ՎԵՐԱՄՈՒՏ
2024-2025 տարեշրջանի պաշտօնական բացումն ու ջրօրհնէքի արարողութիւնը տեղի ունեցաւ 11 Սեպտեմբեր 2024 -ին5 հանդիսապետութեամբ Թեմակալ aռաջնորդ՝ Տ. Սահակ եպս. Եմիշեանի: Ներկայ էին՝ Նէոս Գոզմոսի հոգեւոր հովիւ Տ. Նարեկ քհնյ. Շահինեան, Ազգային վարչութեան, Հ.Կ.Խ.-ի Շրջանային վարչութեան եւ Ուսումնական խորհուրդի ներկայացուցիչներ ու ծնողներ:
ԱՐՁԱՆԱԳՐՈՒԹԻՒՆ ԵՒ ԱՇԱԿԵՐՏՈՒԹԵԱՆ ԹԻՒ
Ա. դասարան 12,
Բ.՝ 18,
Գ.՝ 20:
Ընդհանուր թիւ՝ 50 աշակերտ:
ՈՒՍՈՒՑՉԱԿԱՆ ԿԱԶՄ
Տարեշրջանի առաջին օրէն, ուսուցչական կազմը ներկայացաւ ծառայելու մեր դպրոցէն ներս ու բաղկացաւ հետեւեալներէն (այբբենական կարգով). Եալեռնիու Էքաթերինի՝ տեղեկագիտութեան ուսուցչուհի, Կեքաս Էւանկելոս՝ անգլերէն լեզուի ուսուցիչ, Սափրիչեան Արշալոյս ՝ տնօրէնուհի եւ ուսուցչուհի հայոց լեզուի, գրականութեան եւ պատմութեան, Վլախոփուլու Անտրոնիքի՝ յունաց լեզուի ու գրականութեան եւ պատմութեան ուսուցչուհի, Փափաիլիա Նաւսիքա՝ Ֆրանսերէն լեզուի ուսուցչուհի, Փափատաքու Վասիլիքի՝ մարմնամարզութեան ուսուցչուհի, Փիփերիտու Էլենի՝ իրագիտութեան, տարրալուծութեան, կենսաբանութեան եւ աշխարհագրութեան ուսուցչուհի, Քիւֆթի Ռոտուլա՝ ուսողութեան ուսուցչուհի, Քոլցիտա Ալեքսանտրա՝ յունաց լեզուի ու գրականութեան եւ պատմութեան ուսուցչուհի:
Հոկտեմբերին, կազմին միացաւ երաժշտութեան ուսուցչուհի Պուֆիտու Ֆոթինի, որ Աթէնքի Կրթութեան նախարարութեան Ա. տնօրէնութեան կողմէ տրամադրուեցաւ մեր վարժարանի կարիքները ամբողջացնելու նպատակով:
Վարժարանի տնօրէնութեան կարգադրութեամբ, լրիւ ուսուցչական կազմը հետեւեցաւ տասնհինգ ժամուան տեւողութեամբ ներդպրոցական վերապատրաստման դասընթացքի:
Մասնակցեցանք բազմաթիւ դասընթացներու, թէ՛ խմբովին, թէ՛ անհատապէս:
Այս տարի եւս ուրախութիւնը ունեցանք համագործակցելու Ուսումնական խորհուրդին կողմէ հրաւիրուած պատմաբան եւ կրթական մշակ տիկին Գոհար Գանտահարեանին հետ:
Մասնակցեցանք Race for the cure քայլարշաւին Հ.Կ.Խ.-ի խումբին հետ:
Ուսուցչական կազմի համագործակցութիւնը տնօրէնութեան հետ ամբողջ տարեշրջանի ընթացքին եղաւ ջերմ ու արդիւնաւէտ:
Ուսուցչական կազմի ժողովներ գումարած ենք կեդրոնանալով մեր աշակերտներու կրթական ընթացքին այլեւ անոնց հոգեմտաւոր աճման: Նիստերու տոմարին մէջ անցուցած ենք 39 ատենագրային արձանագրութիւն:
2023-2024 ՏԱՐԵՇՐՋԱՆԻ ՈՒՍՈՒՄՆԱԿԱՆ ԵՒ ԿՐԹԱԿԱՆ ՎԻՃԱԿ
Նկատի առնելով Կրթութեան նախարարութեան կողմէ թելադրուած ներքին արժեւորման ուղղութիւնները, տարեշրջանի սկիզբը ուսուցչական կազմ եւ տնօրէնութիւն ճշդեցինք կրթական թիրախները: Այս տարի կեդրոնացանք մասնաւորաբար հայկական մշակութային ժառանգութեան սպառնացող վտանգներուն, բնապահպանութեան (ծովուն եւ նաւարկութեան եւ մեղուներուն ու մեղուաբուծութեան), Եւրոմիութեան եւ Մարդկային իրաւունքներուն, յանձնառու քաղաքացիի տիպարին եւ մեր պատանի աշակերտներու հոգեկան ամրապնդման: Ուսուցչական կազմը կազմեց խմբակներ, որոնք յանձն առին իրագործել յատկապէս մշակուած ծրագիրներ, ինչպէս յարձակողականութեան կանխարգելման, Աթէնքի նշանակալից շէնքերու պատմութեան, դպրոցական եւ արհեստագիտական կողմնորոշման ծրագիրներ եւ բազմաթիւ աշխատանոցներ: Մեր ծրագիրները կը միտին միշտ մեր պատանիներուն տալ արդիական մեթոտներով, բազմակողմանի, բարձրորակ կրթութեան կողքին, հայեցի դաստիարակութիւն եւ ներշնչել մարդկային բարձր արժէքներ. հայրենասիրութիւն, նուիրուածութիւն, վեհ գաղափարներու համար յարատեւ պայքար, բարձունքներու նուաճում: Ուստի բոլոր ընձեռնուած դաստիարակչական միջոցները ի գործ դրինք, ջանք չխնայելով, որպէսզի բարձր որակի, անկախ ուսուցման պայմաններ ստեղծենք դպրոցէն ներս եւ դուրս:
Այս տարի եւս գործեցին յետ միջօրեայ դաստիարակչական խմբակները՝
Աւանդական պարերու (Երկուշաբթի օրերը, ժամը 14.30-16.00)
Երգչախումբ (Հինգշաբթի օրերը, ժամը 14.30-16.00)
Թատերախումբ (Ուրբաթ օրերը, ժամը 18.30-20.00)
«Մենք» աշակերտական թերթիկի խմբագրութեան (Ուրբաթ օրերը, ժամը 18.30-20.00)
Յոյն ուսուցիչներու համար հայերէնի դասերու (Չորեքշաբթի օրերը, ժամը 14.30-16.00)
Բնապահպանական ծրագրով մը դիմած ենք մասնակցելու Եւրոպական Էրազմիւս նախագիծին:
Տարեշրջանի աւարտին մեր աշակերտութեան ուսումնական վիճակը կ‘ամփոփուի հետեւեալ կերպով.
Վերաքննելի՝ 9, Լաւ՝ 18, Շատ Լաւ՝ 15, Գերազանց՝ 8 աշակերտ:
Ուրախութեամբ կը հրաւիրենք հետեւեալ գերազանց աշակերտները յաջորդ տարեշրջանի յունաց Ազգային տօնի՝ Հոկտեմբեր 28-ի տօնակատարութեան, որպէսզի ստանան Կրթութեան Նախարարութեան կողմէ պարգեւուող վկայագիրներն ու մրցանակները.
Ա. Կարգէն՝ Պարղուտեան Մարի Քրիստին, Բ. Կարգէն՝ Լուլումարի Անայիս եւ Ֆարաճեան Սոնիա, Գ. Կարգէն՝ Եզեկիէլեան Արամ, Լուլումարիս Անտոնիս, Մարտիկեան Ալպեր, Պարղուտեան Վանա, եւ Խաչերեան Կարէն
Ուսուցչական կազմի որոշումով յատուկ ինքնազարգացման գնահատականի կ‘արժանանայ Բ. Կարգէն՝ Ալպերթօ Իոաննիս Ոսկանեան:
ՄՐՑԱՆԱԿՆԵՐ
Ինչպէս ամէն տարի, մեր վարժարանէն ներս տեղի ունեցան Ուսողութեան Ընկերութեան «Թալիս» եւ «Պիւթակորաս» մրցոյթները, որոնց մեր աշակերտները անգամ մը եւս բարձր գնահատանքի արժանացան: Ի մասնաւորի Ալպեր Մարտիկեան եւ Վանա Պարղուտեան գերազանց արդիւնք ունեցան:
Հ. Կ. Խ.-ի Շրջանային վարչութեան կողմէ աւանդութիւն դարձած է Հ.Յ.Դ. Պատանեկան միութեան բանակումի մասնակցութեան մրցանակը, որ կը շնորհուի շրջանաւարտներէն հայագիտական առարկաներուն ամենաեռանդուն ճիգը թափող եւ լաւագոյն արդիւնքը ներկայացնող աշակերտին: Այս տարի մրցանակին կ‘արժանանայ՝ Արամ Եզեկիէլեան:
ՁԵՌՆԱՐԿՆԵՐ, ՆԱԽԱՁԵՌՆՈՒԹԻՒՆՆԵՐ
ԵՒ ԴԱՍՏԻԱՐԱԿՉԱԿԱՆ ԱՅՑԵԼՈՒԹԻՒՆՆԵՐ
Աշակերտութիւնը, ամէն տարուան պէս, տարեշրջանի սկիզբը ընտրեց իր դասարանային եւ դպրոցական վարչութիւնները, որոնց միջոցաւ անոնք աւելի աշխուժ մասնակցութիւն կը բերեն դպրոցի կեանքէն ներս եւ գործնապէս կ‘իւրացնեն ժողովրդավարութեան կանոնները: Այս տարուան դպրոցական աշակերտական վարչութիւնը բացառիկ կերպով աշխատեցաւ Հայաստան մեր այցելութեան նախահաշիւին կարեւոր ներդրում մը ցուցաբերելու նպատակով, ինչ որ մեծ յաջողութեամբ պսակուեցաւ:
Տարեշրջանի ընթացքին կատարեցինք բազմաթիւ կրթա-դաստիարակչական այցելութիւններ եւ իրագործեցինք ապրումային ծրագիրներ, ինչպէս Ժողովրդավարութեան ծննդավայր՝ Փնիքա բլուրը, Ատտիկէի Աստղադիտարանը, Նաւատորմի թանգարանը, քաղաքին մէջ ապահով շրջագայութեան կեդրոնը եւ այլ:
Ուսուցիչներու եւ աշակերտներու միջեւ յարաբերութիւնները եւ առաւել բարելաւելու նպատակով բազմաթիւ միջոցառումներ կազմակերպեցինք, ինչպէս կողովագնդակի, փեթանքի եւ վոլէյպոլի մրցաշարքեր, ստեղծարար աշխատանոցներ:
Նոր Տարուան եւ Ս. Ծնունդի առիթով, այցելեցինք Հայաստանի Հանրապետութեան դեսպանատունը, ուր աշակերտութիւնը ելոյթ ունեցաւ ազգային երգերով ու պարերով:
Ազգային եւ կրօնական տօները նշեցինք պատշաճ ու ստեղծագործ կերպով: Տօնակատարութիւնները ճոխ մթնոլորտ ստեղծեցին, ազգային եւ աւանդական երգերով ու պարերով, թատերական ներկայացումներով, գիտելիքներու խաղերով եւ պատմական աշխատութիւններու ներկայացումներով:
Հայկական մշակոյթը մեր վարժարանի հիմնաքարն է: Յաճախակի աշակերտական տօնախմբութիւններ եւ հայկական խոհանոցի, աւանդական երգի ու պարի աշխատանոցներ, մասնակցութեամբ աշակերտութեան, ծնողներու եւ ուսուցչական կազմին:
«Հայերէն Պլոկ» կայքէջի պատասխանատուին՝ պարոն Իշխան Չիֆթճեանին հետ առցանց Հայ Գրականութեան ստեղծարար աշխատանոցին շնորհիւ, մեր աշակերտները
«Մենք» թերթիկին մէջ լոյս տեսան մեր աշակերտներու թղթակցութիւններ, յօդուածներ եւ գրական հատուածներ:
Բարեկենդանին խաղեր կազմակերպեցինք ու խաղացինք մեր աշակերտներուն հետ: Ըստ աւանդութեան, աշակերտները այդ օր «դատեցին» իրենց ուսուցիչները:
Մեր երգչախումբը մասնակցեցաւ Սրբոց Թարգմանչաց եւ Վարդանանց տօնակատարութեանց երգեցողութեան:
Զատկուան եւ Վարդանանց տօներուն, առիթը ստեղծեցինք մեր աշակերտներուն Տէր Նարեկ քհնյ. Շահինեանին կողմէ Հայոց Եկեղեցւոյ բարքերուն մասին տեղեկանալու:
«Ցիքնոփեմբթի»ն այս տարի եւս վերածեցինք «Հայկական խորովածի օր» ուան, աւանդական խորովածով, երգ ու պարով:
Մեր դպրոցին մէջ առցանց հետեւեցանք Կրթութեան նախարարութեան համապատասխան ծրագրին: Գ. Կարգի աշակերտները այցելեցին նաեւ Կրթութեան Նախարարութիւնը նոյն ծրագրի ծիրէն ներս:
Մեր երգչախումբը միանալով Զաւարեան եւ Լ. եւ Ս. Յակոբեան վարժարաններու Ե. եւ Զ. Դասարաններու աշակերտութեան, երգերով ելոյթ ունեցան Հայ Կապոյտ Խաչի հարիւրամեակին նուիրուած հանդիսութեան:
Ցեղասպանութեան տարելիցին առիթով ոգեկոչական ձեռնարկներուն, բողոքի ցոյցին եւ Հ.Յ.Դ. Պատանեկան Միութեան կազմակերպած ծառատնկումին ներկայ եղանք, վերահաստատելով մեր սրբազան ուխտը՝ պայքարելու մինչեւ վերջնական յաղթանակ: Այս տարի յատուկ պատիւը ունեցանք Կեդրոնական քաղաքական ձեռնարկին մասնակցելու մեր երգչախումբով ու նուագախումբով:
Այս տարի եւս Աթէնքի քաղաքապետարանի «Աթինա Պրոմախոս» հոգեկան կախուածութիւններու կանխարգելման կեդրոնի հետ համագործակցելով, իրականացուցինք յատուկ կրթական ծրագիր, որու նպատակն էր մեր աշակերտներու միջեւ յարաբերութիւնները: Խորհրդակցելով վերոնշեալ կեդրոնի հոգեբան՝ տիկին Վլութողլուին հետ, կարգաւորեցինք տուեալ ծրագրի իրականացումը շաբաթական երկու դասապահու դասարանային հանդիպումներով Փետրուար եւ Մարտ ամիսներու ընթացքին:
Բնապահպանական (մեղուի եւ մեղուաբուծութեան), մշակութային («Մեր վտանգուած մշակութային ժառանգութիւնը») ծրագիրներու ծիրէն ներս, կազմակերպեցինք եւ իրագործեցինք դաստիարակչական երկօրեայ պտոյտ մը դէպի Արղոլիս նահանգը, որու ընթացքին մեր աշակերտները տեղեկացան բնութեան հաւասարակշռութեան մէջ մեղուներու հիմնական դերին մասին, յունական հնագիտական վայրերու եւ անոնց պահպանման ձեւերուն. ասոնց զուգահեռ Ողիմպիական խաղերու մասնակցած մեր արքաներուն եւ մասնաւորաբար ախոյեան՝ Վարազդատ թագաւորին մասին, ինչպէս նաեւ նորագոյն Յունաստանի առաջին մայրաքաղաքին՝ Նաւպլիոյի մէջ Հայոց Ցեղասպանութենէն փրկուած մեր պապերու հաստատման մասին:
Նախակրթարաններու աւարտականներուն համար ծանօթացման օրեր էին Հ.Կ.Խ.-ի 100-ամեակին պատրաստութեան փորձերու օրերը, որոնց ընթացքին մեր զոյգ Նախակրթարաններու Ե. եւ Զ. դասարաններու աշակերտները ջերմ մթնոլորտի մէջ, ծանօթացան մեր շէնքային հնարաւորութիւններուն, կրթական ծրագիրներուն եւ առիթը ունեցան ալ աւելի սերտացնելու իրենց բարեկամական կապերը:
Կազմակերպեցինք նաեւ Հ.Կ.Խ.-ի Զաւարեան նախակրթարանի աւարտականներու ծնողներուն համար, ծանօթացման, զեկուցական հանդիպում մը, գործակցելով դպրոցի տնօրէնութեան հետ:
Մեր աշակերտներուն հետ ջերմ մթնոլորտ ստեղծելու նպատակով, կազմակերպեցինք հաճելի պտոյտներ դէպի մեր մօտիկ Նէա Զմիռնիի հրապարակը եւ պուրակը, «Թրիցիս» հանրային պարտէզը:
Մեր նախորդ տարուան շրջանաւարտներուն համար յատուկ երեկոյ մը կազմակերպեցինք:
Այս տարի եւս մեր աւարտականներուն համար կազմակերպեցինք դպրոցական եւ արհեստագիտական կողմնորոշման դասընթաց աշխատանոց, զոր վարեց մասնագիտացած յատկապէս հրաւիրուած հոգեբան մը:
Այս տարուան մեր աշակերտներու հաւաքական հետազօտական աշխատանքը ներկայացուած է մեր դպրոցի կայքէջին մէջ եւ յոյն աշակերտներու: Հայկական աշխատանքին նիւթն էր՝ «Մեր վտանգուած մշակութային ժառանգութիւնը»: Այս աշխատանքներու ծիրէն ներս Գ. կարգի աշակերտները խմբովին ներկայ գտնուեցան Դոկտ. Արմինէ Տիգրանեանի դասախօսութեան, զրուցեցին իրեն հետ եւ իր սիրայօժար կերպով տրամադրած աշխատութիւններն ալ ուսումնասիրելով ճոխացուցին իրենց աշխատանքները: Այսպիսով մեր աշակերտները դարձան իսկապէս մեր հնամեայ մշակոյթի յանձնառու դեսպաններ: Մեր սրահին մէջ հիւրընկալեցինք Խայտարիի 8-րդ Միջնակարգ Վարժարանի Գ. կարգը: Մեր Գ. կարգի աշակերտները ուրախութեամբ ներկայացուցին իրենց աշխատութիւնները մեր պատմութեան ու հարուստ մշակոյթի մասին եւ իրենց յոյն տարեկիցներուն հայկական աւանդական երգեր ու պարեր սորվեցուցին: Երկու դպրոցներու միջեւ ջերմ բարեկամական կապը ընթացք ունեցաւ մեր աշակերտներու այցելութեամբ իրենց դպրոցը:
Այս տարի կազմակերպեցինք նաեւ մեր ծնողներուն համար դասախօսական շարք մը «Պատանեկութիւն՝ ճանապարհ դէպի ինքնավարութիւն» խորագրով: Սոյն ծրագրին իրագործման համար հրաւիրուեցան ծնողները յուզող նիւթեր ներկայացնող մասնագէտներ: Հանդիպումները տեղի ունեցան ամսական դրութեամբ:
Քննութիւններու վերջին օրը, ինչպէս ամէն տարի, բոլորս միասին զուարճացանք Վարդավառի ջրախաղով:
ՅԱՐԱԲԵՐԱԿԱՆ
Մեր աշակերտներու ծնողներուն հետ անմիջական եւ սիրալիր կապը եղաւ թէ՛ մօտէն, թէ՛ էլ. նամակագրութեան եւ հեռաձայնի միջոցաւ: Միշտ փորձեցինք գործել համախորհուրդ, ի խնդիր մեր պատանիներու լաւագոյն աճման:
Սրբազան Հօր եւ Ազգային Վարչութեան հետ մեր կապերը եղան յարգալից, իսկ Ուսումնական եւ Տնտեսական խորհուրդներուն հետ՝ անմիջական ու գործնական:
Սիրալիր յարաբերութիւններ ունեցանք Հ.Կ.Խ.-ի Շրջանային եւ տեղւոյն վարչութիւններուն հետ:
Վարժարանէն ներս հիւրընկալեցինք Երեւանի Մանկավարժական համալսարանի պատմութեան բաժինի վարիչ պարոն Խաչատուր Ստեփանեանը, Ե.Պ.Հ. հետազօտողներ, Հ.Օ.Մ.-ի Կեդրոնական վարչութեան ներկայացուցիչ տիկին Լիզա Ժիլիպէր, Կոստանդնուպոլսոյ «Փարոս» պարբերաթերթի խմբագիր՝ տիկին Մարալ Ֆուքս:
Սիրալիր եւ համագործակցութեան ոգիով սահմանուած յարաբերութիւններ ունեցանք մեր վարժարանի Ծնողական միութեան վարչութեան հետ:
Հ.Մ.Ը.Մ.-ի եւ Համազգայինի Շրջանային եւ տեղւոյն վարչութիւններուն հետ մեր կապերը եղած են սիրալիր եւ շինիչ:
Կանոնաւոր կապ հաստատած ենք շրջանի Կրթութեան տնօրէնութեան հետ, համադրելով մեր կրթական աշխատանքը ըստ անոնց թելադրանքներուն: Հանդիպումներ ունեցած ենք Տտնօրէնին եւ մեր վարժարանը հսկող բոլոր պատասխանատուներուն հետ, ամրապնդելով արդէն իսկ գոյացած փոխադարձ յարգանքն ու համագործակցութիւնը: Ստացուած ու առաքուած նամակներ, հրաւէրներ, հաստատագրեր եւ այլ բնոյթի փաստաթուղթեր պահած ենք էլեկտրոնային արխիւով, ինչպէս թելադրուած է:
ԾՆՈՂԱԿԱՆ ՄԻՈՒԹԻՒՆ
Ծնողական միութեան վարչութիւնը բաղկացած է հետեւեալ անդամներէն. Անեթա Նշանեան, Վերոնիկ Գոնեալեան, Թամար Յովակիմեան, Սոնա Գրիգորեան:
Վարչութիւնը ամէն ջանք թափեց, որպէսզի գոհացնէ վարժարանի կարիքները: Տարեշրջանի սկիզբը կատարեց խմբային ապահովագրութիւն աշակերտութեան համար: Նոր Տարուան արձակուրդէն ետք աւանդական գաթաներ ու նուէրներ տրամադրեց աշակերտներուն: Ե՛րբ որ կարիքը զգացուեցաւ, նիւթապէս սատար կանգնեցաւ մեզի:
Մեր եւ Լ. եւ Սոֆիա Յակոբեան վարժարանի տնօրէնութեան եւ զոյգ Ծնողական միութեանց համագործակցութեամբ, մեր գրադարանը ընդարձակեցաւ եւ վերանորոգուեցաւ: «Բաբգէն Գասապեան գրադարան»-ի բացումը պիտի կատարուի յառաջիկայ տարեշրջանի սկիզբը:
ԱՄԱՎԵՐՋԻ ՀԱՆԴԷՍ ԵՒ ՎԿԱՅԱԿԱՆԱՑ ԲԱՇԽՈՒՄ
Մեր վարժարանի ամավերջի հանդէսն ու վկայականաց բաշխման արարողութիւնը տեղի ունեցաւ Չորեքշաբթի, 25 Յունիս 2024-ի երեկոյեան ժամը 8.30-ին, մեր բակին մէջ:
Ներկայացուեցան յունական թատերախաղ, երգեր, պարեր ու բեմականացուած աւանդազրոյցներ ու աւանդութիւններ:
ՈՒԽՏԱԳՆԱՑՈՒԹԻՒՆ ԴԷՊԻ ՀԱՅՐԵՆԻՔ
Այս տարի եւս մեր վարժարանը սերտօրէն համագործակցելով մեր ծնողներուն, Հ.Կ.Խ.-ի Շրջանային Վարչութեան, Ուսումնական եւ Տնտեսական Խորհուրդներուն հետ կարողացանք կազմակերպել եւ իրականացնել եօթնօրեայ ուխտագնացութիւն դէպի Մայր Հայրենիք՝ Հայաստան 29 Յունիսէն մինչեւ 5 Յուլիս 2024: Այս մէկը կարելի եղաւ իրագործել շնորհիւ Տնտեսական խորհուրդի եւ Հ.Կ.Խ.-ի յատկացումներուն, անհատներու նուիրատուութիւններու, ծնողներու ներդրումով եւ մեր աշակերտներու աշխուժ գործունէութեան: Անոնք ամբողջ տարուան ընթացքին կազմակերպեցին կարգ մը ձեռնարկներ (պարահաւաքոյթներ, ամանորեայ համերգ, տօնավաճառ եւ այլն) որոնցմէ գոյացաւ կոկիկ գումար մը:
Ուխտագնացութեան մանրամասն ծրագիրը հետեւեալն էր.
Այցելութիւն Մատենադարան եւ առաջին պտոյտ Երեւանի մէջ: Այցելութիւն Մայր Աթոռ Ս. Էջմիածին, մասնակցութիւն Ս. պատարագին, Սարդարապատ, Պատմութեան եւ ազգագրութեան թանգարան, գիշերային պտոյտ Երեւանի մէջ: Այցելութիւն Երեւանի գնացքի կայարան եւ Սասունցի Դաւիթի արձան, Խոր Վիրապ, Գէորգ Չաւուշի արձան, Նորավանք, Արենիի քարանձաւ, խաչքարաշինութեան արհեստանոց, գիշերային պտոյտ Երեւանի մէջ: Այցելութիւն Սեւանայ լիճ, Սեւանայ վանք, Դիլիջան, Հաղարձին վանք, Պարզ լիճ, գիշերային պտոյտ Երեւանի մէջ: Օր հինգերորդ՝ մեր յարգանքի տուրքը մատուցեցինք Ծիծեռնակաբերդի անմար բոցին դիմաց ու այցելեցինք Ցեղասպանութեան թանգարանը: Ապա այցելեցինք Օշականի Սուրբ Մեսրոպ եկեղեցին, ուր խոնարհեցանք մեր այբուբենը ստեղծող հանճարի դամբանին առջեւ, ուխտելով վառ պահել մեր լեզուն: Այցելեցինք նաեւ թանգարանն ու այբուբենի այգին: Յաջորդաբար ուղղուեցանք դէպի Գիւմրի քաղաքը, ուր այցելեցինք Գիւմրիի մայր Հայաստանը եւ Սեւ ամրոցը: Այցելութիւն Երեւանի Մայր Հայաստան, Արցախեան գոյամարտի թանգարան, Չարենցի Կամար, Գառնիի հեթանոսական տաճար, Գեղարդի վանք, «Քարերի սիմֆոնիա»: Երեւանի օփերային մէջ դիտեցինք Արամ Խաչատուրեանի «Դիմակահանդէս» պալէն: Վերջին պտոյտ մը վարդագոյն Երեւանի փողոցներուն մէջ, յարգանքի տուրք Հայաստանի Հանրապետութեան հիմնադիր՝ Արամ Մանուկեանին, Վերնիսաժ եւ Վարդան Մամիկոնեանի արձան:
Մեր չքնաղ հայրենիքը մեր սրտերուն մէջ, վերադարձանք Յունաստան:
ՇՆՈՐՀԱԿԱԼԻՔ
Պարտք կը զգանք անգամ մը եւս հրապարակաւ մեր շնորհակալութեան եւ երախտագիտութեան խօսքը ուղղել Սրբազան Հօր, Հ.Կ.Խ.՝ մօր, Ազգային Ուսումնական եւ Տնտեսական խորհուրդներուն, մեր կողքին կանգնած սիրելի Հ.Մ.Ը.Մ.-ին, Համազգայինին եւ «Ազատ Օր» օրաթերթի խմբագրութեան: Շնորհակալութիւն մեր սիրելի ծնողներուն անոնց ցուցաբերած վստահութեան համար: Շնորհակալութիւն մեր ծնողական Միութեան: Շնորհակալութիւն Լ. Եւ Ս. Յակոբեան եւ Զաւարեան նախակրթարաններու տնօրէններուն, համագործակցութեան համար: Շնորհակալութիւն կը յայտնենք նաեւ Յունաստանի մէջ Հայաստանի դեսպանութեան, որ գեղեցիկ կապ մը ստեղծած է մեր աշակերտներուն հետ: Շնորհակալութիւն դասախօս տիկին Արմինէ Տիգրանեանին, որ մեզի օգնեց մեր այս տարուան հետազօտական աշխատանքին: Շնորհակալութիւն բոլոր անոնց, որոնք կամաւոր աշխատանքով եւ նուիրատուութիւններով մեծապէս սատարեցին մեր Վարժարանի հեզասահ գործունէութեան՝ Յովհաննէս Թերզեան, Կիւլա Գարապաճաքեան, Վիգէն Մինասեան, Յակոբ Եօրղանճեան, Թարեք Ալմունաճետ, Գաթերինա Փափատիմիդրաքոբուլու, Անդրանիկ Աբիկեան, Ստեփան Դեգերեան ընտանիք, Ալիս Ֆուրունճեան, Սերգօ Մովսէսեան, Միհրան Պարղուտեան ընտանիք, Նշանուհի Մասոյեան, Կարպիս Խաչէրեան: Շնորհակալութիւն մեր դպրոցի մայրիկին՝ տիկին Անի Քէօշկէրեանին: Շնորհակալութիւն մեր վարորդներուն եւ ուղեկցող տիկիններուն՝ Վերժին Տէտէյեան, Եաննա Մէնէշեան, Լուսի Սուաքճեան, Յովիկ Ապրոյեան եւ Տիմիթրիս Վամվաքաս:
Յատուկ շնորհակալական խօսք կ‘ուղղենք մեր ուսուցիչներուն, որոնք անսակարկ նուիրումով կը ծառայեն այս դպրոցէն ներս: Շնորհակալութիւն բոլո՛ր անոնց, որոնք հաւատքով սատարեցին մեր Վարժարանի յաջող գործունէութեան:
ՎԵՐՋԻՆ ՊԱՏԳԱՄ ՄԵՐ ՇՐՋԱՆԱՒԱՐՏՆԵՐՈՒՆ
Սիրելի՛ աղջիկներ եւ տղաք,
Ահաւասիկ աւարտն է ձեր կեանքի կարեւորագոյն հանգրուանին՝ աշակերտական տարիներու առաջին ու կարեւորագոյն փուլին՝ հդաստիարակութեան: Տասնմէկ տարի դուք մեր վարժարաններէն ներս ըմբոշխնեցիք անուշ բոյրը մեր ինքնութեան, մեր մշակոյթին, մեր ոսկեղնիկ լեզուին: Շնչեցիք ու արարեցիք հայկական կտուրի տակ, մայրենի տաքուկ ծոցին մէջ:
Մենք լաւ գիտենք, ինչքան կը նուիրուիք վսեմ նպատակներու: Ինչքան բոց կայ ձեր մէջ, եւ ինչքան ինքնավստահ կը մեկնիք դուք այս յարկէն, ստացած ըլլալով գիտական, զգացական, մարդկային եւ ազգային ամէն տեսակի անհրաժեշտ պաշար, որպէսզի նուաճէք բարձրագոյն կատարներ:
Դուք սատարեցիք մեր մշակութային արժէքներու պահպանման, հետազօտելով եւ հանրութեան ծանուցանելով անոնց սպառնացող վտանգները: Մեր հազարամեայ պատմութիւնն ու մշակոյթը ծանօթացուցիք յոյն դպրոցականներու եւ դարձաք մեր ազգին դեսպանները:
Եւ թէեւ հրաժեշտ կ‘առնէք մեզմէ, սակայն լաւ գիտէք, որ այս յարկը կը մնայ միշտ ձեր երկրորդ տունը, հայկական ջերմ բոյնը, ուր դուք կրնաք մտնել միշտ իբրեւ հարազատ տանտէր:
Փորձութիւնները բազմաթիւ պիտի ըլլան ձեր առջեւ: Մենք համոզուած ենք, որ դուք պիտի կարենաք յաղթահարել բոլո՛րը: Որովհետեւ դուք հիմա գիտէք, ո՛րն է ձեր հոգիին պարտէզը: Ամէն անգամ, որ կեանքի ալեկոծումները ձեզ փորձեն ընկճել, դուք ապաստանեցէք այնտեղ, հզօրացէք ու կրկին մտէք կեանքի ասպարէզ, ա՛լ աւելի ինքնավստահ ու զօրեղ: Ու ձեր անհատական հոգիին կողքին միշտ փայփայէք ու գուրգուրաք մեր հաւաքական պարտէզը՝ մեր ակումբը, մեր միութիւնները, մեր եկեղեցին, որովհետեւ մեր Ազգի Կենաց Ծառին տէրը դո՛ւք ալ էք սիրուններ:
Տնօրէնութիւն
