Նոյեմբեր 8-էն 10, Հ.Կ.Խաչի «Ռուբինա» մասնաճիւղի վարչութիւնը կազմակերպած էր երկօրեայ պտոյտ մը դէպի Յունաստանի տեսարժան վայրերէն՝ միջազգային համբաւ ունեցող Մեթէօրա անուն շրջանը եւ անոր յարակից գեղատեսիլ վայրեր։
Երկօրեայ այս պտոյտը հանդիսացաւ ընթացիկ ու սովորական առօրեայէն դուրս գալու, ընկերական ու ընկերային մտերմիկ եւ ուրախ մթնոլորտի մէջ երկու օրեր անցընելու իրապէս հաճելի առիթ մը։
Պտոյտին համար ընտրուած տարբեր վայրերը, սքանչելի բնութիւնը եւ շրջապատի մթնոլորտը բոլոր մասնակիցներուն մօտ առաջացուցին ուրախ եւ գոհունակ տրամադրութեամբ յագենալու հոյակապ պահեր։
Բոլոր մասնակիցներուն մօտ ալ զգալի էր գոհունակութիւնը՝ ի տես վարչական, օրուան պատասխանատու եւ կազմակերպիչ ընկերուհիներուն բծախնդիր աշխատանքին։
Ակնյայտօրէն գնահատանքով ընկալուեցան վարչութեան ըկերուհիներուն ցուցաբերած սիրալիր եւ հոգատար վերաբերմունքը անխտիր բոլոր մասնակիցներուն նկատմամբ։
Մեր ընկերուհիները եղան ամէն վայրկեան պատրաստ պտոյտը վերածելու հաճելի երկօրեայի մը։
Ինչպէս որ վարչական ընկերուհիներ Ալմաստ Մելիքեանի եւ Ծովիկ Մինասեանի կողմէ լուսաբանուեցաւ՝ ծրագիրը կ՛ընդգրկէր այցելութիւն Լիմնի Փլասթիրա, Մեթէօրա, Թրիքալա, Փերթուլի եւ Էլաթի։ Բոլորն ալ գեղատեսիլ, հիանալի անտառներով շրջապատուած վայրեր, որոնք աչք ու հոգի կը լեցնեն իրենց սքանչելի եւ բացառիկ տեսարաններով։
Պտոյտի ծրագրին մաս կը կազմէր, նաեւ, այցելութիւն՝ «Բնութեան պատմութեան սունկի թանգարան»-ը, նախապէս առնուած յատուկ ժամադրութեամբ։ Այստեղ է, որ ծանօթացանք սունկերու տեսակներու, եւ տեղեկացանք անոնց աճման ու ընդհանրապէս անոնց օգտակարութեան մասին։
Հոն տեսանք նաեւ այս լեռներուն եւ անտառներուն մէջ դարերով ապրած ու այժմ անհետացած տեսակաւոր անասուններու եւ թռչնազգիներու զմռսուած նմոյշներ։
Լաւ եւ օգտակար մտածում էր, միաժամանակ, մեր այցելած վայրերուն մասին ծանօթացման եւ պատմական տեղեկութեանց փոխանցումը, որ ձեռնհասօրէն կատարուեցաւ ընկերուհի Հայկուհի Եաղճեանի կողմէ։
Այսպէս, օրինակ, ընկերուհիի տուած տեղեկութեանց համաձայն՝ իմացանք, որ Լիմնի Փլասթիրան արուեստական լիճ է, որ կառուցուած է առաջարկովն ու մտայղացումովը զինուորական, վարչապետ Նիքոլաոս Փլասթիրայի։ Լիճը գոյութիւն ունի 30 Հոկտեմբեր 1960-էն ի վեր։
Ի դէպ, ինք Փլասթիրա մահացած է նախքան լիճի վերջնական գոյառումը։ Անոր մահէն ետք՝ յարգելով Փլասթիրայի ներդրումն ու յիշատակը, լիճը կոչուած է անոր անունով՝ Փլասթիրա։
Իմացանք նաեւ, որ ԻՒՆԵՍՔՕ-ի կողմէ «Համաշխարհային ժառանգութեան ցուցակ»-ին վրայ իր արժանի տեղը գտած Մեթէօրան իր այժմու վերջնական տեսքը ստացած է 18-19-րդ դարերուն։
Անոր բազմաթիւ վանքերուն մէջ բնակած են կրօնաւոր այրեր եւ միայն Այու Սթեֆանու վանքն է, որ 1961-էն սկսեալ յատկացուած է բացառապէս կրօնաւորուհիներու։ Նշենք, որ այս վանքի եկեղեցիին մէջ կը գտնուին 17-րդ դարէն եկած որմնանկարներ։
Եզրակացնելով՝ «Ռուբինա» մասնաճիւղի վարչութեան կազմակերպած երկօրեայ այս պտոյտը հաճելի եւ հետաքրքրական նախաձեռնութիւն մըն էր։
Մասնակիցները գոհ էին, ուրախ եւ յաջորդ պտոյտի սպասումով ցտեսութիւն ըսին իրարու։
Վարձքերնիդ կատար ընկերուհիներ՝ Ալմաստ, Ծովիկ, Այտա եւ Լորա, որ ճիգ չխնայեցիք վարչութեան այս նախաձեռնութիւնը — սկիզբէն մինչեւ աւարտ — դարձնելու հաճելի, օգտակար եւ ուրախ պահերով առլցուն յիշարժան օր մը։
Է.Պ.
