Պարէտ Քհնյ. Խաչերեան
Մեծ պահոց վեցերորդ Կիրակին կը կոչուի Գալստեան Կիրակի։ Մեր եկեղեցւոյ մեծ հայրապետներուն համաձայն, այդ օրը ունի իր յատուկ բացատրութիւնը, իմաստն ու պատգամը ուղղուած բոլոր քրիստոնէաներուն։ Գալստեան Կիրակին, Յիսուսի երկրորդ գալուստին բարի լուրը փոխանցող օրն է:
Հայց. Առաքելական եկեղեցին, Մեծ պահոց կիրակիներու արարողութեանց ընթացքին, աղօթքներու ու քարոզներու ճամբով, հաւատացեալները հոգեպէս ու մտապէս կը պատրաստէ ու կը զօրացնէ կեանքի դժուարութիւնները դիմագրաւելու։ Սակայն վեցերորդ Կիրակի օրուան Գալստեան խորհուրդը, մեր բոլորին դիմաց կը յառաջացնէ երկու հիմնական ու յաջորդական խորհուրդներ։
Արարիչն Աստուած, ժամանակի ընթացքին տեսաւ թէ Իր իսկ ստեղծած մարդը, արդարութեան ու ճշմարտութեան ուղղիէն սկսած էր շեղիլ ու մոլորիլ։ Իր իսկ ստեղծած մարդը մեղքերու մէջ ընկղմելով, հոգեմտաւոր ու բարոյական մեծ անկումի անդունդին մէջ կը գտնուի։ Ուստի Իր որդին՝ Յիսուս առաքեց աշխարհ, մարդու փրկութեան համար։ Հետեւաբար Յիսուս իր առաջին գալուստով եկաւ որպէս սիրոյ ու խաղաղութեան թագաւոր։ Հետեւաբար Անոր մարդեղութեամբ, փրկագործութեան երկնային ծրագիրը իրականացուց:
Յիսուսի յարութենէն ետք, քրիստոնէական վարդապետութիւնը իր հետեւորդներուն քարոզեց Յիսուսի երկրորդ գալուստին մասին։ Անոնց մէջ հաստատեց Յիսուսի երկրորդ գալստեան գաղափարն ու հաւատքը։ Բայց երկրորդ գալուստը պիտի ըլլայ այլ նպատակով ու ձեւով։
Յիսուս իր երկրորդ գալուստով, պիտի ներկայանայ որպէս արդար դատաւոր, ողջերն ու մեռելները դատելու համար:
Յիսուս իր առաջին գալուստով մարդը փրկեց, իսկ երկրորդ գալուստով պիտի դատէ բոլոր անոնց, որոնք Աստուածային պատգամներուն հանդէպ անհնազանդ գտնուեցան: Յիսուսի երկրորդ գալուստը, ուրախութիւն եւ գոհունակութիւն պիտի պատճառէ բոլոր անոնց, որոնք Անոր հաւատացին եւ հետեւեցան։
Մեր Տէրը պատգամեց հետեւեալը. «Երբ երթամ եւ ձեզի համար տեղ պատրաստեմ, դարձեալ պիտի գամ եւ ձեզ քովս առնեմ, որպէսզի ըլլաք հոն՝ ուր ես կը գտնուիմ» (Յհ 14.3):
Յիսուսի երկրորդ գալուստը, մարդուն ուղղուած երկնային խոստում մըն է։ Սա կը նշանակէ, թէ Անոր յարութեամբ քրիստոնէական վարդապետութիւնը վերջ չգտներ այլ կրօններու նման։ Քրիստոնէական վարդապետութիւնը, յատուկ պարագայի կամ ժամանակի ուսուցում մը չէ։ Այլ բոլոր ժամանակներու առաքինի կեանք մը ապրելու ուղղեցոյց։ Ըստ Ս. Գիրքին, Յիսուսի երկրորդ գալուստը պիտի ըլլայ յանկարծակի կերպով: Եւ այս մասին, Յիսուս առիթով մը ակնարկեց իր առաքեալներուն ըսելով. «Արթուն մնացէք եւ պատրաստ եղէք. որովհետեւ չէք գիտեր թէ ձեր Տէրը երբ կու գայ» (Մտ 24.42-44):
Արդարեւ մեր Տիրոջ՝ Յիսուսի երկրորդ գալուստին գաղափարը կը հանդիսանայ քրիստոնէական վարդապետութեան առանցքը: Եթէ այս հիմնական ճշմարտութիւնը կորսնցնենք, մեր հաւատքն ու կեանքի իմաստը կորսնցուցած կ’ըլլանք: Իսկ եթէ այս հաւատքով ապրինք, մեր մէջ կ’ապրի նաեւ զՅիսուս։ Եւ Անոր ներկայութիւնը մեզի կը պարգեւէ մտային հանգստութիւն, հոգեկան խաղաղութիւն եւ գոհունակութիւն։
Մեծ Պահոց Գալստեան Կիրակիին պատգամը, մեզի կը մղէ ապրելու մարդկային արժանիքներով հարուստ կեանք մը։ Այլ խօսքով Աստուածահաճոյ կեանք մը։ Օրուան խորհուրդը մեզի կը քաջալերէ, Ս. Աւետարանի համաձայն, արդարութեան ու ճշմարտութեան ոգիով մարդավայել կեանք մը ապրելու։ Առաւել եւս, քրիստոնէական հաւատքի վահանով զինուելու, որպէսզի կարողանանք վանել չարին արձակած նետերը եւ պատրաստ ըլլանք դիմաւորելու Տիրոջ երկրորդ Գալուստը։ Ի վերջոյ, երանի արդարներուն ու ճշմարիտներուն, որոնք արժանի պիտի ըլլան Յիսուսի երկրորդ գալստեան։ Որովհետեւ անոնք բախտը պիտի ունենան ապրելու Տիրոջ ներկայութիւնը եւ ստանալու Անոր օրհնութիւնը։
