Հ.Գթ.Խաչի 49-րդ Պատգամաւորական ժողովը տեղի ունեցաւ Կիրակի, 26 Յունուար 2025-ին, Թեսաղոնիկէի «Տէր Զաքարեան» սրահէն ներս։ Բացումը կատարեց շրջանաւարտ Շրջանային վարչութեան ատենապետուհի ընկ. Նուարդ-Վերոն Ղալիլէա։
Ժողովին ողջոյնի խօսքով հանդես եկան Թեսաղոնիկէի Ս. Աստուածածին եկեղեցուոյ հոգեւոր հովիւ Եղիա վրդ. Մալխասեան, Հ.Յ.Դ. Յունաստանի Կեդրոնական կոմիտէի կողմէ ընկ. Կարօ Նատեան եւ Թաղային խորհուրդի ներկայացուցիչ ընկ. Մարգրիտ Գոստիկեան, որոնք արժեւորեցին միութեան երկարամեայ ծարայութիւնը Հիւսիսային Յունաստանի համայնքներէն ներս եւ անշուշտ համայն հայութեան անցեալի եւ ներկայ մարտահրաւերներու նկատմամբ։
Հ.Օ.Մ.-ի Կեդրոնական վարչութեան կողմէ ներկայ էր ընկ. Լիզա Ժիլիպեր Չալըքեան, որ Եւրոպայի մէջ գործող Հ.Օ.Մ.-ական միաւորներու պատասխանատուն է։ Ընկերուհին մատնանշեց շրջանիս միօրեայ վարժարաններու արժէքը եւ ամառանոցի վերամուտը, աշխատանքներու առաքելութիւնը, ապա ներկայացուց Հ.Օ.Մ.-ի համահայկական ծրագրերու շարքը, մանաւանդ արցախահայութեան, Սուրիոյ եւ Լիբանանի պարագային, որ կը մնան միութեան առաջնահերթ գործունէութեան կիզակէտը։
Ընկ. Չալըքեան յայտարարեց ժողովականներուն, որ Կեդրոնական Վարչութիւնը կը նուիրէ 50.000 եւրօ ամառանոցի աշխատանքներու կատարելագործութեան ի խնդիր, խօսք մը, որ մեծ խանդավառութիւն եւ յուզմունքալից մթնոլորտ ստեղծեց ժողովականներուն։
Նշենք, որ ընկ. Լիզա Չալըքեան այցելեց Մալագեան-Գասպարեան ծաղկոցը, ուր հանդիպում ունեցաւ ուսուցչական կազմին հետ, իսկ անկէ ետք՝ ամառանոցը, ուր ներկայացուեցան ըլլալիք աշխատանքները, որոնց աւարտին հիմնարկը պիտի ստանայ պետական օրինականացում, որպէս երեխաներու ճամբար։
Ժողովի աւարտին ընտրուեցաւ նոր Շրջանային վարչութիւն, որ կը բաղկանայ հետեւեալ ընկեր-ընկերուհիներէն՝ Նուարդ-Վերոն Ղալիլէա, Անուշ Պապոյեան, Կիւլա Պեքտաշեան, Աննա Խասափի, Ռուզաննա Զօհրապեան, Պետրոս Հալաճեան եւ Յովիկ Գասապեան։
ԹՂԹԱԿԻՑ
