Ընդառաջելով Նիքիայի քաղաքապետարանի հրաւէրին, Գոքինիոյ Ս. Յակոբ եկեղեցւոյ հոգեւոր հովիւ Տ. Պարէտ քհնյ. Խաչերեան եւ Թաղային խորհուրդի գանձապահ պրն. Գարլօ Գույումճեան, Չորեքշաբթի, 25 Մարտ 2026-ի առաւօտեան ժամը 10։30-ին, ներկայ գտնուեցան «Օսիա Քսէնի» հրապարակի յուշարձանին առջեւ, ուր տեղի ունեցաւ Յունաստանի ազգային տօնին առթիւ հոգեհանգստեան արարողութիւնը, օրուան պատգամի փոխանցումը եւ դափնեպսակներու զետեղումը։
Պրն. Գույումճեան Ս. Յակոբ եկեղեցւոյ կողմէ զետեղեց դափնեպսակ մը։ Ետքը տեղի ունեցաւ աշակերտական ու սկաուտական տողանցքը, որուն մաս կազմեցին նաեւ Հ.Մ.Ը.Մ.ի Գոքինիոյ մասնաճիւղի սկաուտական խումբը։
Նաեւ յանուն շրջանի յունահայ համայնքին՝ դափնեպսակ զետեղեց Գէորգ Աւագեան:
Աւարտին հոգեւոր հովիւն ու Թաղային խորհուրդի անդամը մեկնեցան «Զաւարեան» կեդրոն, ուր տեղի ունեցան սկաուտներու դրօշակի արարողութիւն եւ աստիճաններու բարձրացում։ Տ. Պարէտ քահանայ հայրը, շնորհաւորեց յունաց ազգային տօնին առթիւ սկաուտական կազմի ներկայութիւնն ու պատուաբեր տողանցքը։
ԹՂԹԱԿԻՑ
***
Նէա Զմիռնիի շրջանէն ներս, յունաց ազգային տօնին առիթով, յունաց Այ. Ֆոթինի եկեղեցւոյ մէջ տեղի ունեցաւ Գոհաբանական մաղթանք, ապա դափնեպսակներու զետեղում եւ տողանցք, Նէա Զմիռնիի կեդրոնական ճամբուն վրայ:
Նէա Զմիռնիի «Էսթիա» հրապարակին վրայ յուշարձանին առջեւ տեղի ունեցաւ դափնեպսակներու զետեղումը, ուր յանուն շրջանի յունահայ համայնքին՝ դափնեպսակ զետեղեց Գրիգոր Ճանիկեան։
Ապա տեղի ունեցաւ աշակերտական ու սկաուտական տողանցք, որուն մաս կազմեց Հ.Մ.Ը.Մ.ի Աթէնքի մասնաճիւղի սկաուտական խումբը։
Տողանցքէն ետք բոլորը հաւաքուեցան Ֆիքսի ակումբը, ուր տեղի ունեցան սկաուտներու դրօշակի արարողութիւն եւ աստիճաններու բարձրացում։
ԹՂԹԱԿԻՑ
***
Յունաստանի 25 Մարտի ազգային տօնին առիթով, Չորեքշաբթի, 25 Մարտ 2026-ին, Աթէնքի, Գոքինիոյ եւ Թեսաղոնիկէի Հ.Մ.Ը.Մ.-ի սկաուտական մասնաճիւղերու քոյրերն ու եղբայրները տողանցեցին իրենց շրջաններէն ներս:
