Շաբաթ՝ 27 Մայիս 2017ի երեկոյեան ժամը 7։30ին, Գոմոթինիի Ս. Գրիգոր Լուսաւորիչ եկեղեցւոյ Թաղային Խորհուրդի եւ Հայ Մշակութային Միութեան նախաձեռնութեամբ, Բալիա Նոմիքի համալսարանի սրահին մէջ տեղի ունեցաւ պրն. Սարգիս Աղապատեանի Tα αρμενικά επώνυμα έχουν την δική τους ιστορία գիրքին ներկայացումը։
Ներկայ էին փոխ-քաղաքապետը, Մետրապոլիտի ներկայացուցիչ վարդապետը, հոգեւոր հովիւը, պետական կրթական գրասենեակի պատասխանատուն, քաղաքապետարանի մշակութային բաժնի պատասխանատուն, Հ.Յ.Դ. Կ. Կոմիտէի անդամը, Թաղային Խորհուրդներու ատենապետեր եւ անդամներ, համալսարանական ուսուցիչներ եւ աշակերտներ ու գնահատելի թիւով ժողովուրդ։
Ձեռնարկը վարեց լեզուաբան տիկ. Ճէնի Գացարի-Վաֆիատի։ Իսկ գիրքի ներկայացումը կատարեց լեզուաբանութեան փրոֆեսոր պրն. Սերղիս Մանոլիս։ Ողջոյնի խօսքերով հանդէս եկան Գոմոթինիի Թաղային Խորհուրդի ատենապետ պրն. Ստեփան Մատթէոսեան, Հայ Մշակութային Միութեան ատենապետուհի տիկ. Ճէնի Գասապեան եւ համալսարանի լեզուաբան փրոֆեսոր տիկ. Մարիա Տիմասի։ Այս վերջինը մեծապէս գնահատեց Գոմոթինիի հայկական գաղութի տարած հոգեւոր, ազգային ու մշակութային աշխատանքները։
«Տիմոքրիթիօ» համալսարանի լեզուաբանութեան փրոֆեսոր տիկ. Թէոտորիտու Ղարիֆալիա ներկայացուց պրն. Սարգիս Աղապատեանի եւ պրն. Սերղիս Մանոլիսի կենսագրականներն ու հրատարակչական աշխատանքները։ Ետքը, փրոֆեսոր պրն. Մանոլիս մանրամասնօրէն անդրադարձաւ գիրքին եւ բաղդատական մը ըրաւ յունական մականուններու պարագային հետ։ Ան ապա գնահատեց հեղինակին աշխատանքը՝ զայն նկատելով կարեւոր եւ արժէքաւոր։
Աւարտին, պրն. Սարգիս Աղապատեան շնորհակալութիւն յայտնեց Գոմոթինիի Թաղային Խորհուրդին եւ Հայ Մշակութային Միութեան՝ ձեռնարկի կազմակերպման համար։ Շնորհակալութիւն յայտնեց նաեւ ներկայացումը կատարած լեզուաբաններուն։
Ձեռնարկի եզրափակումէն ետք, Թաղային Խորհուրդն ու Հայ Մշակութային Միութիւնը պաշտօնական ճաշկերոյթով պատուեցին հիւրերը։
ԹՂԹԱԿԻՑ
