Շաբաթ, 20 Սեպտեմբեր 2025-ի երեկոյեան, Համազգային Հայ կրթական եւ մշակութային միութեան Թեսաղոնիկէի «Ղազարոս Սարեան» մասնաճիւղի վարչութեան կազմակերպութեամբ, տեղի ունեցաւ պարային ելոյթ՝ նուիրուած Հայաստանի Հանրապետութեան անկախութեան 34-րդ տարեդարձին: Ելոյթը իրականացաւ գործակցութեամբ Պուլկարիոյ Փլովտիւ քաղաքի հայկական պարախումբին:
Ելոյթին ներկայ էին Թեսաղոնիկէի Ս. Աստուածածին եկեղեցւոյ հոգեւոր հովիւ Տ. Եղիա վրդ. Մալխասեան, Թաղային խորհուրդի ատենապետ պրն. Յակոբ Գասպարեանը, Թեսաղոնիկէի մէջ Հայաստանի Հանրապետութեան հիւպատոսի ներկայացուցիչ պրն. Սարգիս Տանկազեան եւ Թեսաղոնիկէի մեր սիրելի հայրենակիցներն ու ծնողները:
Բացման խօսքով հանդէս եկան Թեսաղոնիկէի Համազգայինի անդամներ ընկերներ Տիգրան Սարգիսեան եւ Աստղիկ Կարապետեան, որոնք բարի գալուստ մաղթելով ներկաներուն իրենց շնորհակալութիւնը յայտնեցին, որ անգամ մը եւս իրենց ներկայութեամբ քաջալեր հանդիսացան Համազգայինի գործունէութեան:
Ապա, անոնք բեմ հրաւիրեցին պրն. Սարգիս Տանկազեանը, որ իր կարգին նախ փոխանցեց Յունաստանի մէջ Հ.Հ. դեսպան պրն. Տիգրան Մկրտիչեանի ողջոյններն ու մաղթանքները, ապա իր գոհունակաութիւնն ու ուրախութիւնը յայտնեց, որ տարբեր առիթներով Համազգայինի անդամները ելոյթներ կազմակերպելով մեր հայրենակիցները ի մի կը համախմբեն: Յաջորդաբար, բեմ հրաւիրուեցաւ Թաղային խորհուրդի ատենապետ պրն. Յակոբ Գասպարեան, որ իր հերթին արտայայտեց խորհուրդի գնահատանքն ու ուրախութիւնը՝ ընդգծելով, թէ հաճելի է անգամ մը եւս համախմբուիլ իբրեւ մէկ ընտանիք, նշելու Հայաստանի Հանրապետութեան անկախութեան 34-րդ տարեդարձը։
Ողջոյնի խօսքերէն ետք, հանդիսութիւնը շարունակուեցաւ գեղարուեստական ելոյթներով։ Նախ բեմ բարձրացան Համազգայինի «Մասիս» եւ «Կիլիկիա» պարախումբերը, ապա Պուլկարիոյ Փլովտիւ քաղաքէն ժամանած «Եան» պարախումբի հայ պատանիները։ Իւրաքանչիւր պարախումբ իր յատուկ ոճով եւ յաղթական ոգիով ներկայացուց հայկական աւանդական պարեր, որոնք ոգեւորեցին թէ՛ ներկայ հայ հանրութիւնը եւ թէ՛ օտար հիւրերը՝ ստեղծելով տօնական եւ ճոխ մթնոլորտ։ Աւարտին, բոլոր պարախումբերը միասնաբար բեմ բարձրացան եւ համատեղ պարով փակեցին հանդիսութիւնը՝ աւելի եւս շքեղացնելով մթնոլորտը։
Ելոյթէն ետք, Թեսաղոնիկէի Ս. Աստուածածին եկեղեցւոյ կից գտնուող «Տէր-Զաքարեան» սրահին մէջ, Համազգայինի «Ղազարոս Սարեան» մասնաճիւղի վարչութիւնը ճաշկերոյթ մը կազմակերպած էր, ի պատիւ երկու պարախումբերու անդամներուն եւ անդամուհիներուն։
Իսկ Կիրակի, 21 Սեպտեմբեր 2025-ին, առաւօտեան ժամը 10:00-ին, Թեսաղոնիկէի Ս. Աստուածածին եկեղեցւոյ մէջ, մատուցուեցաւ ս. եւ անմահ Պատարագ, զոր մատուցեց շրջանիս հոգեւոր հովիւը, Ս. Խորանի սպասարկութիւնը կատարեցին եկեղեցւոյս սարկաւագները, իսկ երգեցողութիւնը՝ դպրաց դասը:
Ս. Պատարագին իրենց մասնակցութիւնը բերին շրջանիս Թաղային խորհուրդի ատենապետն ու անդամները, Պուլկարիայէն ժամանած մեր հայ պատանիներն, ինչպէս նաեւ Թեսաղոնիկէի պարախումբի անդամները ու անոնց ծնողները եւ հաւատաւոր ժողովուրդը:
Նախքան օրուան քարոզը, Յունաստանի Հայոց թեմի Կրօնական ժողովին որոշումով, ինչպէս թեմի բոլոր եկեղեցիներուն մէջ, Հայաստանի Հանրապետութեան անկախութեան տօնին առիթով, Ս. Աստուածածին եկեղեցւոյ մէջ եւս տեղի ունեցաւ գոհաբանական մաղթանք եւ դրօշի օրհնութիւն:
Հայր սուրբը իր օրուան քարոզին մէջ գօտեպնդեց ներկաները եւ կոչ ուղղեց վերանորոգել մեր հաւատարմութիւնը ու զայն աւելի զօրացնել հայրենիքին նկատմամբ: Ան ընդգծեց, որ մենք՝ իբրեւ սփիւռքահայ նոր սերունդ, պէտք է ամուր կառչինք մեր ազգային աւանդութիւններուն ու սովորութիւններուն, պահենք մեր հաւատքը եւ վստահութեամբ դիմենք Ամենակալ Աստուծոյ՝ աղօթքով, խնդրելով անկէ կատարեալ իմաստութիւն շնորհէ Հ.Հ. իշխանութեանց, որպէսզի դէպի լաւն ու բարին առաջնորդէ մեր սիրելի հայրենիքը:
