Համաշխարհային համբաւի գեղանկարիչներ Էտուարտ Սագայեանի ու Աննա Մարիա Ցագալիի այցելութիւնը «Լ. եւ Ս. Յակոբեան» վարժարան
Հինգշաբթի, 9 Հոկտեմբերին, Հ.Կ.Խ.-ի «Լ. եւ Ս. Յակոբեան» վարժարանը մեծ ուրախութիւն եւ պատիւ ունեցաւ հիւրընկալելու երկու հռչակաւոր եւ միջազգային ճանաչում ունեցող գեղանկարիչներ՝ պարոն Էտուարտ Սագայեանն ու տիկին Աննա Մարիա Ցագալին։
Այցելութիւնը տեղի ունեցաւ գեղանկարչական աշխատանոցի ծիրէն ներս, որ կ’իրագործուի ամբողջ տարուան ընթացքին՝ տիկին Մարիա Տիմաքիի ղեկավարութեամբ եւ տիկին Նազիկ Ճամուզեանի օժանդակութեամբ։ Աշակերտները ունեցան բացառիկ հնարաւորութիւնը ներկայացնելու իրենց ստեղծագործութիւնները, արտայայտելու իրենց ներշնչման աղբիւրները, քննարկելու արուեստի հետ կապուած հարցեր եւ ստեղծագործ երկխօսութեան մտնելու երկու համբաւաւոր արուեստագէտներուն հետ։ Աշակերտներու գեղանկարչական աշխատանքները ցուցադրուեցան յաջորդ օր Ուրբաթ, 10 Հոկտեմբերին, վարժարանի սրահէն ներս, «Բաբգէն Գասապեան» գրադարանի բացման օրը:
Պարոն Սագայեանն ու տիկին Ցագալին տպաւորուեցան աշակերտներու աշխատանքով, որ ցոյց կու տայ երեւակայութեան լայն տարածք, արդարամիտ արտայայտութիւն եւ արուեստի նկատմամբ անկեղծ սէր։
Գեղանկարիչներուն ներկայութիւնը հանդիսացաւ ոգեշնչման եւ խրախուսման աղբիւր աշակերտներուն համար։
Մեր վարժարանը իր խորին երախտագիտութիւնը կը յայտնէ պարոն Սագայեանին եւ տիկին Ցագալիին՝ իրենց այցելութեան եւ աշակերտներուն արուեստի հանդէպ ունեցած խթանող եւ աջակցող մասնակցութեան համար, որ կը նպաստէ ստեղծագործ մտածողութեան եւ գեղարուեստական դաստիարակութեան խորացման՝ մեր դպրոցական համայնքին մէջ։
Նաեւ,կը շնորհաւորենք մեր աշակերտները իրենց աշխոյժ մասնակցութեան եւ ստեղծագործութիւններուն համար, մաղթելով իրենց բարի վերելք:
Հ.Կ.Խ.-ի «Լեւոն եւ Սոֆիա Յակոբեան»
ազգային վարժարանի տնօրէնութիւն
