Ա.Մ.Ն.ի մէջ գործող «Artsakh Arts and Cultural Foundation»ը պիտի շարունակէ իր նպաստը բերել Արցախին: Այս մասին, ըստ artsakhpress.amի, յայտնած է «Artsakh Arts and Cultural Foundation»ի հիմնադիր Կարօ Մատէնեան: Անոր խօսքով` հիմնադրամը յառաջիկային կը նախատեսէ Արցախի մասին կարճ տեսանիւթեր պատրաստել, որոնք այցեքարտ պիտի ըլլան զբօսաշրջիկներու համար: Իսկ Սեպտեմբերի վերջը հիմնադրամը պիտի սկսի նոր ծրագիր, որուն միջոցով կը նախատեսուի քնապարկեր ուղարկել պաշտպանութեան բանակին համար:
«Բացի այսօրինակ բարեգործական ծրագիրներէն, մենք լաւ համագործակցութիւն ունինք նաեւ արցախցի բեմադրիչ Ջիւան Աւետիսեանի հետ: Անոր հետ ծանօթացած ենք Երեւանի մէջ` «Թեւանիկ» ժապաւէնի անդրանիկ ցուցադրութեան ժամանակ: Յետոյ որոշեցինք օգտակար ըլլալ «Վերջին բնակիչը» ժապաւէնին: Մեր համագործակցութիւնը պիտի շարունակուի նաեւ անոր նոր ժապաւէնը` «Դրախտի դարպասը» նկարահանելու համար»,- նշած է Կարօ Մատէնեան եւ աւելցուցած, որ Ջիւանը մեծ գործ կ՝ընէ Արցախը շարժանկարի միջոցով ներկայացնելով աշխարհին: Խօսելով հիմնադրամին հետ համագործակցութեան մասին` Ջիւան Աւետիսեան նշած է, որ բարձր կը գնահատէ ձեւաւորուած յարաբերութիւնները:
