Ս. պատարագի արարողութեան իրենց մասնակցութիւնը բերին Լիբանանի երիտասարդութեան եւ մարմնակրթութեան նախարար ու Ազգային Կեդրոնական Վարչութեան Քաղաքական ժողովի անդամ դոկտ. Նորա Պայրագտարեան, Հայաստանի Հանրապետութեան դեսպան Վահագն Աթաբէկեան, Յունաստանի Հանրապետութեան դեսպան Տեսփինա Քուքուլոփուլու, հիւր հոգեւորականներ, ընծայեալներու ընտանիքները, ազգականները, բարեկամներ եւ հաւատացեալներ։
Վեհափառ Հայրապետը օծեց ճակատն ու աջ ձեռքին բթամատը Տ. Սահակ եպիսկոպոսին, Տ. Պետրոս եպիսկոպոսին եւ Տ. Տաճատ եպիսկոպոսին։ Ապա, Նորին Սրբութիւնը անոնց շնորհեց եպիսկոպոսական գաւազան ու մատանի։ Ձեռնադրութեան ու օծման արարողութեան աւարտին Վեհափառ հայրապետը տուաւ իր հայրապետական պատգամը։
Խօսքը ուղղելով նորընծայ եպիսկոպոսներուն՝ Հայրապետը ըսաւ. «Այսօր դուք դարձաք մեր եկեղեցւոյ իշխանները, սակայն չշփոթէք այս իշխանութիւնը աշխարհի արքունի աստիճաններու հետ։ Դուք պէտք է ըլլաք եկեղեցւոյ ճշմարի՛տ իշխանները, այլ խօսքով անոր սպասաւորները եւ մեր ժողովուրդին ծառաները՝ հետեւելով մեր Տիրոջ՝ Յիսուս Քրիստոսի օրինակին։ Հայ Եկեղեցւոյ Մեծի Տանն Կիլիհիոյ Կաթողիկոսութիւնը, իր Միաբանութեամբ, այսպէս ըմբռնած է ու կ՚ըմբռնէ ընդհանարպէս հայ հոգեւորականին եւ մանաւանդ եպիսկոպոսին դերը։ Իշխա՛ն, այո՛, սակայն իշխանաբա՛ր ծառայելու, ինչպէս Քրիստոս Ի՛նք ծառայեց», շեշտեց Հայրապետը։ «Իմ սպասումս է, որ մեր երեք նորընծայ եպիսկոպոսները այս գիտակցութեամբ ու նուիրումով, իրենց դիմաց ունենալով իշխաններու Իշխանը ու ծառաներու Ծառան՝ Քրիստոսը, եւ լսելով Անոր պատգամը, երթան իրենց վստահուած ծառայական դաշտ եւ Աւետիարանի սկզբունքներով, արժէքներով ու ճշմարտութիւններով ծառայեն Աստուծոյ, ծառայեն մեր ժղովուրդին եւ ծառայեն մեր Հայրանիքին։ Ահաւասիկ հոգեւորականներուս կոչումը. ահաւասիկ մեր եկեղեցւոյ եւ Մեծի Տանն Կիլիկիոյ Կաթողիկոսութեան Միաբանութեան սրբազան կոչումը», եզրափակեց իր պատգամը Նորին Սուրբ Օծութիւնը։
«Ողջոյն»-ի պահուն, Վեհափառ հայրապետն ու միաբան հայրերը նորաօծ եպիսկոպոսներուն միւռոնադրոշմ ճակատն ու ձեռքերը համբուրելով՝ շնորհաւորեցին զանոնք եւ արդիւնաբեր ու պտղալի ծառայութիւն մաղթեցին։
Ապա, տեղի ունեցաւ նորաօծ եպիսկոպոսներուն ճակատի ու ձեռքի լուացումը։ Տ. Սահակ եպիսկոպոսին ճակատն ու ձեռքը լուացին կնքահայր Արսէն եւ Վերոնիկ Գալֆայեաններ։
