Երկուշաբթի, 5 Յունուար 2026-ին, երեկոյեան ժամը 7-ին, Թեսաղոնիկէի Ս. Աստուածածին եկեղեցւոյ մէջ կատարուեցաւ Ճաշու եւ Երեկոյեան ժամերգութիւն, ինչպէս նաեւ ընթերցուածներու ներկայացում: Ապա, մատուցուեցաւ Ս. Ծննդեան Ճրագալոյցի Ս. Պատարագ:
Երգեցողութիւնը կատարուեցաւ եկեղեցւոյս դպրաց դասին կողմէ, իսկ Ս. Խորանի սպասարկութիւնը՝ սարկաւագներու կողմէ: Պատարագիչ Հայր սուրբը իր քարոզին մէջ անդրադարձաւ Յիսուս Մանուկին Ծննդեան դրուագին: Ան խօսեցաւ երկու հիմնական կերտերու մասին. առաջին՝ Խաղաղութիւն եւ երկրորդ՝ Սէր: Քարոզի աւարտին ան շնորհաւորեց բոլոր հաւատացեալ զաւակներուն Ս. Ծնունդը ու անոնց մաղթեց, որ Աստուած Ի՛ր օրհնութիւնն ու շնորհները առատապէս պարգեւէ իւրաքանչիւրին ընտանիքներուն եւ Յիսուս Մանուկին Ծնունդը առիթ դառնայ մեր իւրաքանչիւրին անձերը վերանորոգելու եւ Յիսուս Քրիստոսի ներկայութեամբ մեր կեանքերը հարստացնելու: Ապա աղօթեց, որ Աստուած մեր հայ ազգի զաւակներուն ամէն տեսակի չարէ, չարիքէ եւ փորձութիւնները հեռու պահէ եւ մեր նահատակ զինուորներուն ծնողները Ս. Հոգւով մխիթարէ ու անոնց արցունքը ժպիտի վերածէ:
Ս. Պատարագի աւարտին, աւանդութեան համաձայն, տեղի ունեցաւ նախատօնակ, ուր սարկաւագներն ու հաւատացեալները միասնաբար երգեցին «Խորհուրդ Մեծ» եւ «Այսօր Տօն է» շարականները: Այդ ընթացքին Հայր սուրբը խորանէն Քրիստոսի լոյսը առնելով փոխանցեց հաւատացեալներուն, որպէսզի իրենց հետ տուն տանին:
Ս. Պատարագէն անմիջապէս ետք, «Տէր Զաքարեան» սրահէն ներս տեղի ունեցաւ եկեղեցւոյս Թաղային Խորհուրդին կողմէ կազմակերպուած գաթայի հատում եւ համեստ հիւրասիրութիւն: Հայր սուրբը խօսք առնելով շնորհաւորեց բոլորին Նոր Տարին եւ Ս. Ծնունդը մաղթելով առողջ, ուրախ եւ յաջողութիւններով լեցուն տարի մը: Ապա Թաղային խորհուրդի ատենապետ Քրիս Ղալիլէաս թաղային խորհուրդի անունով շնորհաւորեց ներկաներուն Նոր Տարին եւ Ս. Ծնունդը:
Գաթայի հատումէն ետք քաղցր սովորութեան համաձայն Հ.Յ.Դ. Երիտասարդական Միութեան Թեսաղոնիկէի «Ս. Թեհլիրեան» խումբի երիտասարդներն ու երիտասարդուհիները խումբերու բաժնուեցան եւ շրջագայեցան մեր հայրենակիցներուն տուները ու Յիսուս Քրիստոսի Ծննդեան Աւետիսը յայտնեցին անոնց:
Երեքշաբթի, 6 Յունուար 2026-ին, առաւօտեան ժամը 10:30-ին, մատուցուեցաւ Ս. Ծննդեան եւ Աստուածայայտնութեան Ս. Պատարագ, որ մատուցեց շրջանիս հոգեւոր հովիւ Տ. Եղիա վրդ. Մալխասեան: Ս. Պատարագին ներկայ էին Թաղային խորհուրդի, Տիկնանց միութեան անդամ-անդամուհիները, շրջանիս գործող բոլոր միութեանց ներկայացուցիչները եւ հաւատացեալներու խուռներամ խումբը:
Ս. Պատարագի աւարտին, եկեղեցւոյ աջակողմը գտնուող Ս. Մկրտարանէն՝ «Լոյս ի լուսոյ» շարականով, սրբալոյս Միւռոնը Ս. Խորան բերուեցաւ եւ շարականներու երգեցողութեամբ, աղօթքներու ընթերցանութեամբ եւ Ս. Միւռոնի հեղումով կատարուեցաւ Ջրօրհնէքի արարողութիւնը: Ս. Խաչի կնքահայրն էր Թաղային խորհուրդիս փոխ-ատենապետ Արամ Էսքիճեան: Ս. Պատարագի աւարտին, եկեղեցւոյ սարկաւագներուն կողմէ մեր ժողովուրդին բաժնուեցաւ օրհնուած ջուր:
ԹՂԹԱԿԻՑ
