Կիրակի, 23 Մարտ 2025-ի կէսօրուան ժամը 1-ին, Գոքինիոյ Ս. Յակոբ եկեղեցւոյ սրահին մէջ, Տիկնանց մարմնոյ կազմակերպութեամբ, տեղի ունեցաւ Մեծ Պահոց Միջինքի ճաշկերոյթը։
Ուրախութեամբ կը յայտնենք, թէ եկեղեցւոյ սրահը լրիւ լեցուն էր քաջալերող հաւատացեալներով։ Ներկայ էին Տ. Ներսէս վրդ. Սաքայեան, շրջանի միութիւններու ներկայացուցիչներ եւ հաւատացեալներ։
Եկեղեցւոյ հոգեւոր հովիւ Տ. Պարէտ քհնյ. Խաչերեան օրհնեց սեղանը, ապա խօսք առնելով յանուն Ս. Յակոբ եկեղեցւոյ Թաղային խորհուրդին ու Տիկնանց մարմնոյ բարի գալուստ մաղթեց ներկայ ժողովուրդին։ Ան յայտնեց, թէ քառասնօրեայ Մեծ Պահքի ուղեւորութեան կիսուն արդէն կը մօտենանք, զոր կը կոչուի Միջինք։ Աւանդութիւն դարձած այդ օրը, ունի իր յատուկ նշանակութիւնը եւ պատգամը, տնօրինուած մեր եկեղեցւոյ մեծ հայրապետներուն կողմէ։
Պահք բռնող հաւատացեալներուն մօտ, Միջինքը կը ներկայանայ որպէս քաջալերող ուժ, միեւնոյն հաւատքով շարունակելու համար պահեցողութեան մնացեալ ժամանակաշրջանը։ Իսկ պահք չբռնողներուն համար, Միջինքը հրաւէր մըն է, միանալու պահեցողներու խումբին եւ զօրացնելու իրենց հաւատքը։ Աւարտին ան խորապէս շնորհակալութիւն յայտնեց ներկաներուն, որոնք եկած էին քաջալերելու Տիկնանց մարմնոյ ձեռնարկը։
Ապա ներկայ ժողովուրդը, հայկական ու ընկերային գեղեցիկ մթնոլորտի մը մէջ ճաշակեց Տիկնանց մարմնոյ կողմէ յատուկ կերպով պատրաստուած պահքի տեսակաւոր ու համեղ ճաշերը եւ քաղցրեղէնը։
Աւարտին ներկաները մեծապէս գնահատեցին Տիկնանց մարմնոյ անդամները եւ մաղթեցին անոնց յաջողութիւն իրենց եկեղեցանուէր առաքելութեան մէջ։
Հարկ է նշել, թէ Տ. Պարէտ քհնյ. Խաչերեան, յանուն Ս. Յակոբ եկեղեցւոյ Տիկնանց մարմնոյ, շնորհակալութիւն յայտնեց տիկ. Կարինէ Մխիթարեանին, որ ճաշկերոյթին նուիրած էր ուտեստեղէնի երկու տեսակներ։
ԹՂԹԱԿԻՑ
