Մեծի Տանն Կիլիկիոյ Կաթողիկոսութիւնը դատ կը բանայ Մարդկային Իրաւանց Եւրոպական Դատարանին մօտ` պահանջելով Սիսի կաթողիկոսարանին վերադարձը
Երեքշաբթի՝ 6 Դեկտեմբեր 2016ին, Մեծի Տանն Կիլիկիոյ Կաթողիկոսութիւնը դատ բացաւ Մարդկային Իրաւանց Եւրոպական Դատարանին մօտ` պահանջելով Սիսի պատմական կաթողիկոսարանի վերադարձը: Ինչպէս ծանօթ է, շուրջ երկու տարիներու վրայ տարածուած աշխատանքէ ետք, 28 Ապրիլ 2015ին Մեծի Տանն Կիլիկիոյ Կաթողիկոսութիւնը Թուրքիոյ Սահմանադրական Դատարանին մօտ դատ բացած էր վերոյիշեալ պահանջով:
Սահմանադրական Դատարանը իր կարգին դիմած էր Թուրքիոյ արդարադատութեան նախարարութեան` ունենալու անոր կարծիքը: Վերջինս թելադրած էր մերժել դատը` զայն Սահմանադրական Դատարանին իրաւասութեան սահմաններէն դուրս նկատելով: Հետեւաբար, Մեծի Տանն Կիլիկիոյ Կաթողիկոսութիւնը որոշեց դիմել Մարդկային Իրաւանց Եւրոպական Դատարանին, Սթրազպուրկի մէջ (Ֆրանսա):
Չորեքշաբթի՝ 7 Դեկտեմբեր 2016ին, Պրիւքսէլի (Պելճիքա) մամլոյ ակումբին մէջ, կէսօրէ ետք տեղական ժամանակացոյցով ժամը 1:00ին, տեղի պիտի ունենայ մամլոյ ասուլիս` մասնակցութեամբ տեղական ու միջազգային մամլոյ գործակալութիւններու, քաղաքական պատասխանատուներու եւ ոչ-կառավարական կազմակերպութիւններու ներկայացուցիչներուն: Մամլոյ ասուլիսին պիտի մասնակցին Վեհափառ Հայրապետին ներկայացուցիչը, Պրիւքսէլի Հայ Դատի գրասենեակին տնօրէնը եւ յիշեալ դատը հետապնդող իրաւաբաններու խմբակէն հինգ անձեր: