Առաջնորդ Հայր Սուրբին օրհնութեան խօսքը
Իմաստասիրական աշխարհի մայրաքաղաքէն՝ Աթէնքէն, Քրիստոնէական հաւատքով եւ իմաստութեան կանթեղի անմար ճրագի յոյսով, Ազգային Առաջնորդարանէն կ’ողջունեմ մեր դպրոցներու Ուսումնական խորհուրդը, ազգային բարերարները եւ բարեկամները, տնօրէնները, ուսուցիչները, աշակերտները եւ նուիրեալ ծնողները։
Արդարեւ՝ հայ դպրոցը եւ հայեցի դաստիարակութիւնը տարուէ տարի նոր մարտահրաւէրներու դիմաց կը գտնուի։ Հակառակ ծառացած դժուարութիւններուն, ուրախալի է տեսնել, թէ մեր դպրոցներուն դռները դարձեալ կը բացուին հայ աշակերտին դիմաց։ Սրբազան առաքելութիւն է հայու ոգիով եւ իմաստութեամբ թրծել մատղաշ սերունդը։ Կը գնահատենք այն բոլոր նուիրեալ ծնողները, որոնք «այրի կնոջ» լումային օրինակով ազգին գանձանակին կը նուիրեն ամէնէն թանկագինը՝ իրենց զաւակները։ Մեր խոր համոզումն է, որ սփիւռքը իր շարունակական գոյութիւնը կը պարտի հայ Եկեղեցւոյ կողքին հայ Ամէնօրեայ, Շաբաթօրեայ եւ Կիրակնօրեայ դպրոցներուն։ Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոսը կը շեշտէ, «Հայ դպրոցը իր հայ քրիստոնեայ դաստիարակելու առաքելութեամբ կենսական հաստատութիւններէն մէկն է մեր համայնքային կեանքին մէջ, որոշիչ դեր ունենալով Հայ ինքնութեան ձեւաւորման մէջ»։
Յունաստանի մեր հայ համայնքը տարիներ շարունակ ջամբեց հայեցի դաստիարակութիւն եւ թրծեց հայու նկարագիր։ Այսու կը գնահատենք եւ կ’օրհնենք մեր Ուսումնական խորհուրդը, Կապոյտ Խաչի անդամուհիները, բարերարներն ու կամաւորները։
Թող ամենաբարի Աստուծոյ օրհնութեամբ եւ Մաշտոցեան շունչով լեցուին մեր աշակերտները, ուսուցիչները պարուրուին դաստիարակելու անսպառ կորովով եւ տնօրէնները ապագայի տեսիլքով կազմակերպեն մեր դպրոցները:
Աղօթարար՝
Սահակ Ծ. Վրդ. Եմիշեան,
Առաջնորդ Յունաստանի Հայոց Թեմի
