4 տարի անցած է Հայաստանի մէջ տեղի ունեցած Ճամպորիէն, ուր անմոռանալի օրեր անցուցած էինք, ինչպէս նաեւ տխուր բաժանումի պահեր` ամբողջ աշխարհէն համախմբուած մեր քոյրերուն եւ եղբայրներուն հետ:
2018ը բացառիկ տարի մը ըլլալով, տօնելով Հ.Մ.Ը.Մ.ի հիմնադրութեան 100ամեակը, որ կը զուգադիպի Հայաստանի անկախութեան 100ամեակին, դարձեալ առիթը պիտի ունենանք հանդիպելու մեր քոյրերուն ու եղբայրներուն, Հայաստանի մէջ տեղի ունենալիք Հ.Մ.Ը.Մ.ի սկաուտական 11րդ ճամպորիի ընթացքին:
Հ.Մ.Ը.Մ.ի Յունաստանի սկաուտական խումբը, որ կը մասնակցի մեծ թիւով քոյրերով եւ եղբայրներով, դէպի հայրենիք կը մեկնի Չորեքշաբթի՝ 18 Յուլիսի գիշերուան ժամերուն եւ Աթէնք կը վերադառնայ Երկուշաբթի՝ 30 Յուլիսին:
Յունաստանի մեր պատուիրակութիւնը կը բաղկանայ հետեւեալներէն.-
Խմբապետ եղբ. Սիմոն Ասիպեան, փոխ-խմբապետուհի քոյր Արազ Պարսամեան, Վարիչ Առաջնորդ քոյր Ալին Այվազեան, Առաջնորդի աստիճանով քոյրեր Թամար Պարսամեան, Անահիտ Սրապեան, Երուանդ Մանուկեան. ինչպէս նաեւ 14 երէցներ եւ սկաուտներ՝ Գոքինիոյ եւ Ֆիքսի խումբերէն:
Հ.Մ.Ը.Մ.ի Կեդրոնական Վարչութեան ուղղութիւններուն հետեւելով, մօտաւորապէս տասը ամիս, աշխատեցանք արժանավայել ներկայութիւն մը ունենալու համար ճամպորիին, գիտնալով եւ անհամբեր սպասելով այս օրերուն:
Բարի ճանապարհ սիրելի քոյրեր եւ եղբայրներ՝ մաղթելով, որ անմոռանալի յուշերով եւ ազգային հպարտութեամբ վերադառնաք մեր մօտ:
Հ.Մ.Ը.Մ.Ի ՅՈՒՆԱՍՏԱՆԻ ՇՐՋԱՆԱՅԻՆ ՎԱՐՉՈՒԹԻՒՆ
Ի ԴԻՄԱՑ՝ ՇՐՋԱՆԱՅԻՆ ՍԿԱՈՒՏԱԿԱՆ ԽՈՐՀՈՒՐԴԻ