Կազմակերպութեամբ՝ Հ.Յ.Դ. Յունաստանի Երիտասարդական միութեան Կեդրոնական վարչութեան Կիրակի, 28 Յուլիս 2024-ի առաւօտեան, Աթէնքի Ս. Գրիգոր Լուսաւորիչ եկեղեցւոյ մէջ հոգեհանգստեան պաշտօն տեղի ունեցաւ 1983-ին Լիզպոնի մէջ նահատակուած հինգ քաջարի երիտասարդներուն յիշատակին։
Անձնազոհ երիտասարդ նահատակներու յիշատակը յարգելու համար, եկեղեցւոյ մէջ ներկայ եղան մեծ թիւով Հ.Յ.Դ. Երիտասարդական միութեան անդամներ, Ազգային վարչութեան ներկայացուցիչը, Հ.Յ.Դ. Յունաստանի Կեդր. կոմիտէի, շրջաններու կոմիտէներու, Հ.Կ.Խաչի, Հ.Մ.Ը.Մ.-ի եւ Համազգայինի անդամներ, ինչպէս նաեւ մեծ թիւով հայրենակիցներ, որոնք եկած էին յարգելու անոնց անմար յիշատակը։
Պատարագեց եւ քարոզեց Աթէնքի հոգեւոր հովիւ հոգշ. Տ. Եզրաս վրդ. Թէնէքէճեան:
Հոգեհանգստեան պահուն, եկեղեցւոյ դասին մէջ զետեղուած էին 5 տղոց նկարները, ինչպէս նաեւ Եռագոյն եւ Հ.Յ.Դ. դրօշակները։
Հոգեհանգիստի արարողութեան աւարտէն ետք, Հ.Յ.Դ. Երիտասարդական միութեան Կեդր. Վարչութեան անդամ ընկ. Սերճիօ Մանկոյեան, խօսքը ուղղեց ներկաներուն, որը կը հրատարակենք ստորեւ:
***
1983 թ. Յուլիս 27 — 2024 թ. Յուլիս 27
Այս տարի կը լրանան 41 տարիներ հինգ երիտասարդներու հերոսական զոհաբերութենէն՝ Արա Քրճլեան, Սեդրակ Աճեմեան, Սարգիս Աբրահամեան, Վաչէ Տաղլեան եւ Սիմոն Եահնիեան:
Այսօրուայ հոգեհանգիստ/հաւաքը տխրութեան եւ սուգի հոգեհանգիստ մը չէ, այլ՝ պատուի եւ հպարտութեան յիշատակում է: Մենք ամենաբարձր մակարդակով կը պատուենք Լիզպոնի հինգ երիտասարդներու զոհաբերութիւնը եւ հերոսական բողոքի քայլը, որով կարողացան լոյս բերել Հայոց ցեղասպանութեան ճանաչման հարցին վրայ։
Արա Քրճլեան, Սեդրակ Աճեմեան, Սարգիս Աբրահամեան, Վաչէ Տաղլեան եւ Սիմոն Եահնիեան, հինգ երիտասարդներ՝ իրենց երազանքներով ու յոյսերով, որոնք ընտրեցին դիմադրութեան եւ զոհաբերութեան դժուար ճանապարհը: 1983 թ. Յուլիս 27-ին, յարձակում գործեցին Լիզպոնի թրքական դեսպանատան վրայ ու անձնասպանութեան դիմեցին՝ նպատակ ունենալով Հայկական ցեղասպանութեան հարցը յիշեցնել աշխարհին: Իրենց գործը առասպելական էր, զոհաբերութեան եւ պայքարի ճամբով: Քաջ արարք մը, որ նոր «զէնքեր» տուաւ հայութեան ու աշխարհին պարտադրեց արդարութեան համար մղուած հայութեան պայքարի ճանաչումը։ Նոյն պահուն յոյս եւ հաւատք ներշնչեց հայութեան, յիշեցնելով բոլորին գիտակից պայքարի եւ ազգային բարձր նպատակներու հանդէպ նուիրուածութեան ուժը: Անոնք երազեցին ազատ, անկախ ու միացեալ Հայաստանի իրականացումը, որ լոզունգէ մը շատ աւելին դարձաւ իրենց համար։
Գիտենք, որ ժամանակները փոխուած են, սակայն պայքարը կը մնայ նոյնը, դեռ աւելի դժուար պայմաններու մէջ, թուրք եւ ազերի շրջանակներուն կողմէ տարածուած կեղծիքներուն ու ճնշումներուն պատճառով։
Այսօր սակայն հայ երիտասարդութիւնը կը լսէ Լիզպոնի հինգ տղոց պատգամը։ Մնալ քաջ, մնալ գիտակից, մնալ պահանջատէր եւ սկզբունքային։
Մենք պիտի չմոռնանք հինգ հերոս երիտասարդներուն զոհաբերութիւնը։ Հ․Յ․Դ․ Երիտասարդական միութիւնը երբեք պիտի չի մոռնայ իրենց կատարած քաջարի արարքը ու պիտի շարունակէ պայքարիլ Արայի, Սեդրակի, Սարգիսի, Վաչէի եւ Սիմոնի երազած իրականութեան համար։
Յիշենք, որ արդարութիւնը եւ ազատութիւնը տրուած չեն, այլ կը կերտուին շարունակական պայքարով եւ զոհաբերութեամբ։
Յարգանքի այս օրը մենք շարունակենք երգել իրենց երգած երգը, այդ երգը, որ նահանջ չի ճանչնար, այդ երգը, որ պարզ մարդը կը դարձնէ հերոս։ Ու դառնանք պահանջատէր՝ կերտելու համար աշխարհ մը, ուր իւրաքանչիւր մարդկային կեանք արժէք պիտի ունենայ, եւ ճշմարտութեան որեւէ ոտնահարում՝ պայքարի պատճառ պիտի դառնայ: Թող չմնանք անտարբեր մեր ժողովուրդի հանդէպ գործուած անարդարութիւններուն նկատմամբ:
Եկէ՛ք պայքարինք:
Եւ շարունակենք պայքարիլ, մինչեւ այդ օրը երբ աշխարհը պիտի դառնայ այնպիսին, ինչպէս իրենք՝ Լիզպոնի հինգ հերոսները երազեցին ու պայքարեցան անոր համար։ Որովհետեւ Հայ դատի պայքարը՝ մեր ազգին համար արժանապատուութեան եւ արդարութեան համար մղուած պայքար է։
Շնորհակալ եմ:
